Ezequiel
17 Jujmantan Jehová Diosqa rimapayamuwarqan, paymi niwarqan: 2 “Runaq churin, Israel runakunamanta juj tupanachiyta, juj rijch’anachiyta willay.+ 3 Khaynatan ninki: Tukuy munayniyoq Señor Jehová Diosmi khaynata nin: Juj jatun ankan,+ jatun rafrayoq, color-color jatun phurukunayoq, Líbano wichayman jamurqan,+ jinaspa cedro sach’aq ñawinta orqorqan.+ 4 Aswan altopi kaq ñawitan orqorqan, chaytataq negocio ruwaqkunaq jallp’anman* aparqan, paykunaq llaqtanpin chayta plantamurqan.+ 5 Chaymantataq mujuta apaspa allin jallp’aman tarpumurqan.+ Jatun mayu patapin chayta churarqan, imaynan sauce sach’ata plantakun jinata. 6 Chhaynapin chay plantaqa wiñarqan, uvas sach’an karqan,+ tajsallatan wiñarqan, jatuntataq mast’arikurqan. K’allmanpa ñawinkunaqa payllamanmi qhawasharqan saphinpas ukhumanmi jaykurqan. Chhaynan chay uvas sach’aqa karqan, k’allmasapan, raphisapan karqan.+
7 ”Chaymantan juj jatun anka jamullarqantaq,+ chay ankapas jatunkaray rafrayoqmi, jatun phurukunayoqmi kasqa.+ Uvas sach’ataq chay ankaman saphinkunata mast’arirqan, maypichus plantasqa kasharqan chay jallp’amantan ima jinaraq mast’arikurqan. K’allmankunatapas chay ankamanmi jaywarirqan qarpachikunanpaq.+ 8 Chay uvasqa allin jallp’apin, mayu patapin plantasqa karqan. Raphichakuspa allinta rurunanpaq jina, may munayta wiñananpaq jinan plantasqa karqan,+ nispa.
9 ”Nillankitaqmi: Tukuy munayniyoq Señor Jehová Diosmi nin: ¿Allinchu kanqa chay uvas sach’a? ¿Manachu saphinmanta t’irapunqaku?+ ¿Manachu ruruntapas ismuchipunqaku, ch’ijchimusqantapas ch’akichipunqaku?+ Arí, ch’akin kapunqa, t’iranapaqpas manan kallpapaqraqchu kanqa. 10 Jujmantaña plantakunman chaypas, ¿allinchu kanqa? ¿Manachu aswanpas ch’akipunqa inti lloqsimuy ladomanta wayra phukumuqtin? Arí, maypichus plantasqa karqan chaypin ch’akipunqa, nispa”.
11 Jujmantan Jehová Diosqa rimapayamuwarqan, paymi niwarqan: 12 “Ama jinachu kay, chay mana kasukuq k’ullu runakunata nimuy: ¿Manachu reparankichis kaykuna imaninanchus chayta?, nispa. Nillankitaqmi: Babiloniaq reyninmi Jerusalenman jamuspa, reyta umallikunatawan Babiloniaman apapurqan.+ 13 Chaymantapas reykunaq mirayninmanta jujninta jap’ispan paywan rimanakurqan,+ paytan jurachirqan rimanakusqankuta ama p’akinanpaq.+ Chaymantataq allin reqsisqa runakunata apapurqan,+ 14 chhaynapi chay gobierno mana kallpayoq kananpaq, ama jujmanta sayarinanpaq. Rimanakusqankuta kasukuspallan paykunaqa allin kananku karqan.+ 15 Judá reymi ichaqa Babilonia rey contra jatarirqan.+ Egiptomanmi runakunata kacharqan caballokunata apachimunanpaq,+ soldadokunatapas kachamunanpaq.+ ¿Allillanchu chayta ruwaspa kanqa? ¿Ayqenmanchu chhayna ruwaq runa castigomanta? ¿Rimanakuyta p’akiq runa ayqenmanchu?,+ nispa.
16 ”Tukuy munayniyoq Señor Jehová Diosmi nin: Noqa wiñaypaq kausaq Diosmi jurani: Judá reyqa Babiloniapin wañunqa, rey kananpaq churaqnin Babilonia reypa llaqtanpin wañunqa. Chay reywan rimanakusqantan payqa mana junt’arqanchu, juramento ruwasqantan mana valeqman tukuchirqan.+ 17 Faraonpa* soldadonkunaqa manan imapipas yanapanqakuchu Babilonia soldadokuna jamuqtinqa,+ manan ima ruwaytapas atinqakuchu chay soldadokuna llaqtata muyuykuqtinqa, llaqtaman jaykumunankupaq jallp’ata montoqtinkuqa. 18 Payqa juramento ruwasqantan mana valeqman tukuchirqan, rimanakusqantan p’akirqan. Kasukunanpaqña jurarqan chaypas manan kasukurqanchu. Manapunin payqa ayqekunqachu, nispa.
19 ”Chayraykun tukuy munayniyoq Señor Jehová Diosqa nin: Noqa wiñaypaq kausaq Diosmi jurani: Llapa imachus ruwasqantan payman chayachimusaq, payqa juramento ruwasqaytan mana respetarqanchu,+ rimanakusqaytan mana junt’arqanchu. 20 Jap’inay llikatan payman kachaykamusaq,+ payta jap’ispan Babiloniaman apasaq, chaypin traicionawasqanmanta paywan juicioman jaykusaq.+ 21 Tropanmanta ayqekuqkunaqa espadawanmi wañuchisqa kanqaku, qhepaqkunataq tukuy ladoman ch’eqechisqa kanqaku,+ chhaynapin qankunaqa yachankichis noqa Jehová Diospuni rimasqayta,+ nispa.
22 ”Tukuy munayniyoq Señor Jehová Diosmi nillantaq: Cedro sach’aq ñawintan orqosaq+ jinaspan plantasaq. K’allmanpi ch’ijchitan p’itisaq,*+ chaytan noqa kikiy jatun alto orqo patapi plantasaq.+ 23 Israelpi aswan alto orqopin plantasaq, chaypin wiñanqa, askhatan rurunqa, ancha jatun munay cedro sach’an kapunqa. Imaymana clase phalaq animalkunan chaypi tiyanqaku, k’allmankunaq llanthunpin llanthukunqaku. 24 Campopi kaq llapa sach’akunan yachanqaku, alto sach’akunata noqa Jehová Dios juch’uyman tukuchisqayta, juch’uy sach’akunatataq jatunman tukuchisqayta.+ Noqan q’omer sach’ata ch’akichini, ch’aki sach’atataq t’ikarichini.+ Noqa Jehová Diosmi chayta nini, noqataqmi chaytaqa ruwanipas, nispa”.