Hebreos
7 Chay Melquisedecqa Salen llaqtapin rey karqan, ancha jatun Diospa sacerdotentaqmi karqanpas; paymi Abrahanwan tupaq lloqsimurqan Abrahán waj reykuna wañuchisqanmanta kutimpushaqtin, jinaspa payta bendecirqan,+ 2 Abrahantaq maqanakuypi llapa qechumusqanmanta chunka kaq parteta payman qorqan. Paypa sutinqa “chanin rey” ninantan nin, chaymantapas payqa Salen* llaqta reytaq karqan chayqa, “thaj kayta qoq rey” nispan paytaqa nikullanmantaq. 3 Paymantaqa manan yachakunchu pichus taytan karqan chayta ni pichus maman karqan chaytapas, manallataqmi yachakunchu pikunachus ñaupa taytankuna karqan chaytapas, chaymantapas paypaqa manan ni qallariyninpas ni tukukuyninpas kanchu; ichaqa Diospa Churin jina ruwasqa kaspan wiñaypaq sacerdote kapun.+
4 May jatunpunin chay runaqa karqan, chaychá Abrahanpas ñaupa taytanchisña karqan chaypas, guerrapi qechumusqanmanta allichachaqkunata chunka kaq parteta payman qorqan.+ 5 Kamachikuy simiq nisqanman jinaqa Levipa wawankunan+ sacerdote kanankupaqqa churasqa karqanku, paykunataqmi llaqtamantaqa diezmota chaskinanku karqan,+ arí, wayqenkunallamantataqmi chaskinanku karqan, paykunapas Abrahanpa wawankunaña karqanku chaypas. 6 Chay runan ichaqa manaña Leví ayllumantachu karqan chaypas, promesakunata chaskiq Abrahanmanta diezmota chaskirqan, chaymantataq payta bendecirqan.+ 7 Yachasqanchis jinapas, kuraq kaqmi sullk’a kaqtaqa bendecin ¿riki? 8 Chaymantapas, diezmota chaskiq Leví runakunaqa wañuq runakunallan karqanku, chay juj kaq runan ichaqa kausashallan, chaytan Diospa simin qelqa willan.+ 9 Chhaynaqa, Abrahanpa qosqan diezmoqa diezmota chaskiq Levipa qosqan diezmopas kanman jinan karqan. 10 Ichaqa Melquisedec Abrahanwan tupaq lloqsimushaqtinqa manaraqmi Leviqa karqanchu,+ chaywanpas ñaupa taytan Abrahanpin payqa kasharqan.
11 Leví ayllullamanta sacerdotekuna kanantaqa kamachikuy simipin nirqan; ichaqa paykunawanchus runakuna juchankumanta limpiasqa kankuman karqan chayqa,+ ¿necesitakunmanraqchu karqan Melquisedec jina juj sacerdoteta?+ ¿Manachu Aarón jina sacerdotekunallawanña imapas ruwakunman karqan? 12 Cambiakushantaq sacerdotekuna chayqa, cambiakunallantaqmi kamachikuy simipas.+ 13 Kay rimasqanchis runaqa waj ayllumantan jamurqan, chay ayllumanta runakunaqqa manan altarpiqa ima ruwanankupas karqanchu.+ 14 Arí, Señorninchisqa Judá ayllumantan karqan,+ manataqmi Moisesqa willarqanchu chay ayllumanta ima sacerdotepas kanantaqa.
15 Chaymi aswan allinta rikukun Melquisedec jina+ juj sacerdote jatarisqanwan.+ 16 Payqa chhayna sacerdote karqan manan piqpa mirayninmantachus jamunan karqan chay kamachikuyman jinachu, aswanpas mana tukukuq kausayta qoq atiywanmi.+ 17 Paymanta rimaspan juj partepi nin: “Qanmi Melquisedec jina sacerdote kanki, wiñaypaqmi sacerdote kanki”,+ nispa.
18 Chhaynapin ñaupa kamachikuyqa tukuchisqa kapun, chay kamachikuy pisi kallpa mana atiyniyoq kasqanrayku.+ 19 Kamachikuy simiqa manan Diospa tukuy ima munasqantachu junt’achirqan;+ Diospa suyakuy apamusqanmi ichaqa aswan allin,+ chay suyakuymi Diosmanpas qayllaykachiwanchis.+ 20 Juramentota ruwaspan Diosqa Jesusta churarqan sacerdote kananpaq. 21 Wakin runakunaqa mana juramentollawanmi sacerdotekuna karqanku, Jesusmantan ichaqa juj juramentota ruwakurqan, arí, paymantan nikurqan: “Jehová* Diosmi juj juramentota ruwan: Qanqa wiñaypaq sacerdoten kanki, nispa.+ Manan imachus piensasqantaqa cambianqachu”, nispa. 22 Chayraykun Jesusqa aswan allin rimanakuymanta* garantía jina* karqan.+ 23 Chay juj sacerdotekunaqa wañuq kasqankuraykun jujñataq-jujñataq jaykurqanku sacerdote kanankupaq,+ 24 Jesusmi ichaqa wiñaypaq kausaq,+ chaymi payqa mana necesitanchu pipas rantinpi jaykuqta. 25 Chaymantapas payqa atiyniyoqmi llapa paypa sutinpi Diosmanta mañakuqkunata salvananpaq. Jinaspapas, wiñaypaqtaq kausanqa chayqa, chaypipunin kashanqa paykunapaq Diosmanta rogapunanpaq.+
26 Chhayna uma sacerdotetapunin noqanchisqa necesitasharqanchis; payqa junt’aq sonqo, mana ima juchayoq, mana ima qhelliyoq iman,+ t’aqasqan kashan juchasapakunamantapas; cielomantapas aswan altomanraqmi jatunchasqa kashan.+ 27 Chaymantapas chay uma sacerdotekunaqa sapa p’unchaymi sacrificiokunata jaywaqku, ñaupaqtan paykunaq juchankumanta jaywaqku, chaymantataq llaqtaq juchanmanta;+ Jesusmi ichaqa mana chaytaraqchu ruwan,+ aswanmi payqa juj kutillata pay kikin sacrificiopaq entregakurqan,+ chhaynapi runakunata wiñaypaq yanapananpaq. 28 Kamachikuy simiq nisqanman jinaqa juchasapa runakunallan uma sacerdote kanankupaq churasqa karqanku,+ kamachikuy simi qhepamanña juramento ruwakusqanman+ jinan ichaqa Diospa Churin uma sacerdotepaq churasqa karqan, payqa wiñaypaqmi ch’uyanchasqa karqan.+