2 Reyes
3 Ajabpa churin Jehorammi+ Samariamantapacha Israelta kamachiyta qallarirqan Judá ayllupi rey Jehosafat chunka pusaqniyoq wataña kamachikushaqtin. Jehoramqa chunka iskayniyoq watan Israelpi kamachikurqan. 2 Jehoramqa Jehová Diospa cheqnisqan ruwaykunatan ruwarqan, ichaqa manan tayta-maman jinapunichu ruwarqan, payqa Baalta yupaychanapaq taytanpa ruwasqan yupaychana sayashaq rumitan thunirqan.+ 3 Chaywanpas payqa Israel runakunata juchallichiq Nebajpa churin Jeroboán jinan mana allinkunata ruwashallarqan,+ manataqmi chaykunamanta t’aqakurqanchu.
4 Moab runakunaq Mesá reyninqa ovejakunatan askhata uywaq. Paymi Israel reyman impuestota pagaq pachaj waranqa malta ovejakunata pachaj waranqa mana rutusqa anejokunatawan. 5 Ajab wañurapuqtin+ jinan ichaqa Israel rey contra jatarirqan.+ 6 Chaymi Israel rey Jehoramqa Samariamanta lloqsispa llapa Israel soldadokunata juñurqan. 7 Chaymantapas Judá ayllu rey Jehosafatmanmi willachimurqan: “Moab runakunaq reyninmi noqa contra jatarishan, ¿manachu chay rey contra maqanakuq riysiwankiman?”, nispa. Jinan Jehosafatqa nirqan: “Jakuyá risunchis.+ Noqanchisqa kaqllan kanchis, llaqtaypas llaqtayki jinan, caballoykunapas caballoykikuna jinan”,+ nispa. 8 Chaymantataq Jehosafatqa nirqan: “¿Mayqen ñannintataq risunri?”, nispa. Jehoramtaq nirqan: “Edom ch’in pampanta riq ñannintan”, nispa.
9 Jinan Israel reyqa Judá ayllu reywan Edom+ reypiwan Moab runakunawan maqanakuq rirqanku. Qanchis p’unchayña purishaqtinkun ichaqa ununku manaña kapurqanchu ni soldadokunapaqpas ni apasqanku uywakunapaqpas. 10 Chaymi Israel reyqa nirqan: “¡Imaraykutaq kayri pasawanchis! ¡Jehová Diospunin kaymanqa pusamuwanchis kinsantinchista Moab runakunaman entregawananchispaq!”, nispa. 11 Jinan Jehosafatqa tapurqan: “¿Manachu Jehová Diospa profetan kaypi kan paywan Jehová Diosta tapuchinanchispaq?”,+ nispa. Chaymi Israel reypa jujnin kamachinqa nirqan: “Arí kanmi juj profeta, payqa Safajpa churin Eliseon,+ paymi Eliaspa kamachin karqan”,*+ nispa. 12 Jehosafat-taq nirqan: “Payqa willawasunpunin Jehová Diospa nisqanta”, nispa. Jinan Israel reyqa Jehosafatpiwan Edom reypiwan Eliseowan tupaq rirqanku.
13 Eliseon ichaqa Israel reyta nirqan: “¡Iman qanwan ruwanay!+ Phaway tayta-mamaykiq profetankunata tapukamuy”,+ nispa. Chaymi Israel reyqa nirqan: “Amayá manan niwaykuchu, Jehová Diosmi kaymanqa kinsantiykuta pusamuwanku, chhaynapi Moab runakunaman entregawanankupaq”, nispa. 14 Chaymi Eliseoqa nirqan: “Servisqay wiñaypaq kausaq Diospa sutinpin, ejercitokunata kamachiq Jehová Diospa* sutinpin niyki, manachus kaypi rey Jehosafat+ kashanman chayqa manan uyariykimanchu nitaq qhawariykimanpaschu.+ 15 Kunanqa arpa tocaqta pusamuwaychis”,+ nispa. Pusamusqanku runa arpata tocayta qallariqtintaq Jehová Diospa atiyninqa* Eliseoman junt’aykurqan.+ 16 Jinan Eliseoqa nirqan: “Jehová Diosmi nin: Kay wayq’opi zanjakunata askhata kichaychis. 17 Noqa Jehová Diosmi nini: Manan wayrapas ni parapas kanqachu, chaywanpas kay wayq’opin unu junt’a kanqa,+ chaytan qankunapas uywaykichiskunapas ujankichis, nispa. 18 Chaykuna ruwayqa manan sasachu Jehová Diospaqqa,+ payqa Moab runakunatapas makiykichismanmi entregasunkichis.+ 19 Moabman jaykuspaqa allin perqasqa+ allin reqsisqa llaqtakunatan lliuta thuninkichis, allinnin sach’akunatan lliuta wit’unkichis, pujyukunatan lliuta tapankichis, allin mijuyta qoq jallp’akunatapas rumiwanmi junt’achinkichis”,+ nispa.
20 Jinan tutamantanta jak’u ofrenda jaywana horasta+ Edom ladomanta askha unu chayamurqan, jinan maypichus kashasqanku wayq’opiqa unu puririrqanraq.
21 Llapa Moab runakunataq paykuna contra reykuna jamushasqanta yachaspa llapa maqanakuyta atiq qharikunata wajachirqanku, jinaspa jallp’anku linderopi* listo maqanakunankupaq kasharqanku. 22 Tutamantanta sayarinankupaqtaq unuqa k’anchamushasqa intiq chayasqanwan. Chay unutan Moab runakunaqa yawarta jina pukata rikurqanku. 23 Jinan paykunapura ninakurqanku: “¡Qhawariychis! ¡Jaqayqa yawarpunin kanman! Kinsantin reykunachá paykunapura maqanakuspa wañuchinarukunku. ¡Jaku kunanqa kaqninkuta qechumusun!”,+ nispa. 24 Israel runakunaq karpakusqankuman jaykuqtinku jinataq Israel runakunaqa paykunawan maqanakuq lloqsimurqanku, Moab runakunan ichaqa ayqekurqanku.+ Jinan Israel runakunaqa Moab runakunata wañuchispa-wañuchispa chay runakunaq jallp’anman jaykurqanku. 25 Jinan llaqtakunata lliuta thunirqanku, unu pujyukunatapas lliuta taparqanku,+ allinnin sach’akunatapas lliuta wit’urqanku,+ allin mijuyta qoq jallp’akunamanpas juj rumitan sapanka runa chanqaykuqku, chhaynapin rumiwan junt’achirqanku. Quir-Arésej+ llaqtaq rumimanta perqankunallañan sayasharqan, ichaqa chaytapas warak’aqkunan muyuykuspa thunipullarqankutaq.
26 Moab reytaq atipachikushasqankuta reparaspa qanchis pachaj soldadokunata espadayoqtakama pusarikurqan, chhaynapi Edom+ reypa kasqanman chayananpaq, ichaqa manan atirqanchu. 27 Chaymi Moab reyqa phiwi* churinta llaqta perqa patapi sacrificiopi jaywarqan,+ chay churinmi paypa rantinpiqa kamachikunan karqan. Chayta rikuspan runakunaqa Israel runakunapaq sinchita phiñakurqanku, chaymi llapa soldadokuna llaqtankuman kutipurqanku.