Jueces

19 Chay tiempopin Efraín orqo-orqopi+ kaq karu llaqtapi tiyaq Leví ayllu runa, Judapi kaq Belén+ llaqtayoq warmita munakurqan tiyaqmasin warmi* kananpaq. Chay tiempopaqqa manaraqmi rey karqanchu Israel llaqtapi.+ 2 Chay warmin Leví ayllu runata juj qhariwan engañarqan, jinaspa payta wijch’uspa taytanpa wasinman ripurqan, chaypin tiyasharqan tawa killaña. Taytanpa wasinqa Judapi kaq Belén llaqtapin kasharqan. 3 Chay qhepamanmi qosanqa jujnin qhari kamachinta pusarikuspa iskay asnontin payta maskhaq rirqan. Chayaqtintaq chay warmiqa taytanpa wasinman jaykuchirqan. Payta rikuspan taytanqa anchata kusikurqan. 4 Chaymi payta valekurqan kinsa p’unchay chaypi qhepakunanpaq. Jinan paykunaqa mijurqanku tomarqanku ima, chay tutakunaqa suegronpa wasinpin Leví ayllu runaqa puñurqan.

5 Tawa kaq p’unchaypitaq Leví ayllu runaqa tutallamanta jatarimurqan ripunanpaq. Chay warmiq taytanmi ichaqa nirqan: “Kallpata jap’inaykipaq imallatapas mijuruy, chaymantaña pasapunkichis”, nispa. 6 Jinan paykunaqa qhepakurqanku, jinaspa iskayninku mijurqanku tomarqanku ima. Chaymantataq chay warmiq taytanqa nirqan: “Qhepakullayña, kay tutatawan kaypi sumaqta pasariy”, nispa. 7 Chay runa ripunanpaq sayariqtintaq suegronqa rogarqan qhepakunanpaq, jinan payqa chay tutatawan chaypi qhepakurqan.

8 Pisqa kaq p’unchaypas chay runaqa tutallamantan jatarimurqan ripunanpaq. Suegronmi ichaqa nillarqantaq: “Kallpata jap’inaykipaq imallatapas mijuruy”, nispa. Jinan iskayninku mijurqanku, mijushananku rimashanankukamataq tardeña kapurqan. 9 Chay runa tiyaqmasin warmiwan kamachinpiwan ripunanpaq jatariqtintaq suegronqa nirqan: “Qhawariy, ñan tardeña kashan, tutayashanñan. Kayllapiña qhepakuy, kunan tutatawan kaypi sumaqta pasariy. Paqarinña tutallamanta wasiykiman pasapunki”, nispa. 10 Chay runan ichaqa manaña munarqanchu chay tutatawan chaypi qhepakuyta. Aswanmi sayarispa ripurqan, jinaspa chayarqan Jebús llaqtaman, chaytan nikullantaq Jerusalén+ nispa. Payqa tiyaqmasin warmintin, kamachintin, iskaynin asnokunantin iman ripurqan.

11 Jebús llaqtaman qayllaykuqtinkuqa ñan tardeña kasharqan. Jinan kamachinqa nirqan: “¿Jebús runakunaq llaqtallanmanña alojakuq jaykusunman chayri?”, nispa. 12 Patronnintaq nirqan: “Manan juj runakunaq llaqtanmanqa jaykusunmanchu, Israel runakunaq tiyasqan llaqtallamanpunin chayananchis. Jaku Guibeá+ llaqtakama”, nispa. 13 Patronninqa nillarqantaqmi: “Jaku, imaynatapas chayarusunpuni Guibeá llaqtaman otaq Ramá+ llaqtamanpas. Chay llaqtakunapiña mayqenpipas alojakusunchis”, nispa. 14 Jinan paykunaqa rishallarqanku, Guibeá llaqtaman qayllaykushaqtinkuqa ñan intiqa chinkayapusharqanña. Guibeá llaqtaqa Benjamín ayllupin kasharqan.

15 Jinan paykunaqa Guibeá llaqtaman jaykurqanku chaypi qhepakunankupaq. Llaqta ukhupiña kashaspankutaq plazapi tiyaykurqanku pillapas alojaykunanpaq, ichaqa manan pipas wasinman wajaykurqanchu.+ 16 Tutayaykuyta jinañan juj kuraq runa rijurimurqan, payqa chajrapi llank’asqanmantan kutimpushasqa. Chay runaqa Efraín orqo-orqomantan+ karqan, juj tiempollan Guibeá llaqtapi tiyasharqan. Chay llaqtapi tiyaq runakunan ichaqa Benjamín ayllumanta+ karqanku. 17 Chay kuraq runaqa plazata qhawarispan rikurqan chaypi runa tiyashaqta, jinan payman asuykuspa tapurqan: “¿Maymantan jamushanki? ¿Maytan rishanki?”, nispa. 18 Jinan payqa nirqan: “Judapi kaq Belenmantan+ jamushayku, chaymantataq Efraín orqo-orqopi kaq karu llaqtamanraq ripusaqku, chaymantan noqaqa kani. Judapi kaq Belenmanmi rirqani, kunantaq Jehová Diospa wasinman rishani,* ichaqa manan pipas wasinman wajariwanchu. 19 Kashanmi tiyaqmasiy warmipaqpas kamachiypaqpas t’antayku+ vinoykupas. Asnoykupaqpas kashanmi pajaykupas forrajeykupas,+ manan imaykupas faltawankuchu”, nispa. 20 Chay kuraq runataq nirqan: “¡Allinmi jamurqanki! Jaku wasiyta, ¿imaynataq kay plazapiri illariwaq?”, nispa. 21 Jinan chay runaqa wasinman pusaspa asnonkunaman mijuchirqan. Paykunataq chakinkuta maqchikusqanku qhepaman mijurqanku tomarqanku ima.

22 Sumaqta mijushaqtinku tomashaqtinkun mana valeq millay runakuna chay wasita muyuykurqanku, jinaspa punkuta takayta qallarirqanku. Chay wasiyoq kuraq runatataq nirqanku: “¡Wasiykimanta chay runata orqomuy, paywan puñuytan munayku!”,+ nispa. 23 Wasiyoq runataq lloqsimuspa paykunata nirqan: “Wayqeykuna, ¿imaynataq khayna millaytari ruwawaqchis? Kay runataqa noqan alojashani. P’enqaytan kaytaqa ruwawaqchis. 24 Kaypin kashan mana pi qhariwan puñuq ususiy, alojasqay runaq tiyaqmasin warmipas. Paykunata aswan orqomusaq, munankichis chayqa paykunata ima munasqaykichistapas ruwaychis.+ Kay runata ichaqa ama imanaychispaschu”, nispa.

25 Chay runakunan ichaqa mana kasukurqankuchu. Chaymi chay Leví ayllu runaqa tiyaqmasin warmita+ orqomuspa paykunaman entregarqan. Jinan chay runakunaqa chay warmita tutantin violarqanku, illarimunankaman chayta ruwarqanku. P’unchayamushaqtinñan kacharipurqanku. 26 Chay warmitaq alojaqninku runaq wasinman, maypichus qosan* kasharqan chayman rirqan. Chaypin wasi punkupi wijch’ukurqan, allinta p’unchayamunankaman chaypi kasharqan. 27 Leví runa wasinman ripunanpaq tutallamanta jatarimuspa punkuta kichaqtintaq tiyaqmasin warmiqa wasi punkupi wijch’urayashasqa, makinkunata punku sarunaman churaspa. 28 Jinan chay runaqa nirqan: “Jatariy, jaku ripullasunña”, nispa. Chay warmin ichaqa manaña rimarirqanchu. Chayta reparaspan chay runaqa asnonman cargarqan jinaspa wasinman ripurqan.

29 Wasinman chayaspataq cuchillota* jap’ispa chay wañusqa cuerpota chunka iskayniyoqman kuchuspa t’aqarqan. Chaytataq Israelpi sapanka aylluman apachirqan. 30 Chayta rikuspan Israel runakunaqa nirqanku: “Manamá jayk’aqpas kayqa pasarqanchu Israel runakuna Egiptomanta lloqsimusqankumantapachaqa. Allinta kayta qhawariychis, jinaspa sapankaykichis parlariychis+ imata ruwananchispaqpas”, nispa.