2 Crónicas
34 Pusaq watayoq kashaspan Josiasqa+ rey kapurqan, kinsa chunka jujniyoq watataq Jerusalenpi kamachikurqan.+ 2 Josiasqa ñaupa taytan David jinan Jehová Diospa munasqanman jina kausarqan, payqa manapunin Diospa ñanninmantaqa t’aqakurqanchu ni lloq’emanpas ni pañamanpas.
3 Josiasqa pusaq wataña kamachikushaspan, waynachallaraq kashaspan, ñaupa taytan Davidpa Diosninta serviyta qallarirqan.+ Chunka iskayniyoq wataña kamachikushaspataq lliu Judá ayllumanta Jerusalén llaqtamantawan wijch’urqan+ yupaychana patakunata,*+ sayashaq k’ullukunata,* idolokunata,+ metalmanta idolokunatapas. 4 Chaymantapas Josiaspa kamachinkunan Baalkunaq altarninkunata paypa ñaupanpi thunirqanku. Jinaspapas Josiasqa incienso q’apachina altarkunatan thunirqan; sayashaq k’ullukunatapas, ruwasqanku idolokunatapas, metalmanta idolokunatapas ñut’umanraqmi tukuchirqan; chaykunatataq chay idolokunata yupaychaqkunaq sepulturan pataman wisñirqan.+ 5 Sacerdotekunaq tulluntataq chay altar patakunapi kanaykurqan,+ chhaynapin Judá ayllumanta Jerusalén llaqtamanta millay ruwaykunata chinkachirqan.
6 Chaymantapas Manasés ayllupi kaq llaqtakunapi, Efraín ayllupi kaq llaqtakunapi,+ Simeón ayllupi kaq llaqtakunapi, Neftalí ayllupi kaq llaqtakunapi, chay llaqtakunaq muyuriqninpi kaq thunisqa wasikunapi iman 7 altarkunata thunirqan. Sayashaq k’ullukunatapas ruwasqanku idolokunatapas+ polvoman tukuchinankaman ñut’urqan. Incienso q’apachina altarkunatapas llapantan Israelmanta chinkachirqan,+ chay qhepamantaq Jerusalén llaqtaman kutipurqan.
8 Chunka pusaqniyoq wataña kamachikushaspan Josiasqa ch’uyanchayta tukurqan Diospa wasintapas llapa Israel naciontapas. Chay qhepamantaq Jehová Diospa wasinta allichanankupaq kacharqan+ Azaliaspa churin Safanta,+ llaqtaq umallin Maseyata, reypa qelqaqnin Joatawan. Joaqa Joacazpa churinmi karqan. 9 Paykunan uma sacerdote Hilquiasman rirqanku, jinaspan Diospa wasinpi juñusqanku qolqeta payman qorqanku. Chay qolqetan punku qhawaq Leví runakuna juñurqanku Manasés ayllumanta, Efraín ayllumanta, wakin Israel runakunamantawan;+ jinallataq Judá ayllumanta, Benjamín ayllumanta, Jerusalén llaqtapi tiyaq runakunamantawan. 10 Chay qolqetataq qorqanku Jehová Diospa wasinta allichaymanta encargakuqkunaman. Chay encargakuqkunataq chay qolqeta qorqanku llank’aqkunaman, chay llank’aqkunataq chay qolqewan Jehová Diospa wasinta allicharqanku. 11 Llank’aqkunataq chay qolqeta qorqanku imaymana ruway yachaq artesanokunaman, wasi ruwaqkunamanpas. Paykunan rantimurqanku thupasqa rumikunata, maderakunata, wasita allichanankupaq vigakunatawan. Chay wasiq vigankunatan cambiarqanku Judá reykuna chay wasita mana allichasqankurayku.+
12 Chay runakunaqa allintan llank’anankuwan junt’arqanku.+ Paykunata umallinankupaqmi churarqanku Leví runakunata, paykunan karqanku: Meraripa mirayninmanta+ Jajwan Abdiaspiwan, Cohatpa mirayninmantataq+ karqanku Zacariaswan Mesulanpiwan. Allin tocaq wakin Leví runakunataq+ 13 umallirqanku q’epispa llank’aqkunata, tukuy imaymanapi llank’aqkunatawan. Wakin Leví runakunataq karqanku secretariokuna, autoridadkuna, punku qhawaqkuna ima.+
14 Jehová Diospa wasinman qolqe apamusqankuta orqoshaspan+ sacerdote Hilquiasqa tarirqan Moisesman Jehová Diospa qosqan kamachikuy qelqata.+ 15 Jinan Hilquiasqa secretario Safanta nirqan: “Kamachikuy qelqatan Jehová Diospa wasinpi tariruni”, nispa. Chaymantataq chay qelqata Safanman qorqan. 16 Jinan secretario Safanqa reyman chay qelqata aparqan, jinaspa nirqan: “Kamachiykikunaqa tukuy imachus nisqaykitan ruwashanku, 17 Jehová Diospa wasinman apamusqanku qolqetapas ñan juñuramunkuña, chaytaqa ñan qonkuña Diospa wasinta allichaymanta encargakuqkunaman, jinallataq Diospa wasinpi llank’aqkunamanpas”, nispa. 18 Safanqa reytan nillarqantaq: “Sacerdote Hilquiasmi kay qelqata qomuwan”,+ nispa. Jinan Safanqa reypa ñaupanpi chay qelqata leerqan.+
19 Reytaq kamachikuy qelqaq nisqanta uyarispa jina p’achanta llik’ikurqan.+ 20 Jinan reyqa Diosta tapumunankupaq kacharqan Hilquiasta, Safanpa churin Aicamta,+ Miqueaspa churin Afdonta, secretario Safanta, kamachin Asayatawan. Paykunatan nirqan: 21 “Phaway riychis noqaq rantiypi, Israel runakunaq rantinpi, llapa Judá ayllu runakunaq rantinpi ima; jinaspa Jehová Diosta tapumuychis kay tarimusqaykichis qelqapi nisqanmanta. Kay qelqapi tukuy nisqantan ñaupa taytanchiskunaqa mana junt’arqankuchu,+ arí, Jehová Diospa simintan mana kasukurqankuchu, chaymi Jehová Diosqa sinchi phiñasqa noqanchispaq kashan”, nispa.
22 Jinan sacerdote Hilquiasqa reypa juj kamachinkunapiwan rirqanku profetisa Huldapa kasqanman.+ Huldapa qosanmi karqan Salum, Salumtaq karqan Ticvapa churin, Ticvataq karqan Araspa churin. Salumqa p’acha waqaychaqmi* karqan. Salumwan Huldawanqa Jerusalén llaqtapi kaq Mosoq Barrio nisqapin tiyarqanku, chaypin reypa kachasqan runakunaqa Huldawan rimarqanku.+ 23 Chaypin Huldaqa paykunata nirqan: “Israelpa Diosnin Jehová Diosmi kachamuqniykichis runata nin: 24 Noqa Jehová Diosmi niyki: Kay llaqtamanmi chaypi tiyaq runakunamanwanmi sinchi llakita apamusaq,+ chay llakikuykuna chayamunanmi qelqasqa kashan Judá ayllu reypa ñaupanpi leesqanku qelqapi.+ 25 Kay llaqta runakunan saqerpariwanku,+ phiñachiwanankupaqtaq juj dioskunaman sacrificiokunata q’osñichishanku,+ chaykunata ruwasqankuraykun kay llaqta runakunaman k’araq phiñakuyniyta chayachimusaq, manataqmi phiñakuyniyqa pasanqachu,+ nispa. 26 Chaymantapas Jehová Diosta tapunaykichispaq kachamuqniykichis Judá ayllu reytan kayta nillankichistaq: Israelpa Diosnin Jehová Diosmi kayta nisunki: Kamachikuy qelqata uyariqtiykin+ 27 sonqoyki llamp’uyarqan, jinaspapas kay llaqta contra rimasqayta uyarispan ñaupaypi k’umuykurqanki. Chayta uyarispan qanqa ñaupaypi juch’uyaykukurqanki, p’achaykitapas llik’ikurqanki, waqarqanki ima. Chaymi mañakusqaykita uyarimuni.+ Chaykunatan noqa Jehová Dios nini. 28 Chayraykun qanqa thajpi wañukapunki, ñaupa taytaykikunawantaq p’ampasqa kapunki, kay llaqtaman chaypi tiyaq runakunaman ñak’ariykuna chayachimusqaytapas manan rikunkichu,+ nispa”.
Jinan chay runakunaqa uyarisqankuta reyman willaq kutipurqanku. 29 Jinan rey Josiasqa llapa umalliqkunata* wajachirqan, Judá ayllupi kaqkunatapas Jerusalén llaqtapi kaqkunatapas.+ 30 Chaymantataq Jehová Diospa wasinman rirqan llapa Judá ayllu runakunawan, Jerusalén llaqta runakunawan, sacerdotekunawan, Leví runakunawan ima; llapankupunin rirqanku jatunpas juch’uypas. Chaypin Josiasqa Jehová Diospa wasinpi tarisqanku rimanakuy qelqata leerqan.+ 31 Chaymantataq reyqa maypichus sayananpi sayaykurqan, jinaspa Jehová Dioswan rimanakurqan.*+ Chaypin payqa prometekurqan kamachikuy qelqaq nisqanman+ jina Jehová Diosllata servinanpaq, kamachikuyninkunatapas, yuyarichiyninkunatapas,* yachachikuyninkunatapas tukuy sonqonwan tukuy almanwan* kasukunanpaq.+ 32 Chaymantapas rey Josiasqa llapa Jerusalén llaqtapi tiyaqkunata Benjamín ayllupi tiyaqkunatan kallpacharqan Dioswan rimanakusqankuta junt’anankupaq. Jinan Jerusalenpi tiyaq runakunaqa ñaupa taytankuq Diosninpa kamachikusqanman jina ruwarqanku.+ 33 Josiasqa Diospa cheqnisqan idolokunatan llapa Israelmanta chinkachirqan,+ llapa Israel runakunatataq kallpacharqan Jehová Diosllata servinankupaq. Josiaspa kausasqan p’unchaykunapiqa ñaupa taytankuq Diosnin Jehová Diosllatan Israel runakunaqa servirqanku.