Jueces
3 Jehová Diosqa jinallatan saqerqan Canaán jallp’api wakin nacionkunata, chhaynapi Canaanpi guerrata mana rikuq qhepa wiñay Israel runakunata pruebaman churananpaq.+ 2 (Chaytaqa ruwarqan guerrata mana rikuq qhepa wiñay Israel runakuna imaynachus guerra kasqanta yachanankupaqmi). 3 Chaypaqmi qheparqan Filisteapi pisqantin kamachikuqkuna,+ Canaán runakunapiwan. Jinallataq Sidón runakuna,+ Líbano orqo-orqopi heveo runakunapiwan,+ paykunaq jallp’anmi karqan Baal-Hermón orqomanta Lebó-Amajkama.*+ 4 Paykunan karqan Israel runakunata pruebaman churananpaq. Chhaynapin Jehová Diosqa yachanan karqan Moisesman qosqan kamachikuykunata junt’anqakuchus icha manachus chayta.+ 5 Chaymi Israel runakunaqa tiyarqanku Canaán runakuna,+ Het runakuna, amorreo runakuna, perizita runakuna, heveo runakuna, Jebús runakuna ukhupi. 6 Chay runakunaq ususinkuwanmi casarakuqku, ususinkutapas chay runakunaq churinkuwanmi casarachiqku. Chaymantapas paykunaq diosninkutan adorayta qallarirqanku.+
7 Chaykunata ruwaspan Israel runakunaqa Jehová Diospa cheqnisqan ruwaykunata ruwarqanku. Jehová Diosta qonqaspan Baal idolokunata+ sayashaq k’ullukunatawan*+ adorarqanku. 8 Chaykunata rikuspan Jehová Diosqa sinchita phiñakurqan Israel runakunapaq, chaymi Mesopotamiapi* Cusán-Risatain reyman entregarqan. Chay reytan Israel runakunaqa pusaq wata servirqanku. 9 Jinan Israel runakunaqa Jehová Diospa yanapayninta mañakurqanku,+ jinan Jehová Diosqa juj libraqta churarqan;+ paymi karqan Quenazpa churin Ojniel.+ Quenazqa Calebpa sullk’a wayqenmi karqan. 10 Jehová Diospa espiritunmi Ojnielman junt’aykurqan+ jinan payqa Israel runakunaq jueznin karqan. Guerraman riqtintaq Jehová Diosqa payman entregarqan Mesopotamiapi* Cusán-Risatain reyta, chaymi payqa chay reyta atiparqan. 11 Chay qhepamanqa tawa chunka watan Israel runakunaqa thajpi kausarqanku. Chaymantataq Quenazpa churin Ojnielqa wañukapurqan.
12 Chay qhepamanmi Israel runakunaqa Jehová Diospa ñaupanpi mana allin ruwaykunata jujmanta ruwallarqankutaq.+ Chaymi Jehová Diosqa Moab+ llaqtapi rey Eglonta Israel runakunamanta aswan atiyniyoqman tukuchipurqan. Jehová Diospa ñaupanpi mana allinkunata ruwasqankuraykun chayta ruwarqan. 13 Jinaspapas rey Eglonqa Anmón runakunata+ Amalec runakunatawanmi+ pusamurqan. Paykunan Israel runakunata atipaspa askha palmera sach’akunayoq llaqtata* jap’ikapurqanku.+ 14 Israel runakunaqa chunka pusaqniyoq watan Moab llaqta rey Eglonta servirqanku.+ 15 Jinan Israel runakunaqa Jehová Diospa yanapayninta jujmanta mañakurqanku.+ Jehová Diostaq churarqan juj libraqta,+ paymi karqan Benjamín ayllumanta+ Guerapa churin Ehúd,+ payqa lloq’enchun karqan.+ Tiempowanmi Israel runakunaqa Ehudwan impuestota apachirqanku Moab llaqta rey Eglonman. 16 Manaraq rishaspan Ehudqa ruwakurqan iskay filoyoq espadata, chay espadaqa iskay cuarta jinan* karqan, chaytataq paña chakanman watakurqan, p’achan ukhuman. 17 Apasqan impuestotataq Moab llaqta rey Eglonman qorqan. Chay reyqa sinchi gordollañan karqan.
18 Impuestota pagaspataq Ehudqa yanapaqninkunawan kuska ripurqan. 19 Guilgal+ qayllapi rumimanta idolokuna ruwasqankuman chayaspataq payqa kutirqan, jinaspa reyta nirqan: “Reyníy, juj willakuytan qanllapaq apamushayki”, nispa. Reytaq chaypi kaqkunata nirqan: “¡Lloqsiychis!”, nispa. Jinan llapanku lloqsirqanku. 20 Rey Eglón wasi techonpi llanthukunan cuartopi sapallan tiyashaqtinmi Ehudqa chayman jaykurqan, jinaspa nirqan: “Diospa willakuynintan apamushayki”, nispa. Jinan chay reyqa trononmanta* jatarirqan. 21 Ehudtaq lloq’e makinwan espadanta orqorukuspa Eglonta wijsanpi sat’irurqan. 22 Espadaqa mangontinraqmi reypa wijsanman chinkaykurqan, chaymi Ehudqa manaña orqorqanchu espadanta. Reypa jatun jisp’ayninraqmi chayninta phawamurqan. 23 Ehudqa punkukunata allinta wisq’aspan ventananta lloqsipurqan. 24 Ehúd pasapuqtinñan reypa kamachinkunaqa jamurqanku, jinaspa wisq’asqata punkuta tarirqanku. Chaymi nirqanku: “Ukhu cuartopichá jisp’akushan”, nispa. 25 Manapuni kichakamuqtinmi paykunaqa sayarayasqankupi “imachu pasarunpas” nispanku llaveta apamuspa cuartoq punkunta kicharqanku. ¡Chaypin reyninkuqa wañusqa kumparayashasqa!
26 Punkukunata kichashanankukaman Ehudqa escapakurqan, jinaspa Guilgalpi rumimanta idolokuna ruwanankuta pasaspa+ Seiraman chayarqan. 27 Chayman chayaspan Ehudqa Efraín orqo-orqopi+ oveja waqrata tocarqan,+ jinan Israel runakunaqa chay orqo-orqokunamanta uraykamurqanku, Ehudmi paykunata umallirqan. 28 Jinan nirqan: “Qhepayta jamuychis Jehová Diosmi enemigoykichis Moab runakunata entregasunkichis”, nispa. Chaymi Israel runakunaqa paypa qhepanta jaykurqanku, jinaspa Jordán mayu chimpanakunapi sayarqanku Moab runakuna mana chimpananpaq. 29 Chay kutin chunka waranqa allin kallpasapa Moab runakunata wañuchirqanku.+ Manan jujpas ayqekurqanchu.+ 30 Chay p’unchaymi Israel runakunaqa Moab runakunata atiparqanku, chhaynapin pusaq chunka wata thaj kausarqanku.+
31 Chaymantataq Anajpa churin Sangar+ juez karqan, paymi soqta pachaj Filistea runakunata wañuchirqan+ waka qatina t’urpunawan.+ Chhaynapin Israel runakunata librarqan.