Isaías
9 Ichaqa, chay laqhayayqa* manan ñaupa tiempopi jinachu kanqa, manan Zabulón jallp’ata Neftalí jallp’ata+ pisichasqanku tiempopi jinachu kanqa, chay tiempopiqa sinchi llakipin jallp’aqa kasharqan. Jamuq tiempomanmi Diosqa Jordán mayu qayllapi, lamar-qochaman riq ñanpi kaq waj nacionkunaq tiyasqan Galilea jallp’ata respetachinqa.
2 Tutayaqpi kaq runakunan,
juj jatun k’anchayta rikunku.
Sinchi laqhayaqpi tiyaq runakunamanmi,
k’anchay k’anchaykamun.+
3 Qanmi kay nacionta askhaman tukuchirqanki,
qanmi paykunata anchata kusichirqanki.
Paykunaqa ñaupaykipin anchata kusikunku,
cosecha tiempopi jinan kusikunku,
maqanakuypi qechusqankuta rakinakuqkuna jinan kusikunku.
4 Qanmi ñut’uman tukuchirqanki q’episqanku yugota,
rijrankupi apasqanku varata, capatazpa q’asunan* taunatapas;
Madianta atipasqayki p’unchaypi jinan chayta ruwarqanki.+
5 Purispa pampataraq kuyurichiq botaskunapas,
llapa yawarkama p’achankupas llant’a jinan ninapaq kanqa.
6 Juj qhari wawan nacepuwanchis,+
Diosmi juj qhari wawata qowanchis;
paypa makinpin kamachikuyqa kanqa,+
paytan sutichanqaku: “Sumaq Yuyaychaq,+ Atiyniyoq Dios,+ Wiñaypaq Tayta, Thaj Kaywan Kamachikuq”, nispa.
7 Kamachikuyninqa lliumanmi mast’arikunqa,
thaj kaypas wiñaypaqmi kanqa;+
chhaynan kanqa Davidpa trononpiqa,+ kamachikuyninpipas.
Paypa kamachikuyninqa allin tajyachisqan kanqa,+
chaninmi kanqa,+ allin kaqta ruwaqmi kanqa,+
kunanmanta wiñay-wiñaypaqmi chhayna kanqa.
Ejercitokunata kamachiq Jehová Diosmi ancha sienteq kasqanrayku chayta ruwanqa.
8 Jehová Diosmi Jacob contra juj willakuyta apachimun,
chay willakuyqa Israel contran chayamun.+
9 Chaytaqa llapankun yachanqaku,
Efraín ayllumanta llapa runakuna, Samaria llaqtamanta llapa runakuna.
Paykunan mana respetoyoq kasqankurayku jatunchakuspa ninku:
10 “Ladrillokunan urmapun,
allin rumikunawanmi perqasunchis.+
Sicómoro sach’akunan wit’usqa kapun,
chaymanqa cedro sach’akunatan plantasunchis”, nispa.
11 Jehová Diosmi Rezinpa enemigonkunata Israel contra apamunqa,
paymi tanqanqa Israelman phawaykunankupaq.
12 Siria runakunan inti lloqsimuy ladomanta jamunqaku,
Filistea runakunataq inti jaykuy ladomanta jamunqaku,+
siminkuta kicharispan Israel runakunata mijupunqaku.+
Chaywanpas Diospa phiñakuyninqa manan tiyaykunchu,
makintaqa oqarishallanmi waqtananpaq.+
13 Paykunaqa manan wanachiqninku Diosmanqa kutirikunkuchu,
manan ejercitokunata kamachiq Jehová Diostaqa maskhankuchu.+
14 Chaymi Jehová Diosqa Israelpa umantapas chupantapas wit’unqa,
juj p’unchayllapin ch’ijchimuq plantatapas carrizotapas* wit’unqa.+
15 Umaqa ancha respetasqa umalliqkunan* kanku,
chupataq pantasqa yachachikuykunata yachachiq profetakuna kanku.+
16 Kay llaqta runakunata pusaqkunaqa astawanmi runakunata waqllichinku,
pusachikuq runakunapas astawanmi chinkapunku.
17 Chaymi Jehová Diosqa chay llaqtapi waynakunawan mana kusisqachu kanqa,
manan khuyapayanqachu mana taytayoqkunatapas ni viudakunatapas;
llapa paykunaqa Diosmanta t’aqakuspa pay contra jatariqkunan* kanku, millay runakunan kanku,+
siminkumantapas yanqa rimaykunallan lloqsimun.
Chaymi Diospa phiñakuyninqa mana tiyaykunchu,
makintaqa oqarishallanmi waqtananpaq.+
18 Mana allin ruwaykunaqa nina jinaraqmi raurarin,
kiskakunata mana allin qorakunatan ruphan.
Sach’a-sach’a ukhukunapi ch’afrakunan* ruphasqa kapunqa,
phuyu jinaraqmi q’osñipas altoman seqarinqa.
19 Ejercitokunata kamachiq Jehová Diospa phiñakusqanwanmi
kay jallp’aqa kanaykusqa kashan,
llapa runakunan ninapaq llant’a jina kanqaku.
Manan pipas ni wayqentapas khuyapayanqachu.
20 Juj runan paña ladonta kuchunqa,
ichaqa yarqasqallan kashanqa;
juj runataq lloq’e ladonta mijunqa,
ichaqa manan sajsanqachu.
Sapankan maki aychanta mijunqa.
21 Manasesmi Efrainta mijunqa,
Efraintaq Manasesta mijunqa.
Paykunaqa Judá contran kanqaku.+
Chaywanpas Diospa phiñakuyninqa manan tiyaykunchu,
makintaqa oqarishallanmi waqtananpaq.+