2 Corintios
2 Noqaqa manan munaymanchu jujtawan qankunata waturikuq jamusqay llakipaq kananta. 2 Qankuna kusichiwaqniykunatachus llakichisaykichis chayqa, ¿piñataq kusichiwanmanri? 3 Chaymi chaykunata qelqamurqaykichis, chhaynapi qankunaman chayamuspayqa ama qankuna jawa llakisqa kanaypaq, aswanpas kusisqa kanaypaq; noqaqa allintan yachani imawanpas kusikuqtiyqa qankunapas kusisqallataq kanaykichista. 4 Noqaqa sinchi llakisqa,* may sonqo nanaywanmi waqan-waqanraq qelqamurqaykichis; ichaqa manan llakisqa kanaykichispaqchu chaytaqa ruwamurqani,+ aswanpas anchatapuni qankunata munakusqayta yachanaykichispaqmi.
5 Llakichiqniykichis runaqa+ manan noqatachu llakichiwan, aswanpas qankunatan llakichirqasunkichis, ichaqa manan chaymantaqa nishutachu rimasaq. 6 Ñataq yaqa llapaykichisña chay runataqa anyankichis chayqa, chayllaña kachun. 7 Kunanqa tukuy sonqowan payta perdonaychis kallpachaychis ima,+ mana chayqa paqtapas llakiq ñit’isqan tarikuspa+ pisipapunman.* 8 Chayraykun valekuykichis wajmanta payta munakapunaykichispaq.+ 9 Noqaqa tukuy imapichus kasukuyta yachankichis icha manachus chayta yachanaypaqwanmi qelqamurqaykichis. 10 Pitapas imamantapas perdonankichis chayqa, noqapas perdonanin. Ichaqa pitapas perdonani chayqa, qankunaraykun perdonani, Cristoq ñaupanpitaqmi chaytaqa ruwani, 11 chhaynapi Satanás mana jap’iwananchispaq.*+ Noqanchisqa allintan yachanchis imakunatachus Satanás piensashan chaykunataqa.*+
12 Cristomanta allin willakuykunata willanaypaq Troas llaqtaman+ chayaqtiymi kusapuni kashasqa* Señorpa ruwananpi llank’anaypaq, 13 ichaqa sonqoypin llakisqa kasharqani wayqey Titowan+ mana tupasqay jawa. Chaymi chaypi iñiqmasikunamanta despedikuspay Macedonia+ provinciaman puririrqani.
14 Ichaqa Diosman gracias kachun, paymi guerrapi atipasqankumanta kutimpuq soldadokunata jina Cristowan kuskata pusawanchis, noqanchiswantaq paymanta allin yachayta jinantinman q’aparichin. 15 Noqanchis Cristomanta willaqkunaqa sumaq q’apay jinan kanchis Diospaqqa, chay q’apayqa salvasqa kayman rishaqkunaman, chinkayman* rishaqkunaman iman chayashan. 16 Chinkayman rishaqkunapaqqa wañuy q’apaymi chay q’apayqa, wañuymantaq apanpas;+ salvasqa kayman rishaqkunapaqtaq ichaqa kausay q’apay, kausaymantaq apanpas. Ichaqa, ¿pitaq chayta ruwananpaq jina kashan? 17 Noqanchisyá; ichaqa manan noqanchisqa juj runakuna jina Diospa siminwan negocio ruwaqkunachu kanchis,+ aswanmi noqanchisqa Diospa kachasqan kaspa tukuy sonqowan willashanchis, Diospa ñaupanpitaqmi chaytaqa ruwashanchispas Cristowan jujllachasqa kaspa.