Jeremías
22 Jehová Diosmi niwarqan: “Judá reypa wasinman* kay willakuyta apay. 2 Khaynatan ninki: Davidpa trononpi tiyaq Judá rey, uyariy Jehová Diospa siminta, kamachiykikunapas, llaqtayki runakunapas, llapa kay punkunkunata jaykuqkunapas uyarichunku. 3 Jehová Diosmi nin: Chanin kaqman, allin kaqman sayapakuychis, engañollawan mana allinta ruwaqkunaq makinpi kaqkunata kacharichiychis. Ama waj llaqtayoqkunata, mana taytayoqkunata, viudakunata sarunchaychischu,+ ama kay jallp’api mana juchayoq runakunaq yawarninta jich’aychischu.+ 4 Kay nisqaytachus kasukunkichis chayqa, Davidpa trononpi tiyaq reykunan carretakunapi+ caballo sillapi ima kay palacioq punkunkunata jaykunqaku, kamachikunantin llaqta runakunantin ima.+
5 ”Ichaqa manachus kasukunkichis kay nisqaykunata chayqa, sutiypin jurani, kay wasin ch’usaqyachisqa kanqa,+ ninmi Jehová Dios.
6 ”Judá reypa wasinwan imachus pasananmantan Jehová Dios nin:
Qanqa Galaad jinan noqapaq kanki,
Líbano orqo punta jinan kanki.
Ichaqa ch’inneqmanmi tukuchisayki,
llaqtaykikunatapas mana piqpa tiyananmanmi tukuchisaq.+
Paykunan allinnin cedro sach’aykikunata wit’unqaku,
ninawanmi kanaykunqaku.+
8 ”Askha nación runakunan kay llaqtanta pasaspa ninakunqaku: ¿Imaraykun Jehová Dios kay jatun llaqtata khaynata ruwarun?,+ nispa. 9 Ninakullanqakutaqmi: Paykunaqa Jehová Diosninkuwan rimanakusqankutan qonqapurqanku, waj dioskunamanmi k’umuykurqanku, chaykunatan yupaycharqanku,+ nispa.
10 Ama wañuqmanta waqaychischu, ama paymanta llakikuychischu.
Aswanpas ripuqmanta khuyayta waqaychis,
payqa manañan kutimunqañachu, manañan nacesqan jallp’ata rikunqañachu.
11 ”Taytan Josiaspa+ rantinpi kamachikushaq Judá rey Salumqa*+ kay llaqtanmantan ripun, paymantan Jehová Dios nin: Manan jayk’aqpas kutimunqañachu. 12 Payqa preso apasqanku llaqtapin wañumunqa, manan kay jallp’ataqa rikunqañachu,+ nispa.
13 ¡Imaraqmi kanqa mana chaninta ruwaspa wasinta ruwakuqmanta!
¡Imaraqmi kanqa mana allinwan altos patapi cuartokuna ruwakuqmanta!
¡Imaraqmi kanqa yanqalla runamasinwan servichikuqmanta, mana pagapuyta munaqmanta!+
14 Paymi nin: Jatun wasitan ruwakusaq,
altos patapi jatun cuartokunayoqtan ruwakusaq,
ventanankunatan churasaq,
ukhu perqankunatan cedro tablawan churasaq,
chaytan pukawan pintasaq, nispa.
15 ¿Wakinkunamanta aswan askha cedro tablawan palacioykita ruwakuspachu, noqaqa kamachikushallasaqmi nishanki?
Taytaykipas allintan mijurqan ujarqan,
ichaqa allin kaqtan, chanin kaqtan ruwarqan,+
chaymi allillan karqan.
16 Payqa wajchakunamanmi sayapakurqan,
sarunchasqakunapaqmi justiciata ruwapurqan,
allillantaqmi ima ruwasqanpas lloqsirqan.
¿Manachu chhaynata ruwanan reqsiwaqniy runaqa?, ninmi Jehová Dios.
17 Qanmi ichaqa mana chaninta ruwaspa tarisqallaykiman ñawiykita sonqoykitapas churanki,
mana juchayoq runakunaq yawarnin jich’ayllapin yuyaykunki,
sarunchaspa jujkunata engañayllapin piensanki.
18 ”Chayraykun Josiaspa churin Judá rey Jehoiaquinmanta+ Jehová Dios nin:
Manan, ¡ay wayqelláy, ay panalláy!, nispa paymanta waqanqakuchu.
Manan, ¡ay patronníy, ay kamachiqníy!, nispa waqanqakuchu.
19 Wañuqtinqa wañusqa asnota jinan saqerparinqaku,+
jawaman aysarparispan wijch’umunqaku,
Jerusalenpa punkunkuna jawamanmi wijch’umunqaku,+ nispa.
20 Líbano orqoman wichaspa qaparimuy,
Basanmanta wajakamuy,
Abarinmantapacha qaparimuy,+
llapa munakuqniykikunan atipasqa kapun.+
21 Allillan kashaqtiykin noqaqa rimapayarqayki.
Qanmi ichaqa nirqanki: Manan kasukuymanchu,+ nispa.
Sipas kasqaykimantapachan chhayna karqanki,
manan jayk’aqpas simiytaqa kasukurqankichu.+
22 Llapa michiqniykikunatan juj wayra apapunqa,+
munakuqniykikunan preso apasqa kanqaku.
Imaymana ñak’ariykunapin tarikunki,
chhaynapin p’enqachisqa, pisichasqa kanki.
23 Yau, qan Líbano wichaypi tiyaq,+
cedro sach’a-sach’api q’esachakuq,+
maytan ñak’arinki nanayniyki chayamuqtin,
maytan ñak’arinki onqokuq warmi jina nanaypi tarikuspa.+
24 Jehová Diosmi nin: Noqa wiñaypaq kausaq Diosmi jurani, Jehoiaquinpa+ churin Judá rey Conías,*+ paña makiypi sellanay anilloña kawaq chaypas orqokuspan wijch’uykiman. 25 Wañuchiyta munasuqniykikunaq makinmanmi entregasayki, manchachiqniykikunaq makinmanmi jap’iykachisayki, Babilonia rey Nabucodonosorpa makinmanmi, Caldea runakunaq makinmanmi entregapusayki.+ 26 Qantapas wachakuqniyki mamaykitapas mana nacesqaykichis jallp’amanmi wijch’usaykichis, chaypin wañumunkichis. 27 Kutimuyta munasqaykichis jallp’amanqa manapuniñan kutimunkichisñachu.+
28 ¿Coniasri mana imapaq valeq p’akisqa mankachu?
¿Mana piqpa munasqan p’uyñuchu?
¿Imaraykun paytapas miraynintapas wijch’unku?
¿Imaraykun mana reqsisqanku jallp’aman wijch’unku?,+ nispa.
29 Kay jallp’api tiyaq runakuna,* uyariychis Jehová Diospa siminta.
30 Jehová Diosmi khaynata nin:
Kay runata mana wawayoqta jina anotachiychis,
kausayninpi mana ima allinman aypaq runata jina churachiychis,
mirayninmantaqa manan mayqellanpas Davidpa trononpiqa tiyaykunqachu,
manan mayqellanpas Judapiqa wajmanta kamachikunqachu,+ nispa”.