2 Crónicas
16 Kinsa chunka soqtayoq wataña Judá ayllupi Asá kamachikushaqtinmi Israel rey Basaqa+ Judá ayllu contra jatarirqan, jinaspa Ramá llaqtata+ aswan allinta sayarichiyta qallarirqan, chhaynapi Asapa kamachisqan Judá aylluman+ ama pipas jaykunanpaq nitaq pipas chaymanta lloqsinanpaq. 2 Chaymi Asaqa Jehová Diospa wasinpi valorniyoq cosaskuna waqaychanamanta, reypa wasinpi* valorniyoq cosaskuna waqaychanamantawan qorita qolqeta orqospa+ Siria rey Ben-Adajman apachirqan.+ Chay tiempopaqqa Damasco llaqtapin Ben-Adajqa tiyasharqan, paytan Asaqa nirqan: 3 “Yachasqayki jina, noqanchisqa iskayninchismi rimanakurqanchis, papaykipas papaywanmi rimanakurqan. Kunanmi qoritawan qolqetawan apachimushayki. Israel rey Basawan rimanakusqaykichistaqa ama kasuychu, chhaynapi noqamanta karunchakunanpaq”, nispa.
4 Jinan Ben-Adajqa Asá reyta kasuspa soldadonkunaq umallinkunata kacharqan Israel runakunawan maqanakunanpaq. Jinan Israel runakunata atipaspa jap’ikapurqanku Dan llaqtata,+ Abel-Main llaqtata, Ijonta,+ Neftalí llaqtakunapi kaq mijuy waqaychanakunatawan.+ 5 Chaykunata yacharuspan Basaqa Ramá llaqtapi ruwashasqanta wijch’upurqan. 6 Chaymi rey Asaqa llapa Judá ayllu runakunata wajachirqan, jinaspa Ramá llaqtata+ allichananpaq Basapa apasqan rumikunata maderakunata lliuta apapurqanku.+ Chaykunawanmi Asaqa Gueba llaqtatapas+ Mizpá llaqtatapas+ aswan allinta allicharqan.
7 Chay tiempopin rijuriykunata rikuq Ananiqa+ Judá ayllu rey Asawan tupaq rirqan, jinan nirqan: “Manan qanqa Jehová Diosniykimanchu jap’ipakurqanki, aswanpas Siria reymanmi jap’ipakurqanki, chaymi Siria reypa soldadonkunata makiykimanta escapachikunki.+ 8 ¿Manachu Etiopía soldadokunapas Libia soldadokunapas sinchi askha jamurqanku caballopi soldadokunantin carretakunantin ima? Paykunaqa aswan askhan karqanku, chaywanpas Jehová Diospi confiasqaykiraykun Diosqa makiykiman paykunata entregarqasunki.+ 9 Rikusqayki jina, Jehová Diosqa makillan kay pachapi kaq runakunataqa qhawamushan,+ chhaynapi tukuy sonqowan payta serviq runakunata yanapananpaq.+ Kay kutipin ichaqa mana yuyayniyoq jina ruwarqanki, chaymi kunanmantaqa guerrallapi tarikunki”,+ nispa.
10 Chayta uyarispan rey Asaqa sinchita phiñakurqan Ananipaq, jinan payta carcelpi wisq’achimurqan. Chay tiempopin rey Asaqa wakin Judá ayllu runakunatapas ñak’arichiyta qallarirqan. 11 Asá reymanta wakin willakuykunaqa lliumi qelqasqa kashan Judá ayllu reykunamanta Israel reykunamanta willaq libropi.+
12 Kinsa chunka isqonniyoq wataña kamachikushaspan rey Asaqa chakinmanta onqopurqan, chay p’unchaykuna qhepamantaq nishutapuni onqopurqan. Chhaynaña tarikushaspapas manan payqa Jehová Diospa yanapaynintaqa maskharqanchu, aswanpas doctorkunamanmi* rirqan. 13 Jinan Asaqa ñaupa taytankuna jina wañukapurqan+ tawa chunka jujniyoq wataña kamachikushaqtin. 14 Jinan cuerponta camilla pataman churarqanku. Chay camillamanmi jich’aykurqanku bálsamo aceiteta, preparasqanku jawinatawan, chay jawinataqa imaymana qorakunamanta sumaq q’apaq aceitekunamantan ruwarqanku.+ Chaymantataq paypa sutinpi sumaq q’apaq inciensokunawan may jatun ninata raurachirqanku. Jinaspataq Asataqa p’ampapurqanku Davidpa Llaqtan+ nisqapi, munay sepultura ruwachikusqanpi.