Job
42 Chaymantan Jobqa Jehová Diosta khaynata nirqan:
2 “Kunanraqmi allinta yachani tukuy ima ruway atisqaykita;
ima piensasqaykipas manan mana atikuqqa kanchu.+
3 Qanmi niwarqanki: ¿Pin qan kanki ima nisqaytapas* mana valeqman tukuchinaykipaq?
¿Imatan mana yachaspa rimashanki?,+ nispa.
Chay nisqaykiqa cheqaqpunin, noqaqa may admiranapaq ruwasqaykikunamanta mana allinta yachaspan rimarqani.+
4 Qanmi niwarqanki: Ama jinachu kay uyariway,
kunanmi noqa tapusayki, qantaq kutichiwanki,+ nispa.
5 Qanmantaqa rimaqllatan uyarirqani,
kunanmi ichaqa ñawiywanpuni rikuyki.
6 Maytan pesapakuni imachus rimasqaymanta,+
jallp’a patapi uspha patapi tiyaspan pesapakuni”,+ nispa.
7 Chhaynapin Jehová Diosqa Jobwan rimayta tukurqan, chaymantataq Jehová Diosqa Temán llaqtayoq Elifazta nirqan:
“Qankunaqa manan kamachiy Job jinachu noqamanta cheqaqllata rimarqankichis,+ chaymi qanpaqpas iskaynin amigoykikunapaqpas sinchi phiñasqa kashani.+ 8 Jobpa kasqanman riychis qanchis torokunata qanchis ovejakunata aparikuspa. Jinaspa ruphachina sacrificiota jaywankichis, kamachiy Jobtaq qankunapaq mañapusunkichis.+ Paypa mañakusqantaqa uyarisaqmi, manan mana yuyayniyoq kasqaykichisman jinachu castigasaykichis, qankunaqa manan kamachiy Job jinachu noqamanta cheqaqllata rimarqankichis”, nispa.
9 Jinan Temán llaqtamanta Elifazpas, Shúa llaqtamanta Bildadpas, Namá llaqtamanta Zofarpas Jehová Diospa kamachisqanman jina ruwarqanku; Jehová Diostaq Jobpa mañakusqanta uyarirqan.
10 Amigonkunarayku mañakusqan qhepamantaq+ Jehová Diosqa Jobpa ñak’ariyninkunata tukuchipurqan, jujmantataq qhapaqyachipurqan.+ Jehová Diosqa Jobpa llapa kaqninkunatapas iskay kutitawanraqmi qopurqan.+ 11 Chaymantataq Jobpa llapa wayqenkuna, panankuna, ñaupa reqsisqankunapas+ wasinman jamurqanku, jinaspa paywan kuska mijurqanku. Paykunan Jobta sonqocharqanku chhayna llakikuykunapi tarikusqanmanta. Jehová Diosqa manan jark’arqanchu chay llakikuykunapi tarikunanta. Chaymantapas paykunaqa sapankan juj qori anillota qolqetawan Jobman regalarqanku.
12 Chhaynatan Jehová Diosqa Jobta bendecirqan qallariypi bendecisqanmantapas mastaraq.+ Jinan Jobpa ovejankunaqa kapurqan chunka tawayoq waranqa, camellonkunataq soqta waranqa, wakankunataq iskay waranqa,* asnonkunataq* waranqa.+ 13 Chaymantapas Jobqa qanchis churiyoq kinsa ususiyoqmi kapurqan.+ 14 Ñaupaq kaq ususintan suticharqan Jemimá nispa, iskay kaqtataq Quesías nispa, kinsa kaqtataq suticharqan Querén-Apuc nispa. 15 Jobpa ususinkunaqa munay sipaskunan karqanku, tiyasqanku suyupiqa manan paykuna jina munay sipaskunaqa karqanchu. Paykunaqa turankunawan kuskan taytankumanta herenciata chaskirqanku.
16 Chay qhepamanqa pachaj tawa chunka watatawanraqmi Jobqa kausarqan, payqa wawankunatapas mirayninkunatapas rikurqanraqmi. Payqa nietonkunaq wawankunataraqmi rikurqan. 17 Chaymantataq Jobqa unayta kausaspa machuña thaj wañukapurqan.