Ezequiel
10 Qhawariqtiymi, querubín angelkunaq altonpi, p’alta chullunkuq altonpi imachá kanpas zafiro rumi jina kashasqa, chay rumiqa tiyana trono jinan kasqa.+ 2 Chaymantataq Diosqa* lino p’achawan p’achasqa runata nirqan:+ “Querubinkunaq uranman, ruedakunaq chaupinman jaykuy,+ chay ukhumanta maki junt’a sansata orqomuy,+ chaytataq llaqta pataman wijch’uykuy”,+ nispa. Jinan payqa rikushaqtiy chay ukhuman jaykurqan.
3 Chay runa jaykushaqtinqa temploq paña ladonpin querubinkunaqa kasharqanku, phuyutaq ukhu patioman junt’aykurqan. 4 Jehová Diospa k’anchaynintaq+ querubinkunaq kasqanmanta oqarikuspa templo punkuman rirqan, jinan phuyuqa chay temploman junt’aykurqan.+ Patiotaqa Jehová Diospa k’anchayninmi k’anchasharqan. 5 Querubinkunaq rafranku maywisqankuqa jawa patiokamaraqmi uyarikurqan, tukuy atiyniyoq Diospa kunkan jinaraqmi uyarikurqan.+
6 Chaymantan Diosqa* lino p’achawan p’achasqa runata nirqan: “Ruedakuna ukhumanta, querubín angelkuna chaupimanta ninata orqomuy”, nispa. Paytaq jaykuspa jujnin ruedaq ladonpi sayaykurqan. 7 Jinan jujnin querubinqa querubinkuna chaupipi kaq ninaman makinta jaywarirqan,+ jinaspa juj chhikanta orqomurqan, chaytataq lino p’achawan p’achasqa runaman qorqan.+ Paytaq chaskispa chay ukhumanta lloqsimpurqan. 8 Chay querubinkunaqa rafrankuq uranpi runaq makin jina makiyoqmi kasqaku.+
9 Qhawarinaypaqmi querubín angelkunaq ladonpi tawa ruedakuna kashasqa, sapanka querubinpa ladonpin juj rueda kashasqa. Chay ruedakunaqa crisólito rumi jinan k’anchasqa.+ 10 Tawantin ruedakunapas kaqkaman kasqa, sapanka ruedataq iskay pasanachisqa ruedapas kanman jina kasqa. 11 Phawaspaqa mana kutirispan may munasqanku ladoman phawaqku; maymanchus querubinkunaq uyan qhawaq chay ladomanmi riqku mana mayman kutirispa. 12 Querubinkunaqa llapa cuerponkupi ñawikunayoqmi kasqaku; wasankupi, makinkupi, rafrankupi iman askha ñawikuna kasqa. Tawantinkuq ruedankunapipas muyuriqnintinpin ñawikuna kasqa.+ 13 Ruedakunatan juj kunka nimurqan: “¡Ruedakuna!”,* nispa.
14 Chay querubín angelkunaqa sapankankun tawa uyayoq kasqaku. Jujnin kaq uyankun querubinpa uyan jina kasqa, juj kaq uyankutaq runaq uyan jina kasqa, juj kaq uyankutaq leonpa uyan jina kasqa, juj kaqtaq ankaq uyan jina kasqa.+
15 Chay querubinkunaqa Kebar mayu patapi rikusqay kausashaqkunan karqanku. Paykunaqa altomanmi oqarikurqanku.+ 16 Paykuna puririqtinkuqa ruedakunapas puririllaqkutaqmi. Querubinkuna rafrachakuspa phalariqtinkuqa, ruedakunapas oqarikullasqakutaqmi; manan querubinkunaq ladonmantaqa kuyuriqchu kasqaku.+ 17 Chay querubinkuna sayaykuqtinkuqa ruedakunapas sayaykullasqakutaqmi. Querubinkuna jatariqtinkuqa ruedakunapas oqarikullasqakutaqmi. Chay kausashaqkunata apaq espiritun ruedakunatapas apallaqtaq.
18 Chaymantataq Jehová Diospa k’anchayninqa,+ temploq punkunmanta oqarikuspa querubín angelkuna patapi sayaykurqan.+ 19 Qhawashallaqtiymi querubinkunaqa rafrachakuspa phalarirqanku. Ripushaqtinkuqa ruedakunapas ladollankupin kasharqan. Chaymantataq paykunaqa Jehová Diospa wasin punkupi, inti lloqsimuy ladopi kaq punkupi sayaykurqanku. Israelpa Diosninpa k’anchayninqa paykunapin kasharqan.+
20 Chay kausashaqkunaqa Kebar mayu patapi, Israelpa Diosninpa uranpi rikusqay kausashaqkunan kasqaku.+ Chayraqmi noqaqa repararqani paykunaqa querubinkuna kasqankuta. 21 Paykunaqa sapankankun tawa uyayoq, tawa rafrayoq kasqaku. Rafrankuq uranpipas runaq makin jina makiyoqmi kasqaku.+ 22 Chaymantapas Kebar mayu patapi rikusqay kausashaqkunaq uyan jina uyayoqmi kasqaku.+ Sapankankun ñaupaqllaman purisqaku.+