1 Corintios
11 Noqaq ruwasqayta jina ruwaychis, imaynan noqapas Cristoq ruwasqanta jina ruwani jinata.+
2 Wayqeykuna,* anchatan agradecekuykichis tukuy imapi yuyariwasqaykichismanta, tukuy imatapas yachachisqayman jinapuni ruwasqaykichismantawan. 3 Ichaqa kaytan yachanaykichista munani: Criston llapa qhariq umanqa,+ warmiq umantaq qhari,+ Cristoq umantaq Dios.+ 4 Mayqen qharipas uman tapasqa mañakushanman profetizashanmanpas chayqa, umantan* p’enqayman churashanman. 5 Ichaqa mayqen warmitaqchus q’ara umalla mañakunman profetizanmanpas chayqa,+ umantan* p’enqayman churashanman, uman p’aqlasqa warmipas kanman jinan kashanman. 6 Chayrayku pi warmipas mana tapakunqachu umanta chayqa, chujchanta rutukuchun. Ichaqa p’enqaychus paypaq kanqa chujchanta rutuchikuy p’aqlachikuypas chayqa, umanta tapakuchun.
7 Qhariqa manan umanta tapakunanchu Diospa rijch’aynin kasqanrayku,+ Diosta jatunchanapaq kasqanrayku ima; warmin ichaqa qharita jatunchanapaq. 8 Manan qharichu warmimanta kamasqaqa karqan, aswanpas warmin qharimanta kamasqa karqan.+ 9 Chaymantapas, manan qharichu warmirayku kamasqa karqan, aswanpas warmin qharirayku kamasqa karqan.+ 10 Chayraykun warmiqa umallinta respetasqan señalta umanpi apanan, angelkunarayku iman chaytaqa ruwanallantaq.+
11 Señorpi iñiqkuna ukhupiqa manan warmiqa kanmanchu qhari mana kaqtinqa, manataqmi qharipas kanmanchu warmi mana kaqtinqa. 12 Imaynan warmiqa qharimanta kamasqa karqan+ chhaynatan qharipas warmimanta nacemun. Ichaqa Diospa kamasqanmi tukuy imapas.+ 13 Qankuna kikiykichis reparaychis: ¿Allintachu juj warmi ruwashanman q’ara umalla Diosmanta mañakuspa? 14 ¿Manachu yachankichis chujchata jatunta wiñachikuyqa qharipaq p’enqay kasqanta, 15 warmipaqtaq ichaqa ancha sumaq kasqanta? Umanta tapananpaqmi warmimanqa chujchata qokun. 16 Ichaqa piña chay ruwayta mana allinpaq qhawarinman chaypas, noqaykupaqpas Diospa iñiq t’aqankunapaqpas manan waj costumbreqa kanchu.
17 Juñunakuyniykichiskunaqa allinniykichispaq kananmantaqa mana allinniykichispaqmi, chayrayku kaykunata nispayqa manan “allinmi” niykichismanchu. 18 ¿Cheqachu juñunakuykunapi t’aqanakuy kashan? Chaytan uyarini, creenitaqmi wakintaqa. 19 Ichaqa kananmi karqan t’aqanakuykunaqa,+ chhaynapi qankuna ukhupi Diospa allin qhawarisqan runakuna sut’i reqsisqa kanankupaq.
20 Señorpa cenanta mijunaykichispaq juñukuspapas manataqsi chayta mijunaykichispaqchu juñukushankichis.+ 21 Chay cenata mijuna horaspaqqa ñas wakinqa mijusqaña machasqa imaña kashankichis, wakintaqsi ichaqa yarqasqa kashanku. 22 ¿Manachu wasiykichis kan mijunaykichispaq ujanaykichispaqpas? Icha, ¿Diospa iñiq t’aqanta pisichayta munaspachu mana imayoq kaqkunata p’enqachiyta munankichis? ¿Imanisaykichistaq? ¿“Allintan ruwashankichis” nisaykichischu? Manapunin chaymantaqa “allinmi” niykichismanchu.
23 Noqaqa Señormanta chaskisqaytan willarqaykichis, paymi jap’ichisqa kanan tutapi+ t’antata jap’ispa 24 Diosman graciasta qorqan, p’akispataq nirqan: “Kayqa cuerpoytan representan,*+ chayqa qankunaraykun qosqa kanqa. Kaytaqa ruwallankichispunin noqata yuyariwanaykichispaq”,+ nispa. 25 Kaqllatataqmi copawanpas ruwarqan,+ cenayta tukuqtinkun nirqan: “Kay copaqa mosoq rimanakuytan+ representan,* yawarniymi chaytaqa valechinqa.+ Kaytaqa ruwallankichispunin sapa ujaspaykichis, chhaynapi noqata yuyariwanaykichispaq”,+ nispa. 26 T’antata sapa mijuspaykichisqa copatapas sapa ujaspaykichisqa Señorpa wañusqantan willashankichis, pay jamunankama.
27 Chhaynaqa, pipas t’antata mana respetowan mijushan, Señorpa copantapas mana respetowan ujashan chayqa, Señorpa cuerpon contra yawarnin contra iman juchallikushan. 28 Chayrayku sapanka sonqonta allinta t’aqwikuchun, chhaynapi chaypaq jinachus kashan icha manachus chayta yachananpaq,+ chayña t’antataqa mijuchun copatapas ujachun. 29 Pipas mijushanmanpas ujashanmanpas manataq reparanmanchu chay mijusqanpas ujasqanpas Señorpa cuerpon representasqanta* chayqa, pay kikillantaqmi juchachasqa kayman churakushan. 30 Chayraykun askha kashankichis pisi kallpa onqosqa ima, askhataq wañusqapas kashanku.*+ 31 Ichaqa, allintachus noqanchis kikinchista t’aqwikusun chayqa, manan juzgasqachu kasun. 32 Manachus chayta ruwasun chayqa, juzgasqan kasun; arí, Jehová* Diosmi wanachiwasun,*+ chhaynapi mana kay pachawan kuskachu juchachasqa kananchispaq.+ 33 Chhaynaqa, wayqellaykuna,* mijunaykichispaq juñunakuspaqa suyanakuychis. 34 Pipas yarqasqa kashan chayqa, wasinpi mijuchun, chhaynapi juñunakuyniykichisqa ama juiciopaqchu kananpaq.+ Wakin imapas kaqtaqa chayamuspayñan qhawarisaq.