1 Corintios
14 Kallpachakushallaychis jujkuna-jujkunawan munanakunaykichispaq; jinaspapas tukuy atisqaykichista ruwaychis Diospa espiritunpa atiy qokuyninkunata chaskinaykichispaq, astawanqa profetizay atiyta chaskinaykichispaq.+ 2 Pipas waj simikunapi rimaqqa manan runakunatachu rimapayan aswanpas Diostan, payta mana pipas entiendesqanrayku;+ chaywanpas, payqa espirituq yanapayninwanmi Diospa pakasqa ch’uya yachayninkunata rimashan.+ 3 Profetizaqmi ichaqa rimasqanwan runakunata kallpachan, yanapan, consuelan ima. 4 Pipas waj simita rimaqqa pay kikillantan kallpachakun, profetizaqmi ichaqa iñiq t’aqata kallpachan. 5 Noqaqa munaymanmi waj simikuna rimanaykichista,+ ichaqa profetizanaykichistan astawanqa munani.+ Profetizaymi aswan allin waj simikuna rimaymantaqa. Ichaqa chay waj simita rimaqchus rimasqanta t’ijrayta atinman chayqa, kallpachanqan iñiq t’aqata. 6 Wayqeykuna,* qankunamanchus jamuyman waj simikunapi rimaspa chayqa, ¿imaynatataq yanapaykichisman? Yanapayta munaspayqa, ¿manachu aswan jamuyman Diosmanta chaskisqay willakuykunata willaspa,+ yachaywan rimaspa,+ profeciata willaspa, ima yachachikuytapas rimaspa?
7 Chayqa tocanakuna jinan kanman, arí, arpa jina otaq flauta* jina. Manachus allinta flautatapas arpatapas tocakunman chayqa, ¿imaynapitaq yachakunman imatachus tocakushan chayta? 8 Guerrapaq trompetata tocaqchus mana allintachu tocanman chayqa, ¿pitaq guerrapaq alistakunman? 9 Chhaynallataqmi qankunawanpas, manachus fácil entiendeyllata rimankichis chayqa, ¿imaynapitaq pipas entiendenqa imachus rimasqaykichista? Ch’usaqmanpas rimapayashawaqchis jinachá kanman riki. 10 Kay pachapiqa imaymana clase simikunatan rimakun, llapantaqmi chay simikunaqa entiendesqakama. 11 Juj runaq rimapayawasqanta mana entiendeymanchu chayqa, waj simi rimaqmi chay runapaq kayman, paypas waj simi rimaqmi noqapaqqa kanman. 12 Chhaynallataq qankunapas, anchatataq munankichis espirituq qosqan atiykunata chayqa, kallpachakuychis chay atiykunata askhata chaskinaykichispaq, chhaynapi iñiq t’aqa allin kallpachasqa kananpaq.+
13 Chayrayku, pipas waj simipi rimaqqa Diosmanta mañakuchun chay rimasqan simita t’ijrayta atinanpaq.+ 14 Waj simipichus mañakuyman chayqa, espirituq qowasqan atiywanmi mañakushayman; yuyayniypin ichaqa mana entiendeshaymanchu imachus rimasqayta. 15 Chhaynaqa, ¿imatataq ruwasaq? Mañakusaqmi espirituq qowasqan atiywan, ichaqa mañakullasaqtaqmi entiendesqay simipipas. Takisaqmi espirituq qowasqan atiywan, ichaqa takillasaqtaqmi entiendesqay simipipas. 16 Chayrayku, espirituq qosqan atiywanchus Diosta jatunchanki chayqa, ¿imaynapitaq ñaupaykipi kaq común runari Diosman gracias qosqaykimanta “amén”* ninqa, manataq rimasqaykita entiendeshanmanchu chayri? 17 Arí, Diosman graciasta qospaqa allintan ruwashanki, ichaqa manan chay uyariqniyki runata yanapashawaqchu. 18 Diostan “gracias” nini llapaykichismanta aswan askha simikunapi rimasqaymanta. 19 Iñiq t’aqapin ichaqa chunka waranqa simita mana entiendey atiyta rimanaymantaqa pisqa simillata rimayta munani, ichaqa entiendey atiy simikunata, chhaynapi jujkunata yachachinaypaq.+
20 Wayqeykuna,* ama wawakuna jinaqa piensaychischu,+ aswanpas mana allin ruwaykunapaq wawa jinaqa kaychis;+ yuyayniyoq runakuna jina imatapas piensaychis.+ 21 Kamachikuy simipin qelqasqa kashan: “Waj simikunata rimaq runakunawan, waj llaqta runakunawan iman kay llaqta runakunata rimapayachisaq, chaywanpas paykunaqa manan uyariyta munawanqakuchu, ninmi Jehová* Dios”,+ nisqa. 22 Chhaynaqa waj simikunapi rimayqa manan iñiqkunapaq señalchu, aswanpas mana iñiqkunapaq señalmi;+ profetizaymi ichaqa iñiqkunapaq, manan mana iñiqkunapaqchu. 23 Chayrayku, juñunakuypi juñukuspaykichischus llapaykichis waj simikunapi rimayta qallariwaqchis chayqa, ¿manachu chay ratu jaykumuq común runakunapas mana iñiqkunapas ninqaku: “Kay runakunaqa manamá yuyayninkupichu kashanku”, nispa? 24 Ichaqa llapaykichischus profetizashawaqchis chayllamantaq jamunman juj mana iñiq runapas juj común runapas chayqa, rimasqaykichista uyarispan payqa anyasqa kanqa, sonqontapas allinta t’aqwikunqa. 25 Chhaynapin sonqonpi imachus pakasqa kasqanta reparakunqa, jinaspa qonqoriykukuspa Diosta adoranqa: “Diosqa qankuna ukhupimá kashasqa”,+ nispa.
26 Wayqeykuna,* juñunakuypiqa wakinqa takinkichismi ¿riki? Wakintaq yachachinkichis, wakintaq Diosmanta chaskisqaykichis willakuyta willankichis, wakintaq waj simikunata rimankichis, wakintaq chay rimasqankuta t’ijrankichis,+ chhaynan ¿riki? Ichaqa, ¿imaynatataq chaykunatari ruwakunan? Lliutan ruwanaykichis kallpachanakunaykichispaq jina. 27 Waj simipi rimaqkuna kaqtinqa iskaylla otaq kinsalla rimachunku, ama masqa, ichaqa ch’ulla-ch’ullallamantan rimananku, chaywanpas kananmi chay rimasqanku t’ijraq.+ 28 Ichaqa manachus pipas t’ijraq kanman chayqa, ch’inllan kananku juñunakuypi,* sonqonkupi Dioswan rimaspa. 29 Jinallataq, profetakunapas kan chayqa, iskaylla otaq kinsalla rimachunku,+ wakintaq paykunaq rimasqanta entiendechunku. 30 Chaypi tiyashaqkunamanta mayqenpas Diosmanta chaskin ima willakuytapas chayqa, chay ratu rimashaq runa upallachun, chhaynapi juj kaq rimananpaq. 31 Chhaynapin profetizaqkunaqa ch’ulla-ch’ullallamanta profetizankichis, chhaynapi llapanku yachanankupaq kallpachasqa kanankupaq ima.+ 32 Profetakunaqa manan comuntachu imatapas ruwananku espirituq qosqan atiywanqa. 33 Diosqa manan imatapas ch’arwita ruwaq Dioschu, aswanpas thaj kayta qoq Diosmi.+
Lliu iñiq t’aqapi jina, 34 warmikunaqa ch’inlla kachunku juñunakuykunapiqa, manan paykunaqa rimanankuchu.+ Aswanpas kasukuqmi kananku,+ chaytan kamachikuy simipipas nin. 35 Imataña yachayta munankuman chaypas, wasinkupiña qosankuta tapukuchunku; p’enqaymi kanman juj warmi juñunakuypi rimanman chayqa.
36 Icha, ¿qankunawanchu Diospa simin qallarirqan? ¿Qankunallachu chayta chaskirqankichispas?
37 Pipas profeta kananpaq otaq espirituq atiy qokuyninta chaskiqpaq piensakun chayqa, reparananmi kay qelqamusqaykunaqa Señorpa kamachikuyninkuna kasqanta. 38 Pipas chay qelqamusqayta mana reparaqmi ichaqa paypas mana reparasqallataq kanqa. 39 Chhaynaqa, wayqellaykuna,* kallpachakushallaychis profetizanaykichispaq;+ aman jark’ankichischu waj simikunapi rimaqkunatapas.+ 40 Ichaqa, tukuy imapas imaynachus kananman jina ordenpi ruwakuchun.+