Jonás

1 Jehová Diosmi Amitaipa wawan Jonasta* nirqan:+ 2 “Jatun Nínive llaqtata riy,+ chay runakuna imaymana juchata ruwasqankutan rikumuni, paykunaman willamuy wañuchisqa kanankumanta”, nispa.

3 Jonasmi ichaqa Jehová Diosta mana kasukuspa Jope llaqtaman ayqekurqan, chaypin tarirqan Tarsisman riq barcota. Pasajenta pagaspataq chay barcoman wicharqan chaypi kaqkunawan kuska rinanpaq, chhaynapin Jehová Diosmanta ayqekurqan.

4 Chayllamanmi Jehová Diosqa lamar-qochapi sinchita wayrachimurqan, nishutapunin unuqa aytikusharqan, yaqañan barcopas p’akikusharqan. 5 Jinan barcopi marinerokunaqa sinchita mancharikurqanku, jinaspan sapankanku diosninkumanta wajakuyta qallarirqanku. Cargakunatapas unu ukhumanmi wijch’uykuyta qallarirqanku, chhaynapi barco mana chinkaykunanpaq.+ Jonastaq barco ukhupi misk’ita puñusharqan. 6 Barcopi capitantaq Jonaspa kasqanman jaykuspa nirqan: “¡Yau rijch’ariy! ¿Imaraykun puñushanki? ¡Diosniykita wajakuy! Yaqapaschá cheqaq Diosqa khuyapayawasunman chhaynapi mana wañunanchispaq”,+ nispa.

7 Jinan paykunapura ninakurqanku: “Jamuychis sorteasunchis,+ piqpa juchanpis khaynapi tarikushanchis chayta yachananchispaq”, nispanku. Chhaynapin yacharqanku Jonás juchayoq kasqanta.+ 8 Jinan Jonasta tapurqanku: “Sut’inta willawayku, ¿qanpunichu juchayoq kanki khaynapi tarikunanchispaq? ¿Imapin llank’anki? ¿Maymantan jamushanki? ¿May llaqtamantan kanki?”, nispa.

9 Jonastaq nirqan: “Hebreo runan kani, janaq pacha Jehová Diostan adorani. Paymi lamar-qochatapas ch’aki jallp’atapas kamaq Diosqa”, nispa.

10 Chayta uyarispan runakunaqa astawanraq mancharikurqanku. Jinaspa Jonasta tapurqanku: “¿Ima juchatan ruwarqanki?”, nispa. (Jonaspa willakusqanraykun paykunaqa yacharqanku Jehová Diosmanta ayqekushasqanta). 11 Lamar-qochaqa astawanraqmi aytikusharqan. Chayraykun paykunaqa Jonasta tapullarqankutaq: “¿Imatan ruwasaykiku kay sinchi wayra pasananpaq?”, nispa. 12 Jinan Jonasqa paykunata nirqan: “Unu ukhuman wijch’uykuwaychis chhaynapin kay sinchi wayra thanipunqa. Noqaq juchaypin kaykuna pasashan”, nispa. 13 Runakunan ichaqa kallpachakurqanku barcota ch’aki jallp’aman chayachinankupaq, ichaqa manan atirqankuchu sinchita wayramusqanrayku lamar-qochapas sinchita aytikusqanrayku.

14 Jinan paykunaqa Jehová Diosta wajakurqanku: “Jehová, ¡amayá wañusaqkuchu kay runaq causanpiqa! ¡Amayá kay mana juchayoq runaq wañusqanmantaqa juchachawankikuchu! Jehová, qanpa munayniykiman jinan kayqa kashan”, nispa. 15 Jinaspan Jonasta wijch’uykurqanku, chhaynapin lamar-qochaqa thanipurqan. 16 Chayta rikuspan runakunaqa Jehová Diosta anchatapuni manchakurqanku,+ jinan Jehová Diosman sacrificiota jaywarqanku, prometekurqanku ima.

17 Jehová Diostaq jatun challwata kachamurqan Jonasta millp’uykunanpaq, chhaynapin Jonasqa challwaq wijsanpi kinsa p’unchayta kinsa tutatawan karqan.+