Hebreos
9 Ñaupaq kaq rimanakuypiqa karqanmi Diosta imaynata adoranapaq kamachikuykuna, payta adoranapaq ch’uya karpapas+ kay pachapin kasharqan. 2 Chay karpataqa iskayman t’aqasqatan ruwakurqan, ñaupaq kaq cuartotan nikurqan ch’uya cuarto nispa;+ chaypin kasharqan juj candelero,*+ juj mesa, Diosman jaywasqa t’antakunapas.+ 3 Iskay kaq cortinaq qhepanpitaq+ kasharqan iskay kaq cuarto, chaytan nikurqan ch’uyay-ch’uya cuarto nispa.+ 4 Chaypin kasharqan qorimanta incienso ruphachina,+ qoriwan lliu forrasqa+ rimanakuy arca* ima;+ chay arca ukhupitaq kasharqan maná nisqa mijuyniyoq qori p’uyñucha,+ Aaronpa ch’ijchimuq varan,+ p’alta rumikunapi+ qelqasqa rimanakuy simipiwan; 5 chay arca patapitaq kasharqan k’ancharishaq querubín angelkuna, chay querubinkunan llanthuqku allipunachiq tapata.+ Ichaqa manan lliu chaykunamanta rimana tiempochu kunanqa.
6 Lliu chaykuna ruwasqaña kaqtinmi sacerdotekunaqa sapa kuti karpapi kaq ñaupaq kaq parteman jaykuqku Diospaq llank’anankuwan junt’aq;+ 7 iskay kaq partemanmi ichaqa uma sacerdotella watapi juj kutita jaykuq,+ chayman jaykuspaqa yawar apaykusqallapunin jaykuq,+ chay yawartan chaypi ch’allaq paypa juchanmanta,+ runakuna mana yuyaypichu juchallikusqankumantawan.+ 8 Chaywanmi santo espirituqa sut’ita rikuchisharqan chay ñaupaq kaq karpa kashaqtinqa ch’uyay-ch’uya cuartoman jaykunaqa manaraq kichasqachu kasqanta.+ 9 Chay karpaqa imakunachus kunan tiempopi kashanña chaykunaq rijch’aynillanmi* karqan.+ Kunankamapas jaywakushallanmi ofrendakunata sacrificiokunatapas,+ ichaqa manan chaykunaqa atinmanchu Diosta serviqkunaq conciencianta lliupi ch’uyaman tukuchiytaqa.+ 10 Jinaspapas chaykunaqa mijunamanta, ujanamanta, imaymana ch’uyanchanamanta imallan karqan.+ Chaykunaqa cuerpopaq kamachikuykunallan karqan,+ chaymantapas chaykunaqa tukuy imatapas allinyachinapaq chayamunan tiempokamallan kanan karqan.
11 Criston ichaqa ima allinkunachus pasashanña chaykunamanta uma sacerdote kananpaq jamuspa aswan jatun aswan allin karpaman jaykurqan, chay karpaqa manan runakunaq ruwasqanchu, manataqmi kay pachamantapaschu. 12 Chaymantapas ch’uyay-ch’uya parteman jaykuspaqa manan cabrakunaq ni malta torokunaq yawarninta apaykuspachu jaykurqan, aswanmi pay kikinpa yawarninwan+ juj kutillata wiñaypaq jaykurqan, chhaynapin wiñaypaq salvapuwarqanchis.+ 13 Cabrakunaq torokunaq yawarninpas,+ malta waka usphapas qhelli kashaq runaman ch’aqchusqa kaqtinqa ch’uyanchaqtaq chay runata chayqa,+ 14 astawanraqchá riki Cristoq yawarninqa+ yanqa ruwaykunamanta conciencianchista ch’uyanchanqa,+ chhaynapi kausaq Diosta servinanchispaq.+ Chaymantapas wiñay-wiñaypaq espirituq pusasqanmi payqa mana ima qhelliyoq sacrificio jina Diosman entregakurqan.
15 Chaymi payqa mosoq rimanakuypi allipunachiq kapurqan,+ chhaynapi wajasqa kaqkuna wiñay herencia promesata chaskinankupaq.+ Wañusqanwanmi chaykunataqa ruwarqan,+ wañusqanwanmi ñaupaq rimanakuypi juchallikuqkunatapas preciowan librarqan. 16 Ima rimanakuypas kaqtinqa wañunanmi chay rimanakuyta ruwaq runaqa, 17 chay runa wañullaqtinmi chay rimanakuyqa valenman, mana chayqa mana valorniyoqmi kanman. 18 Ñaupa rimanakuypas yawar jich’akusqanwanmi valorniyoqqa karqan.* 19 Chay pachan Moisesqa llapa llaqtantin runakunaman kamachikuy simipi lliu kamachikuykunata willarqan, chaymantataq malta torokunaq yawarninta cabrakunaq yawarnintawan unuwan chhaqrurqan, hisopo k’aspiman k’anchaq puka willmata k’uyuspataq, chaywan chay yawarta ch’aqchurqan rimanakuy qelqaman llapa runakunaman ima. 20 Jinaspa nirqan: “Kay yawarqa Dioswan rimanakuyta valechiq yawarmi, payqa chay rimanakuywan junt’anaykichistan munan”,+ nispa. 21 Payqa ch’aqchullarqantaqmi yawartaqa karpamanpas Diosta servinapaq serviciokunamanpas.+ 22 Kamachikuy simiq nisqanman jinaqa, yaqa llapanmi yawarwan limpiakuq;+ manachus yawar jich’akunman chayqa, manan ima juchapas perdonasqachu kanman.+
23 Chhaynaqa, janaq pacha kaqkunaq rijch’ayninqa+ chay sacrificiokunawanmi ch’uyanchasqa kanan karqan,+ janaq pacha kaqkunapaqmi ichaqa aswan allin sacrificiokuna ruwakunan karqan. 24 Cristoqa manan runakunaq ruwasqan ch’uyay-ch’uya cuartomanchu jaykurqan,+ chay cuartoqa janaq pacha kaqkunaq rijch’aynillanmi,+ aswanpas kikin janaq pachamanmi payqa jaykurqan,+ chhaynapi noqanchisrayku Diospa ñaupanpi presentakunanpaq.+ 25 Chaymantapas uma sacerdoteqa sapa watanmi ch’uyay-ch’uya cuartoman jaykuq+ animalkunaq yawarnin apaykusqa; Criston ichaqa mana sapa kutichu sacrificiopi entregakurqan, 26 mana chayqa, runakuna mirayta* qallarisqanmantapachachá askha kutita ñak’arinan kanman karqan. Aswanmi payqa kay tukukuy tiempopi* juj kutillata rijurimuspa sacrificiopi entregakurqan juchata chinkachinanpaq.+ 27 Imaynan runakunaqa juj kutillata wañunku, chay qhepamantaq juzgasqa kanku, 28 chhaynatan Cristopas juj kutillata wañurqan askha runakunaq juchanta apapunanpaq;+ wajmanta rijurimuspaqa manañan juchata apapunanpaqchu rijurimunqa, aswanpas pikunachus tukuy sonqowan payta suyashanku chaykunata salvananpaqmi rijurimunqa.+