1 Reyes

21 Jezrel llaqtayoq Nabotpan uvas chajran karqan Jezrel+ llaqtapi, chay chajraqa kasharqan Israel* rey Ajabpa palacionpa qayllanpin. 2 Jinan Ajabqa Nabot-ta nirqan: “Wasiy qayllapi kaq uvas chajraykita qopuway huertata chaypi ruwakunaypaq. Chaypa rantinpitaq aswan allin uvas chajrata qopusayki, mana chaytaq vendepuway”, nispa. 3 Nabotmi ichaqa nirqan: “Manapunin chay chajraytaqa qoykimanchu, chayqa ñaupa taytaykunaq saqewasqan herencian. Chayta ruwayman chayqa Jehová Dioschá mana allinpaq qhawariwanman”,+ nispa. 4 Nabot chayta niqtinmi Ajabqa llakisqa phiñasqa ima wasinman ripurqan. Chaymantataq puñunanman suchuykuspa perqa ladoman kutirirqan, manataq mijuytapas munarqanchu.

5 Jinan esposan Jezabelqa+ Ajabpa kasqanman rispa nirqan: “¿Imamantan llakisqa kashanki? ¿Imaraykun mana mijuyta munankichu?”, nispa. 6 Ajabtaq nirqan: “Nabot-tan nirqani: Uvas chajraykita vendepuway, mana chaytaq juj uvas chajrawan cambiasun, nispa. Paymi ichaqa mana qoyta munawanchu”, nispa. 7 Chaymi Jezabelqa nirqan: “¿Reychu kanki icha manachu? ¿Chhaynatachu Israel runakunata kamachinki? ¡Sayariy, mijuy! ¿Imamantan llakikunki? Noqan Nabotpa uvas chajrantaqa qosayki”,+ nispa. 8 Jinan Jezabelqa Ajabpa sutinpi cartakunata qelqarqan, jinaspa Ajabpa sellonwan sellarqan,+ chaytataq Nabotpa llaqtanpi tiyaq umalliqkunaman*+ kamachikuqkunamanwan apachirqan. 9 Chay cartapin Jezabelqa nirqan: “Ayunanankupaq llapa runakunata kamachiychis, Nabot-tataq chay runakunaq ñaupanman wajachiychis. 10 Chaymantataq iskay mana valeq runakunata wajachiychis Nabot contra khaynata ninankupaq:+ ¡Kay runatan uyariyku Diostawan reytawan ñakaqta!,+ nispa. Chay qhepamantaq llaqtamanta orqospa rumiwan ch’aqespa wañuchinkichis”,+ nispa.

11 Jinan chay llaqtapi tiyaq runakunapas, umalliqkunapas, kamachikuqkunapas Jezabelpa carta apachisqanman jina lliuta ruwarqanku. 12 Runakunatan ayunanankupaq kamachirqanku, chaymantataq Nabot-ta llapa runakunaq ñaupanman wajachispa chaypi tiyaykachirqanku. 13 Jinan chay iskay mana valeq runakunaqa chayamuspa Nabotpa ñaupanpi tiyaykurqanku, jinaspa llapa runakuna uyarishaqtin Nabot contra nirqanku: “¡Kay runatan uyariyku Diostawan reytawan ñakaqta!”,+ nispa. Chaymantataq llaqta jawaman orqospa chaypi rumiwan ch’aqespa wañuchirqanku.+ 14 Jinan Jezabelman willachimurqanku: “Nabot-taqa rumiwan ch’aqespan wañuchipunku”,+ nispa.

15 Nabot-ta wañuchipusqankuta yacharuspan Jezabelqa Ajabta nirqan: “Jezrel llaqtayoq Nabotqa ñan wañupunña. Kunanqa uvas chajranta jap’ikapuy”,+ nispa. 16 Jezrel llaqtayoq Nabotpa wañupusqanta yacharuspan Ajabqa usqhaylla rirqan Nabotpa chajranta jap’ikapuq.

17 Jehová Diosmi ichaqa Tisbe llaqtayoq Eliasta nirqan:+ 18 “Phaway riy Nabotpa chajranman, chaypin kashan Samariapi tiyaq Israel rey Ajab,+ payqa chay chajrata jap’ikapunanpaqmi chayman rin. 19 Paytan khaynata ninki: Jehová Diosmi nin: ¿Nabot-ta wañurachispachu+ kunanqa chajrantañataq jap’ikapushanki?,+ nispa. Chaymantapas khaynatan nillankitaq: Jehová Diosmi nin: Maypichus Nabotpa yawarninta alqokuna llaqwarqanku, chaypin qanpa yawarniykitapas alqokuna llaqwallanqakutaq,+ nispa”.

20 Chaymantataq Ajabqa Eliaswan tupaspa nirqan: “¡Yau enemigoy runa, kunanqa tariruwankin!”,+ nispa. Jinan Eliasqa nirqan: “Arí tariruykin, Jehová Diosmi khaynata nisunki: Cheqnikusqay ruwaykunata astawanraq ruwasqaykiraykun+ 21 ñak’arichisayki. Qantapas familiaykimanta kaq qharikunatapas* lliutan Israelmanta chinkachipusaykichis,+ pisichasqakunatapas pisi kallpakunatapas lliutan chinkachisaq.+ 22 Noqata phiñachiwasqaykirayku, Israel runakunatapas juchallichisqaykiraykun familiaykita lliuta chinkachisaq, imaynan Nebajpa churin Jeroboanpa familianta, Aiyaq churin Basapa familianta chinkachirqani jinata,+ nispa. 23 Jezabelmantataq Jehová Dios nin: Jezrel jallp’apin aychanta alqokuna mijunqaku,+ nispa. 24 Chaymantapas qantan nillasunkitaq: Familiaykimanta llaqtapi wañuqkunatan alqokuna mijunqaku, campopi wañuq familiaykikunatataq phalaq animalkuna mijunqaku.+ 25 Qan jinaqa manan pipas noqa Jehová Diospa cheqnisqay ruwaykunataqa chhaynata ruwarqanchu,+ qanqa esposayki Jezabelpa kallpachasqanmi tukuy chaykunata ruwarqanki.+ 26 Qanqa amorreo runakuna jinan millakunapaq idolokunata yupaychaspa millay ruwaykunata ruwarqanki. Chay runakunata qarqospan noqa Jehová Diosqa Israel runakunaman chay jallp’ata qopurqani,+ nispa”.

27 Chayta uyarispa jinan Ajabqa p’achanta llik’ikurqan, jinaspa qhasqa p’achawan churakurqan, chay p’achawantaqmi puñuqpas. Chaymantapas ayunaqmi, khuyaytaq puriqpas. 28 Chaymantataq Jehová Diosqa Tisbe llaqtayoq Eliasta nirqan: 29 “¿Rikushankichu imachus nisqayrayku Ajabpa juch’uyaykukusqanta?+ Chhayna juch’uyaykukusqanraykun mana kausasqan tiempopichu familianmanqa ñak’ariyta apachimusaq, aswanpas churinpa kamachikusqan tiempopiñan chaytaqa ruwasaq”,+ nispa.