2 Crónicas
36 Chaymantataq Judá ayllu runakunaqa Josiaspa churin Jehoacazta+ Jerusalén llaqtapi papanpa rantinpi reyta churarqanku.+ 2 Jehoacazqa iskay chunka kinsayoq watanpi kashaspan rey kapurqan, kinsa killataqmi Jerusalén llaqtamanta kamachikurqan. 3 Egipto reymi ichaqa Jerusalenpi kamachikusqanmanta orqopurqan, Judá ayllu runakunatataq pagachirqan pachaj talento* pesaq qolqeta, juj talento pesaq qoritawan.+ 4 Chaymantapas Egipto rey Nekoqa+ Jehoacazpa wayqen Eliaquintan reyta churarqan Judá ayllu runakunata Jerusalén llaqtapi tiyaq runakunata kamachinanpaq, Jehoiaquin nispataq suticharqan. Jehoacaztan ichaqa Egiptoman apapurqan.+
5 Iskay chunka pisqayoq watanpi kashaspan Jehoiaquinqa+ rey kapurqan, chunka jujniyoq watataqmi Jerusalén llaqtamanta kamachikurqan. Jehoiaquinqa Jehová Diospa cheqnisqan ruwaykunatan ruwarqan.+ 6 Jinan Babilonia rey Nabucodonosorqa+ Jehoiaquinwan maqanakuq jamurqan, jinan cobremanta iskay cadenakunawan wataspa Babiloniaman apapurqan.+ 7 Chaymantapas Nabucodonosorqa Jehová Diospa wasinmantan Dios yupaychana serviciokunata Babiloniaman apapurqan, chaykunatataq palacionman churarqan.+ 8 Jehoiaquinpa kausayninmanta wakin willakuykunapas, millay ruwasqankunapas, mana allinkuna ruwasqanta tarisqankupas lliumi qelqasqa kashan Israel reykunamanta Judá ayllu reykunamanta willaq libropi. Chay qhepamantaq churin Joaquín paypa rantinpi rey kapurqan.+
9 Joaquinqa+ chunka pusaqniyoq watanpi kashaspan Judá ayllupi rey kapurqan, kinsa killata chunka p’unchaytawantaq Jerusalén llaqtamanta kamachikurqan. Joaquinqa Jehová Diospa cheqnisqan ruwaykunatan ruwarqan.+ 10 Wata qallariyta jinan rey Nabucodonosorqa Joaquinta Babiloniaman apachimurqan,+ paytawan kuskatataq apamurqanku Jehová Diospa wasinpi kaq valorniyoq cosaskunata.+ Taytanpa wayqen Sedequiastataq churarqan Judá ayllu runakunata Jerusalén llaqta runakunata kamachinanpaq.+
11 Sedequiasqa+ iskay chunka jujniyoq watanpi kashaspan rey kapurqan, chunka jujniyoq watataqmi Jerusalén llaqtamanta kamachikurqan.+ 12 Sedequiasqa Jehová Diosninpa cheqnisqan ruwaykunatan ruwarqan. Chaymi Jehová Diosqa profeta Jeremiasta+ kamachirqan Sedequiaswan rimananpaq, Sedequiasmi ichaqa paypa nisqanta mana uyarirqanchu. 13 Rey Nabucodonosorña Diospa sutinpi Sedequiasta jurachirqan chaypas, payqa rey Nabucodonosor contran sayarirqan.+ Sedequiasqa k’ullu sonqopunin karqan, chaymi mana munarqanchu Israelpa Diosnin Jehová Diosman kutirikuyta. 14 Sacerdotekunaq umallinkunapas lliu runakunapas nishutapunin Jehová Diospa cheqnisqan ruwaykunata ruwarqanku, imaynan waj nacionkuna ruwarqanku jinata. Paykunaqa Jerusalenpi kaq Diospa ch’uyanchasqan wasintan qhellicharqanku.+
15 Ñaupa taytankuq Diosnin Jehová Diosmi Judá ayllu runakunaman sapa kutilla willachirqan mana allin ruwasqankuta saqepunankupaq. Chaytan payqa sapa kuti willachirqan llaqtanta khuyapayasqanrayku templontapas munakusqanrayku. 16 Paykunan ichaqa Diospa profetankunamanta burlakuyta qallarirqanku.+ Diospa nisqantapas manan uyarirqankuchu,+ profetankunatapas asipayarqankun.+ Paykunaqa manan cambiarqankuñachu, chaymi Jehová Diosqa llaqtan contra sinchitapuni phiñakurqan.+
17 Chaymi Diosqa paykuna contra kachamurqan Caldea runakunaq reyninta,+ paymi waynakunata espadawan wañuchirqan+ Diospa ch’uya wasinpi.+ Payqa manapunin khuyapayarqanchu waynakunatapas, sipaskunatapas, kuraq runakunatapas,+ mana kallpayoq runakunatapas. Diosqa llapantapunin paykunata Caldea reypa makinman entregarqan.+ 18 Jinan Diospa wasinmanta jatun serviciokunatapas juch’uy serviciokunatapas llapanta apapurqan. Chaymantapas llapantan Babiloniaman apapurqan Jehová Diospa wasinpi kaq valorniyoq cosaskunata, reypa wasinpi kaq valorniyoq cosaskunata, autoridadkunaq kaqninkunatapas.+ 19 Chaymantapas Diospa wasintan ninawan kanaykurqan,+ Jerusalén llaqtaq perqankunatapas thunirqan,+ allin perqasqa torrekunatapas ninawan kanaykurqan, llapa valorniyoq cosaskunatapas llapantan ch’usaqyachirqan.+ 20 Qhepaq Israel runakunatataq Babiloniaman presota apapurqan.+ Chhaynapin Israel runakunaqa Caldea runakunaq reyninpa kamachin kapurqanku,+ chaymantapas wawankunaq kamachinmi kapurqanku. Israel runakunaqa paykunaq kamachinmi kapurqanku Babilonia runakunata Persia rey atipanankama,+ 21 chhaynapi Jeremiaswan Jehová Diospa willachisqan simikuna junt’akunanpaq,+ tiyasqanku jallp’apas mana samasqanmanta samanankama.+ Israel runakunaqa qanchis chunka watan jallp’ankupi mana tiyarqankuchu, chaymi jallp’ankuqa chay watakunapi samarqan.+
22 Persia nacionmanta rey Ciro+ kamachikuyta qallarisqan watapin, Jehová Diosqa chay reypa sonqonta kuyurichirqan llapa kamachisqan llaqtakunaman juj kamachikuyta willachinanpaq, chhaynapi Jeremiaswan Jehová Diospa willachisqan simikuna junt’akunanpaq.+ Chay kamachikuytaqa qelqapi iman Ciroqa churarqan,+ khaynatan nirqan: 23 “Persia nacionmanta rey Ciron nin: Janaq pacha Jehová Diosmi kay pachapi llaqtakunata kamachinaypaq churawan,+ chaymantapas paymi kamachiwan Judapi tarikuq Jerusalén llaqtapi juj templota ruwapunaypaq.+ Chhaynaqa pikunachus paypa llaqtanmanta kaqkuna, Jerusalén llaqtata richunku, Jehová Diosninkutaq paykunawan kachun,+ nispa”.