Jeremías

44 Egipto jallp’api+ tiyaq llapa judío runakunapaqmi, Migdolpi,+ Tapanés llaqtapi,+ Nof llaqtapi,*+ Patrós jallp’api+ tiyaqkunapaqmi Jeremiasqa kay simikunata chaskirqan: 2 “Ejercitokunata kamachiq Jehová Diosmi, Israelpa Diosninmi nin: Qankunaqa rikurqankichismi Jerusalenman+ Judapa llaqtankunamanwan chayachimusqay ñak’ariykunataqa, kunanqa ch’usaqyachisqan, mana runakunayoqmi kashan.+ 3 Chayqa pasarqan mana allinkunata ruwasqankuraykun, phiñachiwanankupaqmi ñaupa taytaykichiskunaqa+ mana reqsisqaykichis waj dioskunata servirqanku, chaykunamanmi sacrificiokunata jaywarqanku.+ 4 Noqaqa llapa kamachiy profetaykunatan kacharqani, sapa kutillanmi kacharqani nimunankupaq: Ama jinachu kaychis, ama kay cheqnisqay millay kaqkunata ruwaychischu,+ nispa. 5 Paykunan ichaqa mana uyarikurqankuchu ni kasukurqankupaschu, mana allin ruwaykunatan ruwashallarqanku, kaqllan waj dioskunamanpas sacrificiokunata jaywasharqanku.+ 6 Chayraykun coleraypas k’araq phiñakuyniypas jich’aykamusqa karqan, Judapa llaqtankunapin, Jerusalenpa callenkunapin raurarirqan. Chay llaqtakunaqa ch’usaqyachisqan, purunyachisqan karqan, kunan p’unchaykaman chhayna kashan,+ nispa.

7 ”Ejercitokunata kamachiq Jehová Diosmi, Israelpa Diosninmi nin: ¿Imaraykun qankuna kikillaykichistaq jatun ñak’ariyman churakunkichis? ¿Imaraykun jinalla qhawawaqchis Judá qharikuna, warmikuna, erqekuna, wawakunapas wañunanta? ¿Manachu munankichis juj pisillapas qankunamanta qhepananta? 8 ¿Imaraykun tiyaq risqaykichis Egipto jallp’api waj dioskunaman sacrificiokunata jaywaspa phiñachiwankichis? Qankunaqa wañunkichismi, ñakasqan kankichis, pachantinpi llapa nacionkunaq k’aminanmanmi tukuchisaykichis.+ 9 ¿Qonqarapunkichischu ñaupa taytaykichiskuna, Judá reykuna,+ esposankupas mana allinkuna ruwasqankuta?+ ¿Qonqarapunkichischu qankunapas esposaykichispas mana allinkuna ruwasqaykichista?+ ¿Qonqarapunkichischu Judá jallp’api, Jerusalenpa callenkunapi mana allinkuna ruwakusqanta? 10 Kunan p’unchaykamapas manan qankunaqa* k’umuykunkichischu, manan manchakuyta rikuchinkichischu,+ manataqmi ñaupa taytaykichiskunaq ñaupanman qankunaq ñaupaykichismanpas churasqay leyniykunaman, kamachikuyniykunaman jinachu kausarqankichis,+ nispa.

11 ”Chayraykun ejercitokunata kamachiq Jehová Diosqa, Israelpa Diosninqa khaynata nin: Ñak’ariytan qankunaman chayachimusaq, llapa Judá runakunatan ch’usaqyachipusaq. 12 Egipto jallp’amanpuni ripuyta munaq Judamanta puchuqkunatan jap’isaq, llapankun Egipto jallp’api wañunqaku.+ Espadawanmi, yarqaywanmi wañunqaku; juch’uymanta jatunkaman espadawan yarqaywan wañunqaku. Ñakasqan kanqaku, mancharikunamanmi tukuchisaq, pisichasqan, k’amisqan kanqaku.+ 13 Imaynan Jerusalenta espadawan, yarqaywan, millay onqoywan ima castigarqani, chhaynatan Egipto jallp’api tiyaqkunatapas castigasaq.+ 14 Egipto jallp’aman tiyaq ripuq Judamanta puchuqkunaqa manan escapanqakuchu, manan Judá jallp’amanqa kutiyta atinqakuñachu. Kutipuytan munanqaku chaypi tiyanankupaq, ichaqa manan kutinqakuchu, pisillan kutipunqaku, nispa”.

15 Jinan yanqa dioskunaman esposankuq sacrificio jaywasqankuta yachaq askha qharikuna, chaypi sayashaq askha esposakuna, Egipto jallp’api+ Patrospi+ tiyaq llapa runakuna ima Jeremiasta nirqanku: 16 “Jehová Diospa sutinpi rimapayawasqaykikutaqa manan kasukusaqkuchu. 17 Aswanpas imatachus rimarqayku chayman jinan ruwasaqku. Janaq Pacha Reinamanmi* sacrificiota jaywasaqku, vino ofrendakunatan jich’asaqku,+ imaynan noqaykupas, ñaupa taytaykupas, reyniykupas, autoridadniykupas Judapa llaqtankunapi, Jerusalenpa callenkunapi ruwarqayku chhaynata. Chaypachan askha mijunayoq, imaymanayoq karqayku, manan ima ñak’ariytapas rikurqaykuchu. 18 Janaq Pacha Reinaman manaña sacrificiokunata jaywasqaykumantapachan, manaña vino ofrendatapas jich’asqaykumantapachan mana imaykupas kanñachu, espadawan yarqaywan iman wañupushayku”, nispa.

19 Warmikunapas khaynatan nillarqankutaq: “Qosaykuq kamachisqanmi Janaq Pacha Reinamanqa sacrificiokunata jaywarqayku, vino ofrendakunatapas jich’arqayku, rijch’aynin t’anta sacrificiokunatapas ruwarqayku, vino ofrendakunatapas paypaq jich’arqayku”, nispa.

20 Jinan Jeremiasqa llapa runakunata qharikunata, esposankuta, rimapayaqnin runakunatapas nirqan: 21 “Qankunapas, ñaupa taytaykichiskunapas, reyniykichiskunapas, autoridadniykichiskunapas, llapa runakunapas Judapa llaqtankunapi, Jerusalenpa callenkunapi+ sacrificiokuna jaywasqaykichistaqa, ¡manan Jehová Diosqa qonqarqanchu, yuyashallarqanmi! 22 Jehová Diosqa manañan aguantayta atirqanchu mana allinkuna ruwasqaykichista millakunapaq ruwasqaykichistapas. Chaymi jallp’aykichisqa ch’usaqyachisqa, mancharikuna, ñakasqa, mana piqpa tiyanan kapurqan, imaynan kunan p’unchaypas kashan jina.+ 23 Qankunan chay sacrificiokunata ruwaspa Jehová Dios contra juchallikurqankichis, manan Jehová Diospa siminta, kamachikuyninkunata, yachachikuyninkunata, yuyarichiyninkunatapas kasukurqankichischu, chayraykun kay ñak’ariykunaqa chayamurqasunkichis, kunan rikusqaykichis jina”,+ nispa.

24 Chaymantapas Jeremiasqa llapa runakunata, llapa warmikunatan nillarqantaq: “Egipto jallp’api kashaq llapa Judá runakuna, Jehová Diospa siminta uyariychis. 25 Ejercitokunata kamachiq Jehová Diosmi, Israelpa Diosninmi nin: Qankunapas esposaykichispas simiykichiswan rimasqaykichistan makiykichiswan ruwarqankichis, nirqankichismi: Janaq Pacha Reinaman sacrificio jaywanaykupaq, vino ofrendata jich’anaykupaq promesa ruwasqaykutaqa junt’asaqkun,+ nispa. Warmikuna, qankunapas prometekusqaykichistaqa junt’ankichischá, prometekusqaykichisman jinachá ruwankichis, nispa.

26 ”Egipto jallp’api tiyaq llapa Judá runakuna, Jehová Diospa siminta uyariychis: Jehová Diosmi nin: Ancha jatun sutiyraykun jurani, manan Egipto jallp’api mayqen Judá runapas+ sutiypi wajmanta juranqachu: Tukuy munayniyoq wiñaypaq kausaq Señor Jehová Diospa sutinpin jurani,+ nispa. 27 Makillan kashani paykunaman ñak’ariykunata chayachinaypaq, manan allin kaqkunatachu chayachisaq,+ Egipto jallp’api kaq llapa Judá runakunan ch’usaqyanankukama espadawan yarqaywan wañunqaku.+ 28 Pisillan espadamanta salvakuspa, Egipto jallp’amanta Judá jallp’aman kutipunqaku.+ Egipto jallp’api tiyanankupaq jamuq llapa Judá runakunan yachanqaku piqpa siminchus junt’akunqa chayta, noqaq simiychus icha paykunaq siminchus, nispa.

29 ”Jehová Diosmi nin: Kaypi qankunata castiganaypaq, qankuna contra ñak’ariykunata chayachimunaypaq rimasqay junt’akunanta yachanaykichispaqmi, juj señalta qosaykichis. 30 Egipto rey faraón Hofratan enemigonkunaq makinman entregasaq, wañuchiyta munaqkunaq makinmanmi entregasaq, ninmi Jehová Dios, imaynan Judá rey Sedequiasta wañuchiyta munaq enemigon Babilonia rey Nabucodonosorman entregarqani chhaynatan ruwasaq,+ nispa”.