Zacarías
4 Noqawan rimashaq angelmi kutimuspa rijch’arichiwarqan, imaynan puñushaq runata rijch’arichikun jinata. 2 Jinaspan tapuwarqan: “¿Imatan rikushanki?”, nispa.
Noqataq nirqani: “Qori candelerotan+ qanchis mecheroyoqta* rikushani,+ sapanka mecheron tuboyoqkama kashan, patanpitaq p’uku kashan. 3 Ladonpitaq iskay aceituna sach’akuna kashan.+ Jujnin kaq aceituna sach’an p’ukuq paña ladonpi kashan, jujnin kaqtaq lloq’e ladonpi kashan”, nispa.
4 Chaymantataq noqawan rimashaq angelta tapurqani: “Wiraqocháy, ¿imataq chay rikusqaykunari?”, nispa. 5 Jinan noqawan rimashaq angelqa niwarqan: “¿Manachu yachanki chaykuna imachus kasqanta?”, nispa.
Noqataq nirqani: “Manan yachanichu wiraqocháy”, nispa.
6 Paytaq niwarqan: “Jehová Diosmi Zorobabelta nin: Manan soldadokunawanchu ni soldadokunaq kallpanwanchu,+ aswanpas espirituywanmi tukuy chaykunaqa junt’akunqa,+ ejercitokunata kamachiq Jehová Diosmi chayta nin. 7 Jatunkaray orqo, ¿pin qan kanki? Zorobabelpa+ ñaupanpiqa pampan kapunki.+ Paymi wasiq perqanta jap’iq rumita orqonqa, runakunataq kusisqa qaparinqaku: ¡May munaymi! ¡May munaymi!, nispa”.
8 Jujmantan Jehová Diospa siminta chaskirqani. Niwarqanmi: 9 “Zorobabelmi kay wasiq cimentacionnintaqa churarqan,+ payllataqmi ruwaytapas tukunqa.+ Chhaynapin yachanki ejercitokunata kamachiq Jehová Dios qankunaman kachamuwasqanta. 10 Kay wasi ruwayta qallarikusqantaqa manan pipas pisichananchu.+ Zorobabelta plomada jap’ishaqta rikuspan runakunaqa kusikunqaku. Kay qanchis kaqkunaqa Jehová Diospa ñawinkunan, chay ñawikunan pachantinta qhawashan”,+ nispa.
11 Jinan tapurqani: “¿Imataq candeleroq paña ladonpi, lloq’e ladonpi kaq aceituna sach’akunari?”,+ nispa. 12 Chaymantapas jujmantan tapullarqanitaq: “¿Imataq iskay qori tubonta q’ellu aceiteta jich’amuq iskay aceituna sach’aq k’allmankunari?”,* nispa.
13 Jinan niwarqan: “¿Manachu yachanki chaykuna imachus kasqanta?”, nispa.
Noqataq nirqani: “Manan yachanichu wiraqocháy”, nispa.
14 Paytaq niwarqan: “Chaykunaqa kay pachaq Señorninpa ladonpi sayashaq iskay ajllasqakunan”,+ nispa.