1 Corintios
1 Diospa munayninman jina Cristo Jesuspa apostolnin* kanaypaq ajllasqa noqa Pablon+ iñiqmasinchis Sosenespiwan 2 kay cartata apachimushaykichis qankuna Corinto llaqtapi kaq Diospa iñiq t’aqanman,+ arí, qankuna Diospa ch’uyanchasqan kaspa Cristo Jesuswan jujllachasqa kaqkunaman,+ qankuna ch’uya kanaykichispaq wajasqa kaqkunaman, jinallataq llapanchispa Señorninchis Jesucristoq sutinta jinantinpi wajakuqkunamanwan.+
3 Qankunawan kachun Taytanchis Diospa, jinallataq Señor Jesucristoq ancha sumaq sonqo kaynin thaj kayninpas.
4 Qankunamantan Diosniyman graciasta qonipuni Cristo Jesuswan ancha sumaq sonqo kayninta rikuchisqasuykichisrayku. 5 Qankunaqa paywan jujllachasqa kasqaykichisraykun imaymanata chaskirqankichis, chaskirqankichismi Diospa siminta willanaykichispaq junt’asqa atiyta allin yachaytapas.+ 6 Chaypin sut’ita rikukun Cristomanta willakuy+ qankunapi allin saphichasqa kasqanta, 7 chhaynapin mana imapas pisisunkichischu Señorninchis Jesucristo atiynin rikuchinanta tukuy sonqo suyashanaykichiskama.+ 8 Diosqa allintan sayachisunkichis tukukuykama, chhaynapi Señorninchis Jesucristoq p’unchayninpi+ mana imamantapas juchachasqa kanaykichispaq. 9 Diosqa junt’aqpunin,+ paymi wajarqasunkichis Churin Señorninchis Jesucristowan jujllachasqa kanaykichispaq.
10 Wayqeykuna,* Señorninchis Jesucristoq sutinpin valekuykichis rimayniykichispi jujlla kanaykichispaq qankuna ukhupi ama t’aqanakuy kananpaqwan,+ aswanpas jujllapuni kaychis yuyayniykichispipas imayna piensasqaykichispipas.+ 11 Wayqellaykuna,* qankuna ukhupis t’aqanakuy kashan, chaytan willawanku Cloeq wasinpi kaqkunamanta wakin. 12 Wakinsi nishankichis: “Pabloqmi kani”, nispa, wakintaq “noqaqa Apolospan kani”,+ nispa, wakintaq “noqaqa Cefaspan* kani”, nispa, wakintaq “noqaqa Cristoqmi kani”, nispa. 13 Chhayna kashan chayqa, t’aqanasqachá Cristoqa kashan riki. Manan Pablochu qankunaraykuqa k’aspipi wañuchisqa karqan ¿riki? Icha, ¿Pabloq sutinpichu bautizasqa karqankichis? 14 Diostan agradecekuni mana mayqenniykichistapas bautizasqaymanta, aswanpas Crispota+ Gayollatawanmi+ noqaqa bautizarqani, 15 chhaynapi mana pipas “Pabloq sutinpin bautizasqa kani” ninanpaq. 16 Bautizallarqanitaqmi Estefanaspa wasinpi kaqkunatapas.+ Jujkunamantaqa manan yuyanichu bautizarqanichus manachus chayta. 17 Cristoqa manan bautizanaypaqchu kachamuwarqan, aswanpas allin willakuykunata willanaypaqmi.+ Ichaqa manan yachaysapa runakunaq rimasqanman jina rimanaypaqchu, chhaynapi Cristoq ñak’arina k’aspipi* wañusqan mana yanqayachisqa kananpaq.
18 Ñak’arina k’aspimanta rimayqa mana valeqmi chinkayman rishaqkunapaqqa,*+ noqanchis salvasqa kayman rishaqkunapaqmi ichaqa Diospa atiynin.+ 19 Diospa simin qelqapas ninmi: “Yachaysapakunaq yachaynintan chinkachipusaq, allin yuyayniyoq runakunaq imachus piensasqantapas wijch’usaqmi”,+ nispa. 20 ¿Maypitaq kashan yachaysapa runari? ¿Maypin kashan kamachikuy simi yachachiq runa? ¿Maypin kashan kay tiempopi* churanakuq runapas? ¿Manachu Diosqa rikuchirqan kay pacha yachayqa mana valeq kasqanta? 21 Kay pacha runakunaqa manan yachayninkuman+ jinaqa Diosta reqsiyta atirqankuchu,+ chaymi Diosqa yachayninpi allinpaq qhawarirqan willasqanchis willakuypi creeq runakuna salvayta,+ juj runakunaña mana valeqpaq chay willakuyta qhawarinku chaypas.
22 Judiokunaqa señalkunatan rikuyta munanku,+ griegokunataq* yachayta maskhanku. 23 Noqanchismi ichaqa Cristo k’aspipi warkusqa kasqanmanta willashanchis, chaywanmi judiokunaqa urmanku,* waj nacionmanta runakunataq mana valeqpaq chayta qhawarinku.+ 24 Judiokunamanta griegokunamantawan wajasqa kaqkunapaqmi ichaqa Cristoqa Diospa atiynin yachaynin ima.+ 25 Runakunaqa mana valeqpaq pisi kallpapaq imapaschá qhawarinkuman Diospa kaqkunata, chaykunan ichaqa paykunamantaqa aswan yachayniyoq aswan kallpasapa kanku.+
26 Wayqeykuna,* yachasqaykichis jina, qankuna wajasqa kaqkunapiqa pisillan kankichis runaq piensasqanman jina yachayniyoqkuna,+ atiyniyoqkuna, qhapaq familiamanta kaqkunapas.+ 27 Diosqa kay pachapi mana valeqpaq qhawarisqakunatan ajllarqan yachayniyoq runakunata p’enqachinanpaq; ajllallarqantaqmi kay pachapi mana kallpayoqpaq qhawarisqakunatapas, chhaynapi kallpasapakunata p’enqachinanpaq.+ 28 Diosqa kay pachapi pisipaq qhawarisqakunata pisichasqakunata iman ajllallarqantaq, arí, mana kaqpaq qhawarisqakunatan ajllarqan allinpaq qhawarisqakunata yanqayachinanpaq,+ 29 chhaynapi ama pipas Diospa ñaupanpi alabakunanpaq. 30 Payraykun qankunaqa Cristo Jesuswan jujllachasqa kashankichis. Paywanmi Diosqa rikuchin yachayninta chanin kaynintapas;+ Cristoraykun runakunaqa ch’uya kayta atinkuman,+ precio pagasqanwanpas kacharichisqa kankuman.+ 31 Chhaynapi Diospa simin qelqapi nisqan junt’akunanpaq, chaypin nin: “Pipas alabakuqqa Jehová* Diosmanta alabakuchun”,+ nispa.