Job
18 Jinan Shúa llaqtamanta Bildadqa+ khaynata nirqan:
2 “¿Jayk’aqkaman khaynata rimankichis?
Allinchá kanman allin yuyaywan rimawaqchis chayqa,
chhayna rimaqwanqa noqapas rimaymanmi.
3 ¿Imaraykun qan animalkunata jina qhawariwankiku?+
¿Imaraykun mana yuyayniyoqkunata jina rikuwankiku?
4 Maytaña phiñakuwaq chaypas,
¿chaywanchu kay pacha ch’usaq kapunqa?
¿Chaywanchu qaqakunapas juj ladoman ripunqa?
5 Millay runaq k’anchayninqa wañupunqan,
ninanpa raurayninqa manañan k’anchanqachu.+
6 Karpanpiqa manan k’anchay kanqañachu,
karpan ukhupi warkurayaq mecheropas* wañupunqan.
7 Allinta purishaspan payqa manaña puriyta atinqachu,
imakunachus ruwasqallantaqmi paytaqa urmachinqa.+
8 Chakillantaqmi trampaman saruykachinqa,
purishaspan qonqaylla trampaman urmaykunqa.
9 Juj trampan chaki talonninmanta jap’inqa,
juj toqllan payta jap’ipunqa.+
10 Pampapi pakasqan juj waskha payta suyashan,
purinan ñanpin juj trampa kashan.
11 Millay runamanqa llapa ladomantan manchay ñak’ariy chayamun,+
chay ñak’ariykunaqa yaqañan payta sarushanpas.
12 Kallpanpas manan kanñachu,
llakikuykunapas+ wist’u-wist’utaraqmi purichin.
13 Aycha qarantapas millay onqoykunan tukupushanña,
llapa cuerpontan mana jampiy atina onqoykuna tukupushan.
14 Karpanpi thaj tiyakushaqtinmi aysarunku,+
mana munashaqtan manchakuy reypa kasqankama* purichinku.
15 Karpanpiqa mana reqsisqa runakunan tiyanqaku,
wasinmanqa raurashaq azufretan jich’aykunqaku.+
16 Millay runaqa sach’aq saphin jinan ch’akipunqa,
sach’aq k’allman jinan naq’epunqa.
17 Kay pachapiqa qonqasqan kapunqa,
callekunapipas manan sutintaqa rimanqakuñachu.
18 K’anchaymantan laqhayaq* ukhuman apanqaku,
kay pachamantan wijch’upunqaku.
19 Manan wawankunapas mirayninkunapas kapunqachu,
manan maypichus tiyan chaypi runakunapas kausanqañachu.
20 P’unchaynin chayamuqtinqa inti jaykuy ladopi tiyaq runakunan mancharikunqaku,
inti lloqsimuy ladopi tiyaq runakunapas manchakuymantan khatatatanqakuraq.*
21 Chaymi pasanqa millay runakunaq karpantaqa,
chhaynapin tarikunqa Diosta mana reqsiq runaqa”, nispa.