1 Corintios
12 Wayqeykuna,* santo espirituq qosqan atiykunamanta tapukamuwasqaykichismantapas+ allintan yachanaykichista munani. 2 Qankunaqa manaraq iñiq kashaspaykichisqa upa idolokunata adoraywanmi sonqoykichista suwachikurqankichis ¿riki? Chayman pantachisqan karqankichis,+ paykunaq apaykachasqantaqmi karqankichispas ¿riki? 3 Chayraykun kayta yachanaykichista munani: Pipas Diospa espiritunwan pusachikuqqa manan jayk’aqpas ninmanchu: “Jesusqa ñakasqa kachun”, nispaqa; manataqmi pipas ninmanchu: “Jesusqa Señormi”, nispaqa manachus santo espíritu paywan kashan chayqa.+
4 Imaymana atiykunan kan, ichaqa juj espiritullan chaykunataqa qon.+ 5 Dios serviypipas imaymana ruwaykunan kan,+ ichaqa juj Señorllapaqmi chaykunaqa. 6 Imaymana ruwaykunan kan, ichaqa juj Diosllan llapaman atiyta qon chaykunata ruwanankupaq.+ 7 Sapankapin espirituqa sut’ita rikuchikun lliu runaq allinninpaq.+ 8 Chay espiritun wakinman atiyta qon yachaywan rimananpaq, wakinmantaq atiyta qon mana piqpa yachasqanta rimananpaq, 9 chay espiritullataqmi wakinmanpas atiyta qon iñiyniyoq kananpaq,+ wakinmantaq atiyta qon qhaliyachiq kananpaq,+ 10 wakinmantaq atiyta qon milagrokunata* ruwananpaq,+ wakinmantaq atiyta qon profetizananpaq, wakinmantaq atiyta qon ima willakuypas Diosmantachus jamushan icha manachus chayta reparananpaq,+ wakinmantaq atiyta qon juj simikunapi rimananpaq,+ wakinmantaq atiyta qon juj rimaykunata t’ijrananpaq.+ 11 Tukuy chay atiykunataqa kaq espiritullan qon, arí, sapankamanmi munasqanman jina rakin.
12 Cuerpoqa askha parteyoqña chaypas jujllan, jinallataq askha partekunaña kan chaypas juj cuerpolla kan,+ chhaynallataqmi Cristoq cuerponpas. 13 Judiokunapas, griegokunapas, kamachikunapas, libre kaqkunapas, arí, llapanchispas juj espiritullawanmi bautizasqa karqanchis chhaynapi juj cuerpolla kananchispaq; llapanchismi santo espiritutapas chaskirqanchis.
14 Cuerpoqa manan juj partellayoqchu, aswanpas askha partekunayoqmi.+ 15 Chakichus ninman: “Manataq makichu kani chayqa, manan cuerpoq partenchu kani”, nispa chayqa, ¿chayraykuchu mana cuerpoq parten kanman? 16 Ninrichus ninman: “Manataq ñawichu kani chayqa, manan cuerpoq partenchu kani”, nispa chayqa, ¿chayraykuchu mana cuerpoq parten kanman? 17 Llapa cuerpochus ñawilla kanman chayqa, ¿imawantaq uyarisunmanri? Llapa cuerpochus ninrilla kanman chaypas, ¿imawantaq muskhisunmanri? 18 Chayraykun Diosqa cuerpoq partenkunataqa munasqanman jina maypichus kananman churarqan.
19 Cuerpoq llapa partenkunachus igual-lla kanman chayqa, ¿imaynataq cuerpori kanman? 20 Askha partekunaña kan chaypas, jujllan cuerpoqa. 21 Manan ñawiqa makita ninmanchu: “Manan necesitaykichu”, nispaqa ¿riki?, manallataqmi umapas chakita ninmanchu: “Manan necesitaykichu”, nispaqa ¿riki? 22 Aswanpas pisipaq qhawarisqanchis partekunapas necesitakunmi. 23 Cuerponchispi mana ancha munaypaqchu qhawasqanchiskunatapas aswan allintan cuidanchis,+ chhaynapitaq mana qhawachina kaqkunataqa aswan sumaqta cuidanchis; 24 aswan munay partenchiskunan ichaqa mana imatapas necesitanchu. Chhaynatan Diosqa cuerpota tupachirqan mana allin qhawarisqa partekunata aswan sumaqpaq qhawarichispa, 25 chhaynapi cuerpo ama t’aqanasqa kananpaq, aswanpas partenkuna sumaqta qhawarinakunankupaq.+ 26 Jujnin partechus ñak’arin chayqa, llapankun paywan kuska ñak’arinku;+ jujninku jatunchasqa kaqtinpas, llapankun paywan kuska kusikunku.+
27 Chhaynan qankunapas Cristoq cuerpon kankichis,+ arí, sapankaykichismi cuerponpa partenkuna kankichis.+ 28 Diosmi iñiq t’aqapi churan ñaupaqta apostolkunata,+ chaymanta profetakunata,+ chaymantataq yachachiqkunata,+ milagro ruwaqkunata,+ qhaliyachinankupaq atiy* chaskiqkunata,+ yanapakuqkunata, umalliy yachaqkunata,+ waj simikuna rimaqkunata ima.+ 29 Manan llapachu apostolkuna, profetakuna, yachachiqkuna, milagro ruwaqkunapas kanku ¿riki? 30 Manan llapachu qhaliyachinapaq atiytaqa chaskirqanku ¿riki? Manan llapachu waj simikuna rimaytaqa yachanku+ ¿riki? Manan llapachu waj simiman t’ijraqkunapas kanku+ ¿riki? 31 Ichaqa tukuy sonqo kallpachakushallaychis jatun kaq atiykunata chaskinaykichispaq.+ Aswan allin ñantan reqsichillasaykichistaq.+