Éxodo

31 Jehová Diosmi Moisesta nillarqantaq: 2 “Judá ayllumanta+ Hurpa nieton, Uripa churin Bezaleltan+ ajllani. 3 Paymanmi espirituywan junt’aykusaq, chhaynapi allin yachayniyoq, allin yuyayniyoq kananpaq, allin yachaq artesano ima kananpaq. 4 Paymi umallanmanta imaymana dibujokunata ruwayta yachanqa; yachanqan qoripi, qolqepi, cobrepi llank’aytapas, 5 jinallataq rumikuna thupayta may munasqanman kabichiytapas.+ Yachallanqataqmi maderakunapi imaymana ruwaytapas.+ 6 Payta yanapananpaqmi ajllashani Dan ayllumanta Aisamacpa churin Oholiabta.+ Ajllashanin juj allin yachaq* runakunatapas, paykunaq sonqonkuman iman yachayta churasaq, chhaynapin paykunaqa llapa imachus kamachisqayta ruwanqaku.+ 7 Paykunan ruwanqaku tupana karpata,+ rimanakuyniy arcata,+ rimanakuyniy arcaq tapanta,+ karpapi tukuy imaymanata, 8 mesata+ tukuy imaymanantinta, qori candelerota tukuy imaymanantinta,+ incienso q’apachina altarta,+ 9 ruphachina ofrendapaq+ altarta tukuy imaymanantinta, puruñata tiyanantinta ima.+ 10 Chaymantapas munay p’achakunatan awanqaku. Awallanqakutaqmi Aaronpaq sacerdote p’achakunata, churinkunapaq p’achakunatapas, chaywan churakuspa serviwanankupaq.+ 11 Paykunan ruwanqaku jawina aceitetapas, karpapi q’apachinapaq sumaq q’apaq inciensotapas.+ Llapa ima kamachisqaytan paykuna ruwanqaku”, nispa.

12 Jehová Diosqa nillarqantaqmi: 13 “Israel runakunatan ninki: Diosmi nin: Amapunin qonqankichischu noqapaq t’aqasqa samana p’unchaytaqa,+ chay p’unchaymi qankunapaqpas llapa mirayniykichiskunapaqpas qankunawan rimanakusqaymanta juj señal kanqa. Chaywanmi yachankichis noqa Jehová Diosqa qankunata t’aqasqayta. 14 Waqaychankichispunin samana p’unchaytaqa, chay p’unchayqa qankunapaq jatun p’unchaymi.+ Pipas chay p’unchayta mana respetanqachu chayqa, wañuchisqan kanqa. Pipas chay p’unchaypi imapipas llank’aqqa wañunqapunin.+ 15 Soqta p’unchayllan llank’ankichis, qanchis kaq p’unchaymi ichaqa samana p’unchay kanqa, llapaykichismi chay p’unchayqa samankichis.+ Chay p’unchayqa noqa Jehová Diospaq t’aqasqa p’unchaymi. Pipas samana p’unchaypi llank’anqa chayqa, wañuchisqan kanqa. 16 Llapa Israel runakunan samana p’unchaytaqa waqaychanqaku. Llapa mirayninkupas chaytan ruwanqaku. Kay rimanakuyqa wiñaypaqmi kanqa. 17 Chaymi Israel runakunawan noqawan rimanakusqaymanta señal kanqa.+ Noqa Jehová Diosqa soqta p’unchaypin janaq pachatapas kay pachatapas kamarqani, qanchis kaq p’unchaytaq llank’anaymanta samarqani,+ nispa”.

18 Sinaí orqopi Moiseswan rimayta tukuspataq Diosqa dedonwan qelqasqan iskaynin rimanakuy p’alta rumikunata Moisesman qorqan.+