Ezequiel
9 Chaymantan juj kunka fuerteta uyarikurqan, chay kunkan nimuwarqan: “¡Llaqta castigaqkunata juñumuy, thuninapaq armantinkama jamuchunku!”, nispa.
2 Chayllamanmi rikurqani soqta qharikunata,+ paykunan wichay ladoman qhawaq jawa punku ladomanta jamushasqaku, sapankankun thuninapaq armayoqkama kasqaku. Paykunawanmi jamushallasqataq linomanta p’achayoq, cinturanpi secretarioq tinta apanan* wataykusqa runa. Paykunan jaykumuspanku cobremanta altarpa ladonpi sayaykurqanku.+
3 Jinaspan Israelpa Diosninpa k’anchayninqa+ maypichus kasqanmanta, querubín angelkuna patamanta jatarispa temploq punkunkama rirqan.+ Diostaq* linomanta p’achayoq, cinturanpi secretarioq tinta apanan wataykusqa runata wajamurqan. 4 Chay runatan Jehová Dios nirqan: “Llaqtantinpi purimuy, Jerusalenpi purimuy, jinaspa llapa llakikuqkunaq mat’inpi marcata churamuy,+ llaqtantinpi millaykuna kasqanmanta waqaqkunaq mat’inpi marcata churamuy”,+ nispa.
5 Jujkunatataq noqa uyarishaqtiy nirqan: “Paypa qhepanta riychis, llaqtapi runakunata ama khuyapayaspa ama llakipayaspa wañuchimuychis.+ 6 Llapanta wañuchimuychis, kuraqkunata, waynakunata, sipaskunata, wawakunata, warmikunata ima.+ Marcasqa kaqkunamanmi ichaqa ama qayllaykunkichischu.+ Ch’uya wasipi kaqkunawanmi qallarinkichis”,+ nispa. Jinan paykunaqa temploq ñaupanpi kaq umalliqkunata* wañuchiyta qallarirqanku.+ 7 Chaymantataq paykunata nirqan: “¡Riychis! Templota qhellichamuychis, patiokunaman wañusqakunata junt’achimuychis”,+ nispa. Paykunataq llaqtapi runakunata wañuchiyta qallarirqanku.
8 Runakunata wañuchishaqtinkun sapallay qhepakurqani, jinan uyanpamanta pampaman kumpakuspa qaparirqani: “¡Ay tukuy munayniyoq Señor Jehová Dios! ¿Llapa Israel runakunatachu wañuchinki? ¿Phiñakuyniykita jich’aykuspachu Jerusalenmanta puchuqkunata llapanta tukuchinki?”,+ nispa.
9 Paytaq nimuwarqan: “Israel runakunaq juchanqa, Judá runakunaq juchapakusqanqa nishu jatunpunin.+ Suyuqa yawarwan junt’an kashan,+ llaqtaqa mana chaninkunawan junt’an kashan.+ Paykunan nishanku: Jehová Diosqa suyunchistan wijch’upun, Jehová Diosqa manan rikumuwanchischu,+ nispa. 10 Noqaqa manan khuyapayasaqchu, manan llakipayasaqchu.+ Llapa mana allin ruwasqankutan paykunaman kutichipusaq”, nispa.
11 Jinan linomanta p’achayoq, cinturanpi secretarioq tinta apanan wataykusqa runaqa kutimuspa nirqan: “Imachus kamachiwasqaykiman jinan ruwamuni”, nispa.