Éxodo
32 Moisesqa manan usqhaychu orqomanta kutiykamurqan,+ chayta rikuspan Israel runakunaqa Aaronta muyuykuspa nirqanku: “Imachá pasakun Egipto jallp’amanta pusamuwaqninchis Moisestaqa, manan chay runamantaqa imatapas yachaykuchu. Chayrayku juj diosta ruwapuwayku ñaupanchista rispa pusawananchispaq”,+ nispa. 2 Jinan Aaronqa paykunata nirqan: “Warmiykichiskunaq, qhari wawaykichiskunaq, warmi wawaykichiskunaq qori aretenkunata+ orqospa apamuwaychis”, nispa. 3 Jinan llapa runakuna qori aretenkuta orqokuspa Aaronman aparqanku. 4 Aarontaq chay qorimanta torilloman rijch’akuq idolota ruwarqan,+ cincelwanmi chayta ruwarqan. Chaytan runakunaqa nirqanku: “Israel runakuna, kaymi Diosninchisqa, kaymi Egiptomanta pusamuwaqninchisqa”,+ nispa.
5 Chayta rikuspan Aaronqa chay torilloq ñaupanpi juj altarta ruwarqan, jinaspa nirqan: “Paqarinmi Jehová Diospaq fiestata ruwasunchis”, nispa. 6 Qhepantin p’unchaytaq runakunaqa tutallamanta jatarispa ruphachina ofrendata sumaq kausay sacrificiokunatawan jaywayta qallarirqanku. Jinaspa mijuq ujaq tiyaykurqanku, chaymantataq cuerponku kusirichiq sayarirqanku.+
7 Jinan Jehová Diosqa Moisesta nirqan: “Uraykuy, Egiptomanta pusamusqayki runakunan, llaqtayki runakunan mana allin ruwayman urmapunku.+ 8 ¡Manaraq imapin paykunaqa purinankupaq kamachisqay ñanmanta t’aqakapunku!+ Torilloman rijch’akuq idolota ruwakuspan chayman qonqoriykushanku. Chaymanmi sacrificiokunatapas jaywashanku: Israel runakuna, kaymi Diosninchisqa, kaymi Egiptomanta pusamuwaqninchisqa, nispanku”, nispa. 9 Jehová Diosqa nillarqantaqmi: “Kay runakunaqa mana kasukuq sinchi k’ullun kanku.+ 10 Sinchi phiñasqan paykunapaq kashani, ama jark’awaychu wañurqarichisaqmi, jinaspan qanmanta juj jatun nacionta sayarichisaq”,+ nispa.
11 Chayta uyarispan Moisesqa Jehová Diosninta+ valekurqan: “Jehová Diosníy, amapuni k’araq phiñakuyniykitaqa kay llaqtaykiman kachariychu. ¿Egiptomanta ancha atiywan imaymana milagrokunawan orqomushaspaykichu kunan chayta ruwawaq?+ 12 Chayta ruwanki chayqa Egipto runakunachá ninkuman: Diosninkuqa mana allinninkuta munaspachá chay llaqtataqa pusarqan. Kay pachamanta chinkachiyta munaspachá orqo-orqoman pusarqan chaypi wañuchinanpaq,+ nispa. Chhaynaqa amaña phiñakuychu, amaña llaqtaytan chinkachisaq niyñachu. 13 Kamachiyki Abrahanman, Isaacman, Israelmanwan jurasqaykita yuyariy, paykunamanmi sutiykita oqarispa jurasqanki: Mirayniykichistan cielopi ch’askakunata jinaraq askhaman tukuchisaq,+ mirayniykichismanmi lliu kay ajllasqay jallp’ata qopusaq, paykunaqmi chay jallp’aqa kapunqa,+ nispa”.
14 Chaywanmi Jehová Diosqa cambiapurqan llaqtanpaq imachus piensasqanta, manañan chinkachiyta munarqanchu.+
15 Chaymantataq Moisesqa orqomanta uraykamurqan rimanakuy iskaynin p’alta rumikuna+ apaykusqa.+ Chay rumikunaqa iskaynin uyanpi qelqasqan kasharqan. 16 Chay p’alta rumikunaqa Diospa ruwasqanmi karqan, chaypi qelqasqakunapas Diospa qelqasqanmi karqan.+ 17 Josuemi runakunaq ch’aqwasqanta qaparisqanta uyarispa Moisesta nirqan: “Guerrapi jinan karpa-karpapi runakuna qaparimushanku”, nispa. 18 Moisestaq nirqan:
“Manan chayqa atipaqkunaq takinchu,
nitaqmi atipasqakunaq waqayninchu.
Jujniray takitan noqaqa uyarishani”, nispa.
19 Karpa-karpaman qayllaykuspan Moisesqa rikurqan torillo rijch’ay idolota,+ tusuqkunata ima. Chayta rikuspan payqa sinchita phiñakurqan, jinaspa apaykamusqan tablakunata pampaman ch’aqerqan, chhaynapin orqo k’uchupi llapanta ñut’urqan.+ 20 Chaymantataq Moisesqa ruwasqanku qori torillota jap’ispa ninapi kanaykurqan, jinaspa lliuta ñut’urqan, polvomanraqmi tukuchirqan.+ Chaytataq unuman jich’aykuspa Israel runakunaman tomachirqan.+ 21 Jinaspataq Moisesqa Aaronta nirqan: “¿Imaraykun kay llaqtata khayna jatun juchaman urmachirqanki?”, nispa. 22 Jinan Aaronqa nirqan: “Ama phiñakuychu wiraqocháy. Yachasqayki jinapas kay llaqtaqa mana allinllatapunin ruwan.+ 23 Paykunan niwanku: Imachá pasakun Egipto jallp’amanta pusamuwaqninchis Moisestaqa,+ manan chay runamantaqa imatapas yachaykuchu. Chayrayku juj diosta ruwapuwayku ñaupanchista rispa pusawananchispaq, nispa. 24 Chaymi noqaqa nirqani: Pipas qoriyoqqa orqokuspa apamuwachun, nispa. Chaymantataq chay qorita ninaman wijch’uykurqani, jinan chay qori torillo lloqsiramun”, nispa.
25 Moisestaq rikurqan Aaronpa mana jark’asqan causa runakunaqa comunta imatapas ruwashasqankuta. Chay causan paykunaqa enemigonkuq asipayasqanpas karqanku. 26 Karpa-karpaman jaykunapi sayaykuspan Moisesqa nirqan: “¿Pikunan Jehová Dioswan kashanku? ¡Noqaman jamuchunku!”,+ nispa. Jinan Leví ayllu runakunaqa llapanku payman juñukurqanku. 27 Paykunatan Moisesqa nirqan: “Israel runakunaq Diosnin Jehová Diosmi nin: Sapankaykichis espadaykichista jap’ispa lliu karpa-karpata purimuychis,* jinaspa llapa juchallikuqkunata wañuchimuychis wayqeykichisña, wasimasiykichisña, amigoykichisña kaqtinpas,+ nispa”. 28 Leví runakunaqa Moisespa nisqanman jinan ruwarqanku, chaymi chay p’unchayqa kinsa waranqa runakuna jina wañurqanku. 29 Chaymantataq Moisesqa paykunata nirqan: “Jehová Diosta servinaykichispaq t’aqakuychis. Qankunaqa Diosta kasukuspan wawaykichiskuna wayqeykichiskuna contra sayarirqankichis.+ Paymi kunan bendicionninta qosunkichis”,+ nispa.
30 Qhepantin p’unchaytaq Moisesqa Israel runakunata nirqan: “Sinchitapunin qankunaqa juchallirukunkichis. Chaymi kunan orqota wichasaq Jehová Diosmanta qankunapaq mañakuq, ichapas kay juchaykichista perdonasunkichisman”,+ nispa. 31 Jinan Moisesqa orqoman wichaspa Jehová Diosta nirqan: “¡Sinchitan Diosníy kay runakuna juchallikunku! ¡Qorimanta idolotan ruwarukusqaku!+ 32 Munanki chayqa perdonaykuy juchankuta.+ Mana chayqa qelqasqayki qelqamanta sutiyta borrapuway”,+ nispa. 33 Jehová Diosmi ichaqa nirqan: “Noqaqa pichus noqa contra juchallikurqan chaypa sutillantan borrasaq. 34 Kunanqa phaway riy, jinaspa maymanchus nirqayki chayman chay runakunata pusay. Angelniymi ñaupaykita rinqa.+ Noqaqa maypachachus paykunamanta cuentata mañasaq chayñan paykunataqa castigasaq”, nispa. 35 Chaymantataq Jehová Diosqa Israel runakunata castigarqan Aaronwan qori torillo ruwachisqankumanta.