2 Tesalonicenses

2 Wayqeykuna,* jayk’aqchus Señorninchis Jesucristoq chayamunan tiempo* kasqanmanta,+ jayk’aqchus paywan juñukunanchismantawanqa+ 2 ama yuyayniykichista ratullaqa cambiaychischu, amallataq mancharikuychischu pipas “Jehová* Diospa p’unchayninqa kaypiñan kashan” niqtinpas,+ chay rimaykuna Diosmanta jamuq willakuy jinaña kanman chaypas,+ ima willakuyña kanman chaypas, noqaykumanta jamuq carta jinaña kanman chaypas.

3 Amapunin piwanpas engañachikunkichischu; chay p’unchay jamunanpaqqa Diosmanta t’aqakuyraqmi ñaupaqtaqa kanqa,+ sinchi millay runapas rijurimunanraqmi kanqa,+ chay runaqa ch’usaqyachisqapunin kanqa.+ 4 Chay runaqa juj enemigon, pay kikinmi llapa dios nisqakunamantapas llapa ima adorana kaqkunamantapas aswan jatunmanraq tukunqa, chhaynapin Diospa templonpipas juj diospas kanman jinaraq lliu runa rikunanpaq tiyanqa. 5 ¿Manachu yuyarinkichis qankunawanraq kashaspayqa chaykunamanta rimapayaq kasqayta?

6 Ichaqa, yachasqaykichis jina, kanmi chay runata jark’aq, chhaynapi rijurimunan tiempopiña rijurimunanpaq. 7 Chay sinchi millay runaq millay ruwayninqa manaraqmi allintachu reparakushan, ichaqa ñan ruwashanña mana allinkunata;+ maykamachus chay jark’aq kanqa chaykamallan millay ruwayninqa mana sut’i reparasqachu kanqa. 8 Chaymantan ichaqa chay sinchi millay runaqa alayrita rijurimunqa. Paytan Señor Jesusqa samayninwan wañuchinqa,+ chayamunan tiempopi* rikuchikusqanwantaq ch’usaqman tukuchinqa.+ 9 Chay millay runa rijurimuspaqa Satanaspa atiyninwanmi rijurimunqa,+ jinaspa imaymana milagrokunata, engañanapaq señalkunata, admirakunapaq kaqkunatawan ruwanqa.+ 10 Chaymantapas imaymana mana chaninkunata ruwaspan+ chinkayman rishaqkunata engañanqa, chay chinkayman rishaqkunaqa salvasqa kanankupaq cheqaq kaqta mana chaskikusqankurayku mana munasqankurayku iman chayman rishanku. 11 Chaymi Diosqa jinata paykunata saqerparirqan pantasqa yachachikuywan engañachikunankupaq, chhaynapi llulla rimaykunata creenankupaq,+ 12 chhaynapitaq cheqaq kaqta mana creesqankumanta llapanku juzgasqa kanankupaq. Paykunaqa mana chanin kaqwanmi astawanqa kusikunku.

13 Jehová* Diospa munakusqan wayqeykuna,* Diosmi qankunataqa qallariymantapacha ajllarqasunkichis+ salvasqa kanaykichispaq, chaytan payqa ruwarqan cheqaq kaqpi creesqaykichisrayku espiritunwan ch’uyanchasqasuykichismanta.+ Chayraykun noqaykuqa qankunamanta Diosman graciasta qonaykupuni kashan. 14 Allin willakuykunata willasqaykuwanmi payqa chayman wajamurqasunkichis, chhaynapi Señorninchis Jesucristo jina qankunapas jatunchasqa kanaykichispaq.+ 15 Chayrayku, wayqeykuna,* allintapuni sayaychis+ imakunatachus yachachisqa karqankichis chaykunapi, allintataq chaykunamanqa k’askakuychis,+ chaykunata rimapayasqa kaspaña, apachimusqayku cartapiña yacharqankichis chaypas. 16 Taytanchis Diosqa munakuwanchismi,+ paymi ancha sumaq sonqo kayninpi wiñaypaq sonqochayta sumaq suyakuyta ima qowanchis.+ Paymantan mañakuyku Señorninchis Jesucristowan kuska 17 sonqoykichispi kallpachanasuykichispaq, allin ruwaykunapi allin rimaypi ima qaqata sayachinasuykichispaqwan.