2 Reyes
2 Sinchi wayrapi+ Jehová Dios Eliasta+ cieloman* apananpaqña kashaqtinmi, Eliaswan Eliseowanqa+ Guilgalmanta+ lloqsirqanku. 2 Jinan Eliasqa Eliseota nirqan: “Ama jinachu kay, kayllapi qhepakuy, Jehová Diosmi niwan Betel+ llaqtaman rinaypaq”, nispa. Eliseon ichaqa nirqan: “Wiñaypaq kausaq Jehová Diospa sutinpi qanpa sutiykipi iman jurayki, manan noqaqa saqesaykichu”, nispa. Chaymi iskayninku Betel llaqtaman rirqanku. 3 Betel llaqtaman chayashaqtinkutaq profetakunaq churinkunaqa* Eliseoman aypamuq llaqtamanta lloqsimurqanku, jinaspa nirqanku: “Kunan p’unchaymi Jehová Diosqa wiraqochayki Eliasmanta t’aqapusunki, manañan payqa patronniykichu kanqa,+ ¿yacharqankichu chayta?”, nispa. Eliseotaq nirqan: “Arí, yachanin. Amaña chaymanta rimaychischu”, nispa.
4 Chaymantataq Eliasqa Eliseota nirqan: “Ama jinachu kay, kayllapi qhepakuy, Jehová Diosmi niwan Jericó+ llaqtaman rinaypaq”, nispa. Eliseon ichaqa jujmanta nirqan: “Wiñaypaq kausaq Jehová Diospa sutinpi qanpa sutiykipi iman jurayki, manan noqaqa saqesaykichu”, nispa. Jinan iskayninku Jericó llaqtaman rirqanku. 5 Jericó llaqtapi kashaqtinkutaq chay llaqtapi kaq profetakunaq churinkunaqa Eliseoman asuykurqanku, jinaspa nirqanku: “Kunan p’unchaymi Jehová Diosqa wiraqochayki Eliasmanta t’aqapusunki, manañan payqa patronniykichu kanqa, ¿yacharqankichu chayta?”, nispa. Eliseotaq nirqan: “Arí, yachanin. Amaña chaymanta rimaychischu”, nispa.
6 Chaymantataq Eliasqa Eliseota jujmanta nirqan: “Ama jinachu kay, kayllapi qhepakuy, Jehová Diosmi niwan Jordán mayuman rinaypaq”, nispa. Eliseon ichaqa nirqan: “Wiñaypaq kausaq Jehová Diospa sutinpi qanpa sutiykipi iman jurayki, manapunin noqaqa saqesaykichu”, nispa. Jinan iskayninku Jordán mayuman rirqanku. 7 Chayman chayaspataq Eliaswan Eliseowanqa Jordán mayu patapi sayasharqanku. Paykunataqa profetakunaq pisqa chunka churinkunan qatikurqanku, chay profetakunan Eliasta Eliseotawan karullamanta qhawasharqanku. 8 Eliasqa profeta p’achanta ch’utikuspan k’uyurqan,+ jinaspa Jordán mayuta chaywan waqtarqan, jinan unuqa iskayman t’aqakurqan, chhaynapin iskayninku ch’aki pampanta chimparqanku.+
9 Mayuta chimparuqtinku jinataq Eliasqa Eliseota nirqan: “Ima munasqaykitapas mañakuway manaraq qanmanta Dios t’aqashawaqtin”, nispa. Jinan Eliseoqa nirqan: “Ama jinachu kay, espirituykimanta+ iskay parteta qoykuway”,+ nispa. 10 Chaymi Eliasqa nirqan: “Nishun chay mañakusqaykiqa. Ichaqa qayllaykimanta Diospa t’aqawasqanta rikunki chayqa chaskinkin mañakusqaykita, mana rikunkichu chaytaq mana chaskinkichu”, nispa.
11 Rimaspa purishaqtinkutaq qonqaylla nina carreta rijurimurqan nina caballokunantin,+ jinaspa sinchi wayrapi Eliasta cieloman* aparikapurqan.+ 12 Eliseotaq chayta rikuspa alto kunkawan nirqan: “¡Taytalláy! ¡Taytalláy! ¡Kayqa Israelpa carretanmi caballopi sillakuqninkunapiwan!”,+ nispa. Eliasta manaña rikuspataq Eliseoqa p’achanta iskayman llik’ikurqan.+ 13 Chaymantataq Eliseoqa Eliaspa urmaykamusqan profeta p’achanta+ oqarispa Jordán mayu pataman kutiykurqan. 14 Jinan Eliseoqa Eliaspa profeta p’achanwan mayuta waqtarqan, nirqantaq: “¿Maymi Eliaspa Diosnin Jehová Dios?”, nispa. Mayuta Eliseo waqtaqtin jinataq unuqa iskayman t’aqakurqan, chhaynapin payqa mayuta chimparqan.+
15 Chaytan Jericó llaqta profetakunaq churinkunaqa karullamanta qhawasharqanku, jinaspa nirqanku: “Eliaspa espiritunmi+ kunanqa Eliseopiñataq kashan”, nispa. Chaymi Eliseoman aypaspa ñaupanpi qonqorikurqanku, jinaspa pampakama k’umuykurqanku. 16 Chaymantataq nirqanku: “Kaypin kashan pisqa chunka allin kallpasapa qharikuna, ama jinachu kay, paykuna riruchunku wiraqochaykita maskhaq, maymanchá Jehová Diospa espiritunqa* wijch’un orqo patakunamanchus icha wayq’okunamanchus”,+ nispa. Eliseon ichaqa nirqan: “Ama richunkuchu”, nispa. 17 Profetakunaq churinkunan ichaqa kuti-kutirispa nirqanku Eliasta maskhamunankupaq. Chayraykun Eliseoqa nirqan: “Jinapas richunku”, nispa. Jinan paykunaqa kacharqanku chay pisqa chunka qharikunata, paykunaqa kinsa p’unchaymi maskhamurqanku ichaqa manan tarimurqankuchu. 18 Chay qharikuna kutimunankupaqqa Eliseoqa Jericó+ llaqtapin kasharqan. Jinan Eliseoqa paykunata nirqan: “Ama riychischu nishaykichismá riki”, nispa.
19 Tiempowanmi chay llaqta runakunaqa Eliseota nirqanku: “Wiraqocháy, rikusqayki jina kay llaqtaqa allin cheqaspin kashan,+ unun ichaqa mana allinchu, jallp’apas manan allinchu, chaypiqa mijuypas manan wiñanchu”,* nispa. 20 Chayta niqtinkutaq Eliseoqa nirqan: “Apamuwaychis kachita juj mosoq p’ukupi”, nispa. Jinan paykunaqa apamurqanku. 21 Chaymantataq Eliseoqa pujyuman rispa unuq lloqsimusqanman chay kachita jich’aykurqan,+ jinaspa nirqan: “Jehová Diosmi nin: Kay unutan ch’uyanchani. Kay unuwanqa manan pipas wañunqachu, mijuykunapas allintan rurunqa,* nispa”. 22 Chaymi chay unuqa Eliseoq nisqanman jina ch’uya kapurqan, kunan p’unchaykamataqmi chhayna kashan.
23 Chaymantataq Eliseoqa Betel llaqtaman rirqan. Chay llaqtaman ñanninta rishaqtintaq askha erqekuna llaqtamanta lloqsimurqanku, jinaspa Eliseota asipayaspa+ nirqanku: “¡Yau p’aqla uma, seqay! ¡Yau p’aqla uma, seqay!”, nispa. 24 Jinan Eliseoqa qhepanta qhawarikuspa chay erqekunata Jehová Diospa sutinpi ñakarqan. Chayllamanmi sach’a-sach’amanta iskay china osokuna lloqsimurqan,+ jinaspa chay erqekunamanta tawa chunka iskayniyoq erqekunata wañuchirqan.+ 25 Chay llaqtamantataq Eliseoqa Carmelo+ orqomanñataq rirqan, chay qhepamantaq Samaria llaqtaman kutirqan.