2 Corintios

6 Chaymantapas Diospa llank’aysiqmasinkuna kasqaykuraykun niykiku:+ Ama yanqapaqchu Diospa ancha sumaq sonqo kaynintaqa chaskiychis.+ 2 Paymi nin: “Chaskina tiempopin uyarirqayki, salvana tiempopin yanaparqayki”,+ nispa. Kayqá, kunanmi Diospa chaskinan tiempo kashan, kunanmi salvanan p’unchaypas kashan.

3 Noqaykuqa manan pitapas urmachinapaq jinachu imatapas ruwayku, chhaynapi Diospaq llank’asqaykumanta ama pipas mana allinta rimashananpaq.+ 4 Aswanmi noqaykuqa imaymanakunawan rikuchiyku Diospa kamachinkuna kasqaykuta:+ Imaymana pruebakunata aguantaspa, imaymana ñak’ariykunapi tarikuspa, pisichikuykunapi tarikuspa, imaymana sasachakuykunapi tarikuspa;+ 5 soq’asqa kaspa, carcelkunapi wisq’asqa kaspa,+ ch’aqwaykunata pasaspa, sinchita llank’aspa, mayninpi mana puñusqa, mayninpi mana mijusqa ima.+ 6 Diospa kamachinkuna kasqaykutan rikuchillaykutaq ch’uyata kausaspa, allin yachayman jina imatapas ruwaspa, pacienciawan imatapas aguantaspa,+ sumaq sonqo kaspa,+ santo espirituwan pusachikuspa, tukuy sonqowan* munakuspa,+ 7 cheqaq kaqta rimaspa, Diospa atiyninman jap’ipakuspa,+ chanin kaq armakunata paña makipi lloq’e makipi ima jap’ispa;+ 8 jatunchasqa kaspa, pisichasqa kaspa; runakunaq k’amisqan kaspa, runakunaq alabasqan kaspa; engañaqkunata jinaña qhawariwaqtinkupas, cheqaq kaqta rimaspa; 9 mana reqsisqata jinaña qhawariwaqtinkupas, Diospa allin reqsisqan kaspa; wañuyman qarasqaña kashaspapas, Diospa munayninpi kausaspa;+ castigasqaña* kashaspapas, mana wañuchisqa kaspa;+ 10 khuyayña purishaspapas, kusisqallapuni kaspa; wajchaña kashaspapas, jujkunata qhapaqyachispa; mana imayoqña kashaspapas, tukuy imaymanayoq kaspa ima.+

11 Corinto llaqtapi wayqellaykuna,* noqaykuqa sut’itan imatapas nimushaykiku, tukuy sonqowantaqmi qankunataqa munakuykikupas.* 12 Noqaykuqa manan sonqoykuta wisq’aykuchu qankunapaq,+ qankunan ichaqa sonqoykichista wisq’awankiku. 13 Noqaqa wawaykunata jinan rimapayamushaykichis, chhaynaqa, imaynan noqayku rikuykiku chhaynatayá qankunapas rikuwayku; sonqoykichista jatunta kichariychis.+

14 Amapuni mana iñiqkunawanqa yugomanpas watasqa kashawaqchis jinataqa jujllachakuychischu,+ chay jujllachakuyqa manan tupanmanchu. ¿Tupanmanchu chanin kay mana chanin kaywan?+ ¿Imallapipas igualchu kanman k’anchaywan laqhayaqwan?*+ 15 ¿Imallapipas tupachinkumanchu Cristowan Satanaswan?*+ ¿Imapitaq igual kankuman iñiq runa mana iñiq runawan?+ 16 ¿Kanmanchu Diospa wasinpi idolokuna?+ Noqanchismi kausaq Diospa wasinqa kanchis.+ Diospunin nirqan: “Noqan paykuna ukhupi tiyasaq,+ paykuna ukhupin purisaqpas. Noqan Diosninku kasaq, paykunataq llaqtay kanqaku”,+ nispa. 17 Jehová* Diosqa nillarqantaqmi: “Chayrayku lloqsipuychis paykuna ukhumanta, arí, t’aqakuychis paykunamanta, amaña llamiykuychisñachu imachus qhelli kaqta”,+ “jinan noqaqa chaskisaykichis”,+ nispa. 18 Tukuy atiyniyoq Jehová* Diosqa nillantaqmi: “Noqan qankunaq taytaykichis kasaq,+ qankunataq churiykuna ususiykuna ima kankichis”,+ nispa.