Números
24 Jehová Dios Israelta bendeciy munasqanta reparaspan Balaamqa manaña layqa señalkunata maskharqanchu,+ aswanmi ch’in ladoman kutirirqan. 2 Chay ladota qhawarispanmi Israel runakunata rikurqan ayllu-ayllu karpasqata.+ Chayllamanmi Diospa espiritun*+ Balaamman junt’aykurqan. 3 Jinan Balaamqa khaynata rimarqan:+
“Kayqa Beorpa churin Balaampa siminmi,
kayqa ñawin kichasqa runaq willakusqanmi,
4 paymi Diospa siminta uyarirqan,
paymanmi tukuy atiyniyoqqa juj rijuriyta rikuchirqan,
paymi ñawin kichasqalla pampakama k’umuykurqan.+
5 ¡Ima munaymi karpaykikunaqa Jacob!
¡Ima munaymi maypichus tiyasqaykiqa Israel!+
6 Wayq’okuna jinan mast’arisqa kashan,+
mayu patapi huertakuna jinan kashan,
Jehová Diospa plantasqan áloe sach’akuna jinan kashan,
unu patapi cedro sach’akuna jinan kashan.
7 Iskaynin qara baldenmantan unuqa sut’uykamushan,
mujunkunaqa mayu patapin tarpukun.+
8 Diosmi paytaqa Egiptomanta pusamushan.
Diosqa salqa toroq waqran jinan paykunapaqqa.
Paymi ñak’arichiqnin nacionkunata chinkachinqa,+
tullunkunatan k’utunqa, flechankunawanmi flechanqa.
9 Payqa león jinan kumpaykun, león jinan samaykun,
¿leontari pipas turiyanmanchu?
Bendecisqa kachun qanta bendeciqkunaqa,
ñakasqa kachun qanta ñakaqkunaqa”,+ nispa.
10 Balaampa chaykuna nisqanta uyarispan Balacqa sinchita renegarqan, chaymi t’aqllapakusparaq nirqan: “Noqaqa enemigoykunata ñakanaykipaqmi wajachimurqayki,+ qantaq kinsa kutitaña paykunamanta allinta rimaykushanki. 11 Ripuy wasiykita. Noqaqa imaymanatan qanman qonay karqan.+ Ichaqa Jehová Diosmi jark’ashan chaykuna chaskinaykita”, nispa.
12 Balaamtaq Balacta nirqan: “¿Manachu noqaqa kachamuwasqayki runakunata nirqani: 13 Wasin junt’ataña Balac qorita qolqeta qowanman chaypas, manan noqaqa munasqaytachu ruwasaq, aswanpas Jehová Diospa imachus kamachiwasqallantan ruwasaq, nispa? ¿Manachu nirqani: Jehová Diospa imachus niwasqallantan rimasaq, nispa?+ 14 Chhaynaqa kutipusaq llaqtayta. Ichaqa manaraq ripushaspa willasayki imatachus chay llaqta jamuq tiempopi llaqtaykita ruwanqa chayta”, nispa. 15 Jinan Balaamqa khaynata rimallarqantaq:+
“Kaymi Beorpa churin Balaampa willakuynin,
kaymi ñawin kichasqa runaq willakuynin.+
16 Kaymi Diospa siminta uyariq runaq willakuynin,
payqa ancha jatun Diospa yachaynintan chaskirqan,
tukuy atiyniyoq Diospa rijuriy rikuchisqantan rikurqan,
ñawin kichasqa k’umuykushaspan chayta rikurqan.
17 Noqan payta rikusaq, ichaqa manan kunanchu,
noqan payta admirasaq, ichaqa manan kunan ratuchu.
18 Edomqa paypan kapunqa,+
Seirqa+ enemigonkunaq kaqninmi kapunqa,+
Israelqa mana manchakuq kasqantan rikuchinqa.
19 Jacobmantan juj runa lloqsinqa, paymi jujkunata munaychakunqa,+
llaqtapi llapa kausashaqkunatan chinkachinqa”, nispa.
20 Amalecta rikuspan Balaamqa nirqan:
21 Quenita runakunata+ rikuspataq nirqan:
“Wasiykiqa allin waqaychasqan kashan,
maypichus tiyasqaykiqa qaqa patapin kashan.
22 Ichaqa juj runan ruphachinqa quenita runakunata.
¿Jayk’aqtaq Asiria llaqtaqa presota apasunki?”, nispa.
23 Balaammi nillarqantaq:
“¡Ay! ¿Pitaq kausanman Dios chaykunata ruwaqtinri?
Ichaqa paypas chinkachisqan kanqa”, nispa.
25 Chaykunata nispan Balaamqa+ ripurqan. Balacpas kaqtan kutipurqan.