Amós
2 ”Jehová Diosmi nin:
Moab suyuq+ kinsa juchanmanta, tawa juchanmantan imachus piensasqayta mana cambiasaqchu.
Edom reypa tullunkunatan usphaman tukuchinankama ruphachirqan.
2 Chayraykun Moab suyuta kanaykusaq,
Queriyoj llaqtaq+ allin perqasqa torrenkunatan ruphaykachisaq.
Moabqa ch’aqway chaupipin wañunqa,
guerrapaq qapariy chaupipin, waqra tocay chaupipin chinkachisqa kanqa.+
3 Moabmantan kamachiqta* wijch’usaq,
llapa umallinkunatapas kamachiqtawan kuskan wañuchisaq,+ nispa. Jehová Diosmi chayta nin.
4 Jehová Diosmi nin:
Judapa kinsa juchanmanta,+ tawa juchanmantan imachus piensasqayta mana cambiasaqchu.
Paykunaqa cheqnikurqankun Jehová Diospa leyninta,
kamachikuyninkunatapas manan kasukurqankuchu.+
Paykunaqa ñaupa taytankuq creesqan llullakuykunallapi creespan pantarqanku.+
5 Chayraykun Judata kanaykusaq,
Jerusalén llaqtaq allin perqasqa torrenkunatapas ruphaykachisaqmi,+ nispa.
6 Jehová Diosmi nin:
Israelpa kinsa juchanmanta,+ tawa juchanmantan imachus piensasqayta mana cambiasaqchu.
Paykunaqa chanin runatan qolqepaq venderqanku,
wajcha runatataq iskay usut’allapaq venderqanku.+
7 Wajchakunatan* jallp’a pampapi sarunchanku.+
K’umuykukuq runakunapaq justicia ruwakunantan jark’anku.+
Taytantin churintinmi juj warmillawan puñunku,
chayta ruwaspan ch’uya sutiyta qhellichanku.
8 Prendapi saqesqa+ p’acha patapin llapan altarkunaq+ ladonpi kumparayanku.
Runakunamanta qolqe ch’utisqankuwan vinota rantikuspan diosninkuq wasinpi vinota ujanku.
9 Noqamá riki amorreo runakunataqa paykunaq ñaupanmanta ch’usaqyachirqani.+
Amorreo runakunaqa cedro sach’a jina jatunkunan karqanku, roble sach’a jina mana p’akikuqmi karqanku.
Rurunkunatapas chinkachipurqanin, saphinkunatapas t’irarqanin.+
10 Noqan qankunataqa Egiptomanta orqomurqaykichis,+
tawa chunka watan ch’inneqninta pusarqaykichis,+
amorreo runakunaq jallp’anta jap’ikapunaykichispaqmi pusarqaykichis.
11 Wakin wawaykichistan profeta kanankupaq ajllarqani,+
wakin waynaykichistataq nazareo* runakuna kanankupaq ajllarqani,+
Israel runakuna, ¿chhaynan karqan riki?, nispa. Jehová Diosmi chayta nin.
12 Diosmi nin: Qankunan ichaqa nazareo runakunaman vinota tomachirqankichis,+
profetakunatataq, ama profetizaychischu,+ nirqankichis.
13 Maypichus kasqaykichispin p’altataraq sarusaykichis,
imaynan trigo cargayoq carreta imatapas ñut’uta sarun chhaynatan sarusaykichis.
14 Usqhaylla phawaqpas manan maymanpas ayqenqachu,+
kallpasapa runaqpas manan kallpan kapunqachu,
manan mayqen maqanakuqpas kausashaqqa qhepanqachu.
15 Flechawan maqanakuqpas manan maqanakuyta atinqachu,
usqhaylla phawaqpas manan escapayta atinqachu,
caballopi sillasqa soldadopas manan kausashaqqa qhepanqachu.
16 Mana manchakuspa aswan allin maqanakuqpas
q’alallan chay p’unchayqa ayqekunqa,+ nispa. Jehová Diosmi chayta nin”.