Salmos
Corepa churinkunaq takin.+
48 Jehová Diosqa may jatunmi, jatunchanapaq jinapunin,
llaqtanpi, ch’uya orqonpi jatunchasqa kachun.
2 Wichay ladopi Sion orqoqa munaypunin,
orqo-orqo wichaypin ima munay kashan,
Sionqa jallp’antinpa kusikunanmi,+
ancha jatun reypa llaqtanmi.+
3 Payqa allin perqasqa torrekunawanmi kashan,
chaywanmi Diosqa rikuchin pakakunapaq allin kasqanta.+
4 ¡Qhawariychis! Reykunan juñunasqa kashanku,
juj nisqallan paykunaqa jamushanku.
5 Llaqtata rikuspan may admirasqa karqanku.
Sinchitan mancharikurqanku, manchasqan ayqerikurqanku.
6 Manchakuymi, khatatataymi* paykunata jap’irqan,
onqokuy nanaywan jap’ichikuq warmi jinan qaparirqanku.
7 Inti lloqsimuy ladomanta wayrawanmi Tarsis barcokunata* ñut’unki.
8 Imachus uyarisqaykutan noqayku kikiyku rikushayku,
ejercitokunata kamachiq Jehová Diospa llaqtanpin, Diosniykuq llaqtanpin chayta rikushayku.
Wiñaypaqmi Diosqa llaqtanta qhawarinqa.+ (Séla).
9 Diosniyku, wasiykipi kaspan qanpi piensayku,
mana tukukuq munakuyniykipin yuyaymanayku.+
10 Sutiyki jinan jatunchasqa kasqaykipas kay pachaq k’uchunkunamanraq chayan.+
Paña makiykiqa chanin kaywanmi junt’a kashan.+
11 ¡Sion orqo kusikuchun!+
¡Justicia ruwasqaykiwan Judapi llaqtakuna kusikuchun!+