1 Crónicas
28 Rey Davidmi Jerusalén llaqtapi juñurqan llapa Israel umallikunata: Israel ayllukunapi kaq umallikunata, reypa ejercitonpi serviq runakunaq umallinkunata,+ waranqa runakunaq umallinkunata, pachaj runakunaq umallinkunata,+ reypa kaqninkunamanta uywankunamanta encargakuqkunata,+ reypa wawankuna cuidaqkunata,+ reypa palacionpi kaq autoridadkunata, allin kallpasapa allin llank’aq runakunatawan.+ 2 Chaymantataq rey Davidqa sayarispa nirqan:
“Wayqeykuna, kaypi kaq llapa llaqtamasiykuna, uyariwaychis. Noqaqa maytan munarqani Diospaq juj wasita ruwayta, chaypi Jehová Diospa rimanakuynin arca wiñaypaq kananpaq, Diosninchispa chaki sarunan kananpaq ima.+ Chaymi chay wasi ruwakunanpaqqa imaymanata juñumurqani.+ 3 Diosmi ichaqa niwarqan: Qanqa guerrakunapin maqanakurqanki, chaypin askha runakunaq yawarninta jich’arqanki,+ chaymi mana qanchu sutiyta jatunchaq wasitaqa ruwapuwanki,+ nispa. 4 Ichaqa Israelpa Diosnin Jehová Diosmi taytaypa familianpi kaq runakunamanta noqata ajllawarqan Israelpi wiñaypaq rey kanaypaq.+ Paymi Judá aylluta ajllarqan umalli kananpaq,+ Judá ayllu ukhupitaq taytaypa familianta ajllarqan,+ taytaypa churinkunamantataq noqata ajllawarqan Israelpi rey kanaypaq.+ 5 Jehová Diosqa askha wawakunatan qowarqan,+ chay wawaykunamantataq waway Salomonta ajllarqan+ Israelpi kaq Jehová Diospa trononpi kamachikunanpaq.+
6 ”Diosmi niwarqan: Churiyki Salomonmi wasitaqa ruwapuwanqa, paymi pationkunatapas ruwanqa, paytan noqaqa ajllakuni waway kananpaq, noqataqmi taytan kasaq.+ 7 Sichus kamachikuyniykunatapas chaninchayniykunatapas kunan jina kasukushallanqa+ chayqa wiñaypaqmi kamachikuyninta tajyachisaq,+ nispa. 8 Chhaynaqa Israel runakuna, llapa runakunaq ñaupanpi Jehová Diospa ñaupanpi iman kayta niykichis: Kallpachakuychis Jehová Diospa kamachikuyninkunata allinta reqsinaykichispaq kasukunaykichispaqpas. Chayta ruwankichis chayqa kay allin jallp’apin unayta tiyankichis,+ chhaynapin wawaykichispas kay jallp’ata herenciata jina chaskinqaku.
9 ”Qanpas wawáy Salomón, kallpachakuy taytaykiq Diosninta reqsinaykipaq, kusisqa payta serviy tukuy sonqowan.+ Jehová Diosqa llapa runakunaq sonqontan t’aqwin,+ payqa allintan yachan imachus sonqonchispipas yuyayninchispipas kasqanta.+ Sichus Diosta maskhanki chayqa tarinkin,*+ saqenki chaytaq wiñaypaq wijch’upusunki.+ 10 Chhaynaqa wawáy, kallpachakuy, llank’allayña. Kikin Jehová Diosmi qantaqa ajllasunki yupaychana wasinta ruwapunaykipaq”, nispa.
11 Chaymantataq Davidqa churin Salomonman wasi ruwananpaq planokunata qorqan,+ chay planokunan karqan: Diospa wasinman jaykuna jatun punkumanta,+ muyuriqpi kaq cuartokunamantawan; chay cuartokunan karqan mijuy waqaychana cuartokuna, wasi patapi kaq cuartokuna, ukhu cuartokuna, jucha pampachana cuartopiwan.*+ 12 Davidtaqa Diospa espiritunmi yuyaycharqan chay planokunata ruwananpaq. Chay planokunataqa llapantan churin Salomonman qorqan: Jehová Diospa wasinpi kaq patiokunaq+ planonkunata, mijuna wasikunaq planonkunata, valorniyoq cosaskunata waqaychana cuartokunaq planonkunata, Diospaq ch’uyanchasqa* cosaskunata waqaychana cuartokunaq planonkunatapas.+ 13 Chaymantapas Davidqa churintan nillarqantaq imakunapichus ajllasqan sacerdotekunapas,+ Leví runakunapas, Jehová Diospa wasinpi yanapakuq wakin Leví runakunapas llank’anankuta. Nillarqantaqmi ima serviciokunatachus Jehová Diospa wasinpi utilizakunantapas. 14 Paymi nirqan Diosta yupaychanapaq sapanka serviciokunata jayk’a pesaq qorimantachus ruwakunanta, qolqemanta serviciokunatapas jayk’a pesaq qolqemantachus ruwakunanta. 15 Paymi nillarqantaq qorimanta candelerokunatapas+ mecherokunatapas* jayk’a pesaq qorimanta ruwakunanta, qolqemanta candelerokunatapas mecherokunatapas jayk’a pesaq qolqemanta ruwakunanta, 16 Diosman jaywanapaq t’anta* churana sapanka qori mesakunatapas+ jayk’a pesaq qorimantachus ruwakunanta, qolqemanta mesakunatapas jayk’a pesaq qolqemantachus ruwakunanta. 17 Davidmi nillarqantaq ch’uya qorimanta jatun trinchekunatapas, jatun p’ukukunatapas, p’uyñukunatapas jayk’a pesaq qorimantachus ruwakunanta, qorimanta juch’uy p’ukukunatapas+ jayk’a pesaq qorimantachus ruwakunanta, qolqemanta juch’uy p’ukukunatapas jayk’a pesaq qolqemantachus ruwakunanta. 18 Paymi nillarqantaq ch’uya qorimanta incienso q’apachina altartapas,+ Jehová Diospa rimanakuynin arcata mast’arisqa rafrankunawan llanthuykuq qorimanta querubín angelkunatapas jayk’a pesaq qorimantachus ruwakunanta. Chay querubinkunaqa+ Diospa carretanmi.+ 19 Chaymantataq Davidqa nirqan: “Jehová Diosmi atiyta qowarqan, paymi yachayta qowarqan kay planokunata paypa nisqanman jina ruwanaypaq”,+ nispa.
20 Jinan Davidqa churin Salomonta nirqan: “Kallpachakuy wawáy, llank’allayña. Ama manchakuychu nitaq khatatataychu,* Diosniy Jehová Diosqa qanwanmi kashan.+ Jehová Diosqa manan jayk’aqpas saqerparisunkichu,+ payqa qanwanmi kashanqa yupaychana wasinta tukunaykikama. 21 Kaypin kashanku sacerdotekunapas+ Leví runakunapas+ Diospa wasinpi llank’anankupaq. Chaymantapas kaypin kashanku tukuy imaymanapi allin llank’aq runakuna,+ Israelpi umallikuna,+ llapa Israel runakunapas, paykunaqa liston kashanku ima kamachisqaykitapas ruwanankupaq”, nispa.