Deuteronomio
15 ”Sapa qanchis watan manu pampachay* kanqa.+ 2 Chay manu pampachaytaqa khaynatan ruwankichis: Runamasinman imatapas manuqqa pampachapunqan. Manan llaqtamasinta ni wayqentapas manuchanqachu, Jehová Dios chay manuta pampachanapaq kamachikusqanrayku.+ 3 Waj llaqtayoq runataqa manuchawaqchismi,+ llaqtamasiykichistan ichaqa ama manuchankichischu. 4 Qankuna ukhupiqa manan wajchakunaqa* kanqachu, Jehová Diosmi bendicionninta qosunkichis+ Jehová Diospa qonasuykichis jallp’api. 5 Ichaqa Jehová Diospa siminta kasukuspallan, kunan qoshaykichis chay kamachikuykunata allinta junt’aspallan chay bendiciontaqa chaskinkichis.+ 6 Jehová Diosniykichisqa prometesqasuykichisman jinan bendicionninta churamusunkichis, chaymi qankunaqa juj nacionkunamanraq imatapas mañankichis, manataq pimantapas mañakunkichischu.+ Askha nacionkunatan kamachinkichis, qankunatan ichaqa mana mayqen nacionpas kamachisunkichischu.+
7 ”Jehová Dios qonasuykichis jallp’api mayqen llaqtapipas wayqeykichis wajchayapunman chayqa, aman sonqoykichista rumiyachinkichischu, amataq maqllakunkichispaschu.+ 8 Aswanmi mana mich’akuspa imatapas qonkichis,+ ima necesitasqantapas mañankichispunin. 9 Chaytaq sonqoykichispi niwaqchis: Qanchis kaq wataqa, manu pampachana wataqa chayamunqañan,+ nispa. Chaytaq chhayna millayta piensaspa wajchayapuq wayqeykichista mana yanapariwaqchischu, manataq imatapas qoykuwaqchischu. Qankuna contra Jehová Diosman imatapas willakuqtinqa juchachasqapunin kankichis.+ 10 Imatapas qospaykichisqa aman jawa sonqollachu qonkichis aswanpas tukuy sonqomantan qonkichis,+ chayta ruwaqtiykichismi Jehová Diosniykichisqa llank’anaykichisman ima ruwanaykichismanpas bendicionninta churamunqa.+ 11 Wajchakunaqa kallanqapunin,+ chayraykun kamachiykichis: Llakikuypi tarikuq wajcha llaqtamasiykichistaqa mana maqllakuspan yanapaykunkichis.+
12 ”Hebreo wayqeykichistapas panaykichistapas kamachiykichis kananpaq rantikunkichis chayqa, soqta watallatan servichikunkichis, qanchis kaq watapitaq kacharipunkichis.+ 13 Kacharipuspaqa aman ch’usaq makintintachu kacharipunkichis. 14 Ama mich’akuspan qoykunkichis ovejaykichismanta, cabraykichismanta, cosechaykichismantapas, qoykunkichismi aceiteykichistapas, vinoykichistapas. Jehová Diosniykichis bendicionninta churamusqasuykichisman jinan qonkichis. 15 Aman qonqankichischu Egipto jallp’api esclavo kasqaykichista, chaymanta Jehová Diosniykichisqa libramusqasuykichistapas. Chayraykun kaykunatapas kunan kamachishaykichis.
16 ”Kamachiykichus nisunkiman: Manan ripusaqchu, nispa, munakusunkimantaq qantapas wasiykipi kaqkunatapas, kusisqataq qanwan kausanman karqan chayqa,+ 17 punkupi sayaq k’aspimanmi apanki, jinaspa t’oqonawan paypa ninrinta t’oqonki, chhaynapin wañunankama kamachiyki kapunqa. Chhaynatan ruwallankitaq warmi kamachiykiwanpas. 18 Kamachiykita kachariqtiyki pay ripunqa chayqa, aman chaytaqa mana allinpaqchu qhawarinki. Soqtantin wata paypa llank’asqanqa qolqepaq llank’aqmantapas iskay kuti mastaraqmi valen. Chay tiempoqa Jehová Diospas imaymanapin bendicionninta churamusunki.
19 ”Jehová Diospaqmi t’aqanki ñaupaq wachay toroykitapas ñaupaq wachay orqo ovejaykitapas.+ Aman llank’achinkichu ñaupaq wachay toroykitaqa, aman rutunkichu ñaupaq wachay ovejaykiq willmantapas. 20 Chaytaqa Jehová Diosniykichispa ñaupanpin mijunkichis qanwan wasiykipi kaqkunapiwan. May llaqtatachá Jehová Diosniykichis ajllakunqa chaypin sapa wata mijunkichis.+ 21 Ichaqa chay ñaupaq wachay uywachus wist’upas ñausapas kanman, imanpas mana allin kanman chayqa, aman chaytaqa Jehová Diosmanqa jaywankichischu.+ 22 Chhayna uywataqa wasiykichispin mijupunkichis, imaynan tarukatapas, gacela tarukatapas mijunkichis chhaynata.+ Chaytaqa mijunmanmi qhelli kashaq runapas ch’uya kashaq runapas. 23 Ichaqa aman yawartaqa mijunkichischu,+ chaytaqa unuta jinan pampaman jich’apunkichis.+