2 Crónicas
32 Tukuy chaykunata junt’aq sonqowan Ezequiaspa ruwasqan qhepamanmi,+ Asiria rey Senaquerib jamurqan Judá ayllu contra maqanakuq. Asiria reyqa allin perqasqa llaqtakunatan muyuykurqan, chay llaqtakunata jap’ikapuytapuni munaspa.+
2 Jinan Ezequiasqa Senaqueribpa jamusqanta rikuspa, Jerusalén llaqtamanpas maqanakuq phawaykamuyta munasqanta yacharuspa 3 oficialninkunata soldadonkunata tapurqan imatachus ruwananpaq. Jinan llaqta jawapi kaq pujyukunata wisq’ananpaq yuyaykurqan,+ runankunapas “allinmi” nirqankun. 4 Chaymi askha runakunata juñurqan, jinaspa llapa pujyukunata yarqhakunata* wisq’arqanku, jinallataq chayninta pasaq mayutapas. Paykunan nirqanku: “Unuta wisq’asunchis, Asiria reykuna kayman chayamuqtinku unuta ama tarinankupaq”, nispa.
5 Chaymantapas rey Ezequiasqa thunisqa perqakunatan jujmanta sayarichirqan, chaykunapitaq torrekunata jatarichirqan. Llaqta jawapipas juj perqatawanmi muyuriqta jatarichillarqantaq. Chaymantapas Davidpa Llaqtan nisqapin Miló* nisqa moqota+ allinta allicharqan, maqanakuna armakunatapas jark’apakuna escudokunatapas askhatan ruwachirqan. 6 Chaymantataq runakunata umallinanpaq soldadokunata churarqan, paykunatataq punkuq ladon plazapi juñurqan, jinaspa khaynata kallpacharqan:* 7 “Kallpachakuychis, ama manchakuychischu. Asiria reytapas+ paywan jamuq askha runakunatapas ama manchakuychischu nitaq khatatataychispaschu.* Payta yanapaqkunaqa pisillan, noqanchista yanapawaqninchiskunan ichaqa aswan askha kashan.+ 8 Jinaspapas payqa runakunaq kallpallanpin confiashan, noqanchiswanmi ichaqa Jehová Diosninchis kashan, paymi kay maqanakuyta atipananchispaq yanapawasun”,+ nispa. Judá ayllu rey Ezequiaspa rimasqanta uyarispataq llapa runakunaqa kallpachakurqanku.+
9 Chay p’unchaykunaqa Lakís llaqtapin+ Asiria rey Senaqueribqa llapa kallpasapa soldadokunantin kasharqan. Chaypi kashaspan kamachinkunata kacharqan rey Ezequiasman Jerusalén llaqtapi kashaq llapa Judá ayllu runakunamanpas,+ chay kamachinkunan nirqanku:
10 “Asiria rey Senaqueribmi kayta nisunkichis: Jerusalén llaqtaqa ñan muyuykusqaña kashan, ¿imapi confiaspan qankuna kay llaqtapi thaj kashankichis?+ 11 Ama Ezequiaswanqa engañachikuychischu, payqa yanqan nishasunkichis: Jehová Diosninchismi Asiria reypa makinmantaqa salvawasun, nispa. Payqa yarqaymanta ch’akiymantan wañuchisunkichis.+ 12 ¿Manachu payllataq yupaychana patakunatapas,*+ Diosniykichispa altarninkunatapas+ thunirqan? Jinaspataq Judá ayllu runakunatapas Jerusalenpi tiyaq runakunatapas nirqan: Kay altarpa ñaupallanpin k’umuykunkichis, kay altar patallapin sacrificio apamusqaykichistapas jaywankichis,+ nispa. 13 ¿Manachu uyarirqankichis imaynatachus juj llaqtakunata atipasqaykuta?+ Ñaupa taytaykunapas noqapas llapa llaqtakunatan atiparqayku. Chay nacionkunaq diosninqa manan mayqenpas llaqtankutaqa makiymanta salvayta atirqankuchu.+ 14 Niwaychisyá, ¿mayqen diosmi ñaupa taytaykunaq makinmantapas noqaq makiymantapas llaqtanta salvarqan? ¿Chaychu kunan Diosniykichis makiymanta salvasunkichisman?+ 15 ¡Ama Ezequiaswanqa engañachikuychischu!+ Ama paypa nisqanpiqa confiaychischu. Manataq mayqen diospas makiymantapas ñaupa taytaykunaq makinmantapas llaqtanta salvayta atirqanchu chayqa, ¡astawanraqchá qankunaq Diosniykichisqa mana salvayta atisunkichischu!,+ nispa”.
16 Rey Senaqueribpa kamachinkunaqa imaymanatawanraqmi rimarqanku Jehová Dios contra, cheqaq Diospa kamachin Ezequías contra ima. 17 Chaymantapas cartakunatan qelqarqan,+ chay cartakunapin Israelpa Diosnin Jehová Diosta k’amirqan,+ pay contrataq millayta rimarqan. Chay cartapin nirqan: “Imaynan juj dioskunapas llaqtanta mana salvayta atirqanchu makiymanta,+ chhaynatan Ezequiaspa Diosninpas llaqtanta mana salvayta atinqachu”, nispa. 18 Jerusalén llaqtaq perqan patapi kashaq runakunatapas rimasqanku simipin alto kunkawan imaymanata nirqanku, chhaynapi mancharikunankupaq, jinaspa paykunata atipaspa llaqtankuta jap’ikapunankupaq.+ 19 Asiria runakunaqa Jerusalenpa Diosnin contran rimarqanku kay pacha runakunaq ruwasqan diospas kanman jinata. 20 Rey Ezequiasmi ichaqa Amozpa churin profeta Isaiaspiwan+ janaq pacha Diospa yanapayninta mañakurqanku.+
21 Jinan Jehová Diosqa juj angelninta kachamurqan, chay angelmi wañuchirqan Asiria reypa llapa kallpasapa soldadonkunata,+ oficialninkunata juj umallinkunatawan. Asiria reytaq p’enqasqa llaqtanman kutipurqan. Chay qhepamantaq wakin wawankuna Asiria reyta espadawan wañuchipurqanku diosninpa templonpi kashaqtin.+ 22 Chhaynatan Jehová Diosqa Ezequiastapas Jerusalén llaqtapi tiyaq runakunatapas salvarqan Asiria rey Senaqueribpa makinmanta. Chaymantapas juj enemigonkuq makinmantan paykunata salvarqan, chhaynapin thaj tiyapurqanku. 23 Jinan runakunaqa Jerusalén llaqtaman jamuspa Jehová Diosman regalokunata apamurqanku, Judá ayllu rey Ezequiasmanpas valorniyoq cosaskunatan apamurqanku.+ Chay qhepamanmi rey Ezequiasqa llapa nacionkunapi allin respetasqa kapurqan.
24 Chay p’unchaykunapin rey Ezequiasqa onqopurqan, jinaspa wañunan patapiña kasharqan. Ezequiasmi ichaqa Jehová Diosmanta mañakurqan,+ jinan Diosqa mañakusqanta kutichispa juj señalta qorqan.+ 25 Chhaynataña Dios yanaparqan Ezequiasta chaypas, payqa manan agradecekurqanchu, aswanmi sonqonpi jatunchakuyta qallarirqan. Chaymi Diosqa Ezequiaspaqpas, Judá ayllu runakunapaqpas, Jerusalenpi tiyaq runakunapaqpas sinchita phiñakurqan. 26 Qhepamanmi ichaqa Ezequiaspas Jerusalén llaqtapi tiyaq runakunapas Diospa ñaupanpi juch’uyaykukurqanku.+ Chaymi Jehová Diosqa Ezequiaspa kausasqan p’unchaykunapiqa manaña paykunapaq phiñakurqanchu.+
27 Ezequiasqa allin reqsisqa qhapaq runan kapurqan.+ Chaymi waqaychana wasikunata ruwarqan+ qolqepaq, qoripaq, ancha valorniyoq munay rumikunapaq, bálsamo aceitepaq, escudokunapaq, tukuy valorniyoq cosaskunapaqwan. 28 Chaymantapas waqaychana wasikunatan ruwallarqantaq mijuykunapaq, mosoq vinopaq, aceitepaq ima. Ruwallarqantaqmi wakankunapaq, ovejankunapaq, llapa uywankunapaq wasi jina kanchakunatapas. 29 Chaymantapas Ezequiasqa llaqtakunatan jatarichirqan; wakankunapas, ovejankunapas, juj uywankunapas askhapunin karqan. Tukuy chaykunataqa Diosmi qorqan. 30 Ezequiasmi Guihon+ pujyumanta lloqsimuq unuta wisq’arqan,+ jinan chay unuta apaykamurqan inti jaykuy ladoman Davidpa Llaqtan+ nisqaman. Chhaynatan Ezequiasqa tukuy imatapas allintapuni ruwarqan. 31 Juj p’unchaymi Babilonia umallikuna kamachinkunata Ezequiasman kacharqanku, Judá ayllupi pasasqan+ señalmanta tapumunankupaq.+ Chay kutipin Diosqa sapallanta Ezequiasta saqerqan pruebaman churananpaq,+ chhaynapi imachus sonqonpi kasqanta lliuta yachananpaq.+
32 Ezequiaspa wakin ruwasqankunapas, may munakuywan* allin ruwasqankunapas+ Amozpa churin profeta Isaiaspa qelqasqankunapin qelqasqa kashan,+ chaykunaqa lliumi qelqasqa kashan Judá ayllu reykunamanta Israel reykunamanta willaq libropi.+ 33 Chaymantataq Ezequiasqa ñaupa taytankuna jina wañukapurqan, p’ampapurqankutaq Davidpa churinkunaq sepulturanman wichana qhatapi.+ Ezequías wañupuqtinqa llapa Judá ayllu runakunan Jerusalén llaqtapi tiyaq runakunan jatuncharqanku. Chay qhepamantaq churin Manasés rey kapurqan.