Zacarías
14 “¡Qhawariychis! Jehová Diospa p’unchayniymi chayamushanña, chay p’unchaymi qanpa* kaqniykikunaqa qechusqa kanqa, ñaupaykipin rakinakunqaku. 2 Llapa nacionkunatan juñusaq Jerusalén contra maqanakunankupaq. Llaqtatan jap’ikapunqaku, wasikunaman jaykuspan imaymanata apakapunqaku, warmikunatan violanqaku. Llaqtapi tiyaqkunamanta kuskanmi apasqa kanqaku, qhepaqkunan ichaqa llaqtamanta mana chinkachisqachu kanqaku.
3 ”Jehová Diosmi lloqsimuspa chay nacionkuna contra maqanakunqa,+ maqanakuy p’unchaypi jinan maqanakunqa.+ 4 Chay p’unchaymi chakinqa Olivos orqo+ patapi kashanqa, chay orqoqa kashan Jerusalenpa chimpanpin, inti lloqsimuy ladopi. Olivos orqoqa iskaymanmi ch’eqtasqa kanqa, inti lloqsimuy ladomanta inti jaykuy ladoman, ancha jatun wayq’omanmi tukunqa, kuskanmi wichay ladoman suchunqa, kuskantaq uray ladoman. 5 Qankunaqa chay orqoykunaq wayq’onmanmi ayqekunkichis, chay wayq’oqa Azelkaman chayanqa. Imaynan Judapi rey Uzías+ kamachikushaqtin terremoto kasqanrayku ayqekurqankichis, chhaynatan ayqekunkichis. Jehová Diosniymi jamunqa, paywanmi llapa ch’uya kaqkunaqa kashanqa.+
6 ”Chay p’unchayqa manan sumaq k’anchay kanqachu,+ imapas manan kuyuripunqachu.* 7 Chay p’unchaymi Jehová Diospa p’unchaynin nisqa kanqa.+ Manan tutapas p’unchaypas kanqachu, tutayaykuytapas k’anchaymi kanqa. 8 Chay p’unchaymi Jerusalenmanta+ kausay unu phawamunqa,+ kuskanmi rinqa inti lloqsimuy lado qochaman,*+ kuskantaq inti jaykuy lado lamar-qochaman.*+ Q’oñi tiempopipas chiri tiempopipas chhaynan kanqa. 9 Jehová Diosllan pachantinta kamachikuqqa kanqa.+ Chay p’unchayqa Jehová Diosllatan+ adoranqaku, sutillanmi jatunchasqa kanqa.+
10 ”Suyuntinmi Guebamanta+ Jerusalenpa uray ladonpi Rimonkama+ Arabá+ pampa jina kapunqa. Jerusalenqa aswan wichaypin kapunqa, runakunan chaypi tiyapunqaku+ Benjamín Punku+ nisqamanta Esquina Punku nisqakama, maypichus Ñaupaq Punku nisqa kashan chaykama, Ananel Torre+ nisqamanta reypa uvas sarunankama. 11 Jerusalenqa manañan thunisqa kananpaq ñakasqañachu kanqa,+ runakunan chaypi tiyanqaku, thajmi kausanqaku.+
12 ”Jehová Diosmi wañuy onqoywan castiganqa Jerusalén contra maqanakuq llapa llaqtakunata.+ Sayashallaqtinkuraqmi aychankuqa ismupunqa, ñawinkupas kikin ñawi t’oqonkupin ismupunqa, qallunkupas siminkupin ismupunqa.
13 ”Chay p’unchaymi Jehová Diosqa sinchi manchakuyta paykunaman chayachimunqa, sapankankun runamasinku contra jatarinqaku, paykunapuran maqanakunqaku.+ 14 Jerusalenpi guerra kaqtinmi Judá runakunapas chaypi maqanakunqaku, jinaspan apakapunqaku muyuriqninpi kaq nacionkunaq qhapaq kayninta. Ancha askhatan qoritapas, qolqetapas, p’achatapas apakapunqaku.+
15 ”Wañuy onqoymi jap’illanqataq caballokunatapas, mulakunatapas, camellokunatapas, asnokunatapas, enemigokunaq karpa-karpankupi kaq llapa uywakunatapas.
16 ”Llapa Jerusalén contra sayariq nacionkunamanta puchuqkunan sapa wata+ Jerusalenman wichamunqaku ejercitokunata kamachiq rey Jehová Diosta yupaychanankupaq,+ Ch’ujlla Ruway Fiestata ruwanankupaq+ ima. 17 Sichus kay pachapi suyukunamanta pi runallapas mana Jerusalenman wichamunqachu ejercitokunata kamachiq rey Jehová Diosta yupaychaq chayqa, manan paypaq para kanqachu.+ 18 Sichus Egipto runakuna mana wichamunqakuchu, llaqtamanpas mana jaykunqakuchu chayqa, manan paykunapaqpas para kanqachu. Aswanpas Ch’ujlla Ruway Fiestata ruwanankupaq mana wichamuq nacionkunata jinan Jehová Diosqa wañuy onqoywan castiganqa. 19 Chaymi Ch’ujlla Ruway Fiestaman mana wichamusqankumanta castigo kanqa Egiptopaq lliu nacionkunapaqpas.
20 ”¡Ch’uya kayqa Jehová Diospan!,+ nisqa simikunan chay p’unchay caballokunaq campanillanpi qelqasqa kanqa. Jehová Diospa wasinpi kaq mankakunapas+ altarpa ñaupanpi jatun p’ukukuna+ jinan kanqa. 21 Jerusalenpi Judapi kaq mankakunaqa ch’uyan kapunqa, ejercitokunata kamachiq Jehová Diospan kapunqa, llapa sacrificiota jaywaqkunan jaykuspa wakin mankakunapi wayk’unqaku. Chay p’unchayqa manañan ejercitokunata kamachiq Jehová Diospa wasinpiqa+ Canaán runakuna* kanqañachu”.