Salmos
Takiqkunata pusariqpaq, Jedutún*+ nisqaman jina. Davidpa takin.
39 Noqan nirqani: “Maymanchus sarusqaytan allinta qhawarikusaq,
chhaynapin qalluyqa mana juchallikunqachu.+
Mayqen millay runapas ñaupaypi kashan chayqa,
simi tapanawanmi simiyta watakusaq”,+ nispa.
2 Manan rimarirqanichu, ch’inllan karqani,+
manan ni allin kaqtapas rimarirqanichu;
nanayniymi ichaqa mana aguantay kasharqan.
3 Sonqoyqa maytapunin rupharisharqan,
piensashaqtiymi llapa cuerpoy raurarirqan,
jinan qalluyqa rimarirqan, nirqanmi:
4 “Diosníy Jehová, imaynachus tukupunayta willaykuway,
jayk’a unaychus kausanayta reparachiway,+
chhaynapin yachasaq kausayniyqa mana unaypaqchu kasqanta.
Mayqen runapas may allinpaqña qhawarikun chaypas, samay jinallan.+ (Séla).
6 Runaq vidanqa llanthu jinallan chinkaripun.
Yanqan kayman jaqayman phawaykachan.
Qhapaq kaykunatapas imata jinaraqmi juñun,
manataq yachanchu pipaqchus chaykuna kanqa chayta.+
7 Chhaynaqa, Jehová Diosnilláy, ¿imatataq suyakuyman?
Qanllan suyakunayqa kanki.
8 Llapa juchaykunamanta kacharichiway.+
Amayá munaychu mana yuyayniyoq runa pisichawanantaqa.
9 Qanpa imachus ruwashasqaykitan yacharqani,+
chaywanmi noqaqa ch’inlla qhepakurqani,
manan simiytapas kichariyta atirqanichu.+
10 Amaña ñak’arichiwaychu.
Castigawasqaykiqa sayk’uchiwanñan.
11 Qanqa juchanmanta castigaspan runataqa wanachinki,+
thuta jinan imaymana waqaychasqanta tukunki.
Allintan reparani: Runaqa samay jinallan.+ (Séla).
12 Diosnilláy Jehová, mañakusqayta uyarimuway,
yanapawanaykipaq auxilio mañakusqayta uyarimuway.+
Weqeykunatapas ama jinallataqa qhawaychu.
13 Kusirikuytan munani, amaña sinchi phiñasqaqa qhawamuwaychu,
manaraq wañupushaqtiy phiñakuyniykita noqamanta ayqerichiy”, nispa.