Hechos
14 Iconio llaqtapin paykunaqa judiokunaq sinagoganman jaykurqanku, chaypin allinta yachachirqanku, jinan askha judiokuna griego runakuna* ima iñipurqanku. 2 Mana iñiq judiokunan ichaqa waj nacionkunamanta runakunata tanqarqanku Pablota Bernabetawan cheqnikunankupaq.+ 3 Chayraykun paykunaqa unayta chaypi qhepakurqanku Jehová* Diospa atiyninwan tukuy sonqo yachachispa. Paymi paykunaman atiyta qorqan señalkunata admirakunapaq kaqkunatawan ruwanankupaq,+ chhaynapin Diosqa rikuchirqan ancha sumaq sonqo kayninmanta paykunaq willasqankuqa cheqaq kasqanta. 4 Chay llaqtapi runakunan ichaqa t’aqanasqa kasharqanku, wakinmi judiokunaq partenmanta kasharqanku, wakintaq apostolkunaq partenmanta. 5 Chaymi judiokunaqa umallikunantin waj nacionmanta runakunapiwan paykunata maskhayta qallarirqanku mana allinta ruwanankupaq rumiwan ch’aqenankupaqwan.+ 6 Chayta yacharuspan paykunaqa ayqekurqanku, jinaspa rirqanku Licaoniapi kaq Listra llaqtaman, Derbe llaqtaman, lliu muyuriqnintinmanwan.+ 7 Chaykunapin paykunaqa allin willakuykunata willarqanku.
8 Listra llaqtapin juj such’u runa tiyasharqan, payqa such’uñan nacesqa, manapunin jayk’aqpas purisqachu. 9 Paymi Pabloq rimasqanta uyarisharqan, jinan Pabloqa payta allinta qhawaykurqan, qhaliyachisqa kananpaq iñiyniyoq kasqanta reparaspataq+ 10 fuerteta nirqan: “¡Sayariy!”, nispa. Jinan payqa p’itasparaq sayarirqan, jinaspa puriyta qallarirqan.+ 11 Pabloq chay ruwasqanta rikuspan runakunaqa Licaonia rimaypi alto kunkawan nirqanku: “¡Dioskunan runaman tukuspa noqanchisman uraykamuwasqanchis!”,+ nispa. 12 Jinan Bernabeta Zeus* nirqanku, Pablotataq Hermes* nirqanku, pay masta rimasqanrayku. 13 Llaqta jaykunapin Zeus nisqa idoloq templon kasharqan. Jinan Zeuspa sacerdotenqa torokunata t’ika coronakunatawan llaqta punkuman apamurqan, payqa runakunawan kuskan sacrificiota jaywayta munasharqan.
14 Chayta yacharuspan apóstol Bernabewan apóstol Pablowanqa p’achankuta llik’ikurqanku, jinaspa chay runakunaq kasqanman phawaykuspa fuerteta nirqanku: 15 “¿Imaraykun kayta ruwashankichis? Noqaykupas qankuna jina runakunallan kayku.+ Noqaykuqa allin willakuykunatan qankunaman willashayku, chhaynapi kay mana valeq kaqkunata saqespa kausaq Diosman kutirikunaykichispaq. Paymi ruwarqan cielota, kay pachata, lamar-qochata, tukuy chaypi kaqkunatapas.+ 16 Ñaupa tiempopiqa manan nacionkunata jark’arqanchu munasqankuman jinalla kausanankuta.+ 17 Chaywanpas payqa allinkunata ruwaspan reqsichikurqan pichus kasqanta:+ parata parachimuspa, chajrakunata tiempollanpi ruruchispa, mijuytapas askhanpi qospa ima;+ chaykunawanmi payqa sonqoykichistapas kusichin”,+ nispa. 18 Chaykunata nispan paykunaqa ñak’ayta runakunata jark’arqanku ama paykunaman sacrificiota jaywanankupaq.
19 Ichaqa Antioquía llaqtamanta Iconio llaqtamantawanmi judiokuna chayamurqanku, paykunan runakunata kallpacharqanku Pablo contra jatarinankupaq,+ jinan Pablota rumiwan ch’aqeykurqanku, chaymantataq llaqta jawaman aysamurqanku wañusqaña kananpaq piensaspanku.+ 20 Iñiqkuna payta muyuykuqtinmi ichaqa jatarispa llaqtaman jaykurqan. Qhepantin p’unchaytaq Bernabewan kuska Derbe llaqtaman rirqanku.+ 21 Chay llaqtapin askha runakunata yanaparqanku Jesuspa discipulon kanankupaq, chayta ruwaspataq kutipurqanku Listra llaqtaman, Iconio llaqtaman, Antioquía llaqtamanwan. 22 Chay llaqtakunapi iñiqkunatan paykunaqa kallpacharqanku+ iñiyninkupi qaqata sayanankupaq, khaynatan nirqanku: “Imaymanapi ñak’arispan Diospa gobiernonmanqa jaykusun”,+ nispa. 23 Chaymantapas umalliqkunatan* churarqanku sapanka iñiq t’aqapi;+ ayunaspa mañakuspa+ imataq iñisqanku Jehová* Diospa makinman jap’iykachirqanku.
24 Chaymantataq Pisidia ladonta pasaspanku Panfilia provinciaman jaykurqanku.+ 25 Perga llaqtapi Diospa siminta willaspankutaq Atalia llaqtaman jaykurqanku. 26 Chaymantataq Antioquía llaqtaman barcopi kutipurqanku, chaypin iñiqkunaqa paykunata Diosman jap’iykachisqaku sumaq sonqowan qhawarinanpaq, chhaynapi paypa qosqan llank’anata ruwanankupaq; chayta junt’aspan kunanqa kutipusharqanku.+
27 Antioquiaman chayaspan paykunaqa iñiq t’aqata juñuspa willarqanku paykunawan Diospa lliu imaymana ruwasqanta, waj nacionkunamanta runakuna iñinankupaqpas punkuta kicharisqanmantawan.+ 28 Chaypin paykunaqa iñiqkunawan unayta tiyarqanku.