Isaías
36 Chunka tawayoq wataña rey Ezequías kamachikushaqtinmi Asiria+ rey Senaqueribqa Judá runakunawan maqanakuq jamurqan, jinaspa allin perqasqa llaqtakunata atipaspa jap’ikapurqan.+ 2 Lakís llaqtamantapachan+ Asiria reyqa, rafsaqueta*+ kacharqan askha soldadokunantinta Ezequiaspa kasqan Jerusalén llaqtaman. Chayman chayaspan paykunaqa jawa kaq estanqueman jaykuq yarqhaq* ladonpi sayaykurqanku,+ chayqa kashan p’acha t’aqsaqkunaq purinan ñanpin.+ 3 Jinan palaciomanta* encargakuq Hilquiaspa churin Eliaquinwan,+ secretario Sebnawan,+ reypa qelqaqnin Asafpa churin Joawan ima, chay runawan tupaq lloqsirqanku.
4 Jinan rafsaqueqa paykunata nirqan: “Rey Ezequiasta nimuychis: Ancha jatun reymi, Asiria reymi khaynata nisunki: ¿Imapi confiaspan thaj kashanki?+ 5 Qanmi nishanki: Askhan soldadoykunaqa kashan, allintañan yuyaykuni imaynatachus paykunata atipayman chayta, nispa. Chay nisqaykiqa yanqa rimayllan. ¿Imapi confiaspan noqa contra jatarishanki?+ 6 ¿Egipto reypichu confiashanki? Egipto reyqa p’akisqa carrizo* jinan, pipas p’akisqa carrizopi taunaykukun chayqa chay carrizon makinta t’oqoruspa pasarparin. Chhaynan Egipto rey faraonqa* paypi confiaqkunapaqqa.+ 7 Sichus niwankiman: Noqaykuqa Jehová Diosniykupin confiashayku, nispa chayqa, ¿manachu qan Ezequías chay Diosniyki yupaychana patakunata* altarkunata ima chinkachirqanki?+ ¿Manachu Judá runakunata Jerusalén runakunatapas nirqanki: Jerusalenpi kaq altarllapin Diosmanqa k’umuykunkichis,+ nispa? 8 Asiria rey señorniywan apuestata ruway,+ noqan iskay waranqa caballokunata qosayki sichus sillakunankupaq soldadokunata tarinki chayqa, ¡akis mana soldadoykikuna aypanqachu! 9 Chhaynaqa, Egipto reyña caballopi sillakuq soldadonkunawan carretankunawan yanapasunkiman chaypas, ¿atiwaqchu Asiria reypa churasqan pisipaq qhawarisqa jujnin kamachikuqllatapas atipayta? 10 Chaymantapas noqaqa manan noqallamantachu jamushani, noqataqa Jehová Dios kikinmi kachamushawan. Jehová Diosmi nimuwan: Phaway chay llaqtata atipamuy, jinaspa thunimuy, nispa”.
11 Chayta uyarispan Eliaquinwan, Sebnawan,+ Joawanqa rafsaqueta+ nirqanku: “Ama jinachu kay, arameo* simipi rimaykuwayku,+ noqaykuqa yachaykun chay simita. Ama Judá ayllu runakunaq rimasqan simipiqa niwaykuchu, llaqta perqa patapi kaq Judá ayllu runakunan uyarimushanku”,+ nispa. 12 Rafsaquemi ichaqa nirqan: “Reyniyqa manan reyniykichistawan qankunatawan ninallaypaqchu kachamuwan, aswanpas kay llaqta perqa patapi kashaq runakunatawan ninaypaqmi kachamuwan. Chay runakunapas llapankun qankuna jina unu jisp’ayninkuta ujanqaku jatun jisp’ayninkutapas mijunqaku”, nispa.
13 Chaymantataq rafsaqueqa sayarispa Judá ayllu runakunaq rimasqan simipi alto kunkawan nirqan:+ “¡Uyariychis ancha jatun Asiria reypa nisqanta!+ 14 Paymi nin: Ama Ezequiaswan engañachikuychischu, payqa manan librayta atisunkichischu.+ 15 Yaqachá payqa Jehová Diospi confianaykichispaq nishasunkichis:+ Kay llaqtataqa manan Asiria reyqa atipanqachu, Jehová Diosqa salvawasunpunin, nispa. 16 Chay nisqanqa yanqan, ama Ezequiastaqa kasuychischu, Asiria reymi khaynata nin: Entregakuychis, noqawan allipunaychis, chhaynapin sapankaykichis uvas chajraykichismanta higos chajraykichismanta mijunkichis, unutapas pozoykichismanta ujankichis. 17 Noqa jamuspaytaq jallp’aykichis jina sumaq jallp’aman pusapusaykichis;+ cebadaq, trigoq, uvaspa kasqan jallp’aman, t’antaq vinoq kasqan jallp’aman. 18 Ama Ezequiastaqa uyariychischu, payqa yanqan engañashasunkichis: Jehová Diosmi salvawasunchis, nispa. ¿Atirqanchu mayqen diospas Asiria reypa makinmanta llaqtanta salvayta?+ 19 ¿Maytaq Amaj llaqta runakunaq, Arpaj llaqta runakunaq diosninkunari?+ ¿Maytaq Sefarvain llaqta runakunaq diosninkunapas?+ ¿Atirqankuchu chay dioskuna makiymanta Samaria llaqta librayta?+ 20 Llapa dioskunamanta, ¿mayqenmi makiymanta llaqtanta librarqan? ¿Chaychu Jehová Dios atinman makiymanta Jerusalén llaqtata librayta?,+ nispa”.
21 Paykunan ichaqa ch’in karqanku, manan imanirqankupaschu, paykunataqa reymi nisqa: “Aman imanispapas ninkichischu”,+ nispa. 22 Chaymantataq palaciomanta encargakuq Hilquiaspa churin Eliaquinqa, secretario Sebnawan,+ reypa qelqaqnin Asafpa churin Joawan ima p’achankuta llik’ikuspa rey Ezequiaspa kasqanman rirqanku, jinaspa rafsaquepa imachus nisqanta lliuta willarqanku.