Jeremías
5 Jerusalén llaqtaq callenkunata purimuychis.
Plazankunapi maskhamuychis,
tukuy ladota allinta qhawamuychis,
icha pillatapas tarimuwaqchischu chanin ruwaqta,+
icha pillatapas tarimuwaqchischu junt’aq sonqo kay munaqta,
tarimunkichis chayqa Jerusalén llaqtatan perdonasaq.
2 “¡Wiñaypaq kausaq Jehová Diospa sutinpin jurani!” ninkumanña chaypas, llullakuspan jurashankuman.+
3 Jehová Diosníy, qanqa junt’aq sonqo runatan maskhanki.+
Castigasqaykipas manan paykunataqa nanachirqanchu,*
yaqa llapankutaña chinkachirqanki chaypas, manan kasukurqankuchu.+
4 Noqan sonqoypi nirqani: “Pisi yachayniyoq, wajchakunachá kanku,
paykunaqa manachá Jehová Diospa ñanninta reqsinkuchu,
manachá Diosninkuq kamachikuyninkunata reqsinkuchu,
chaychá mana yuyayniyoq runakuna jina kanku.
5 Chhaynaqa risaq, allin reqsisqa runakunawan rimamusaq,
paykunaqa reqsishankupunichá Jehová Diospa ñanninkunataqa,
yachashankupunichá Diosninkuq kamachikuyninkunataqa.+
Ichaqa llapankun Diosta kasukuy yugota p’akisqaku,
chay yugoq watanantapas p’itisqaku”, nispa.
6 Chayraykun sach’a-sach’a ukhumanta lloqsimuspa juj león paykunaman phawaykun,
ch’in pampakunamanta jamuspan juj lobo* paykunata llik’ishan,
Chay llaqtakunamanta lloqsiqkunaqa llik’irparisqan kanku,
paykunaqa nishutan juchallikurqanku,
askha kutitan qhelli juchata ruwarqanku.+
7 ¿Imaynataq chaykunamantari perdonaykiman?
Wawaykikunapas noqata saqerpariwaspan mana valeq dioskunaq sutinpi juranku.+
Manan imankutapas faltachirqanichu,
paykunan ichaqa jujkunawan pantashallarqanku,
llapankun ramera warmiq wasinta phawarqanku.
8 China caballoq qhepanta phawaq orqo caballo jinan kanku,
sapankankun runamasinkuq warminpa qhepanta phawanku.+
9 “¿Manachu chaykunamanta cuentata mañanay?
¿Manachu chhayna nacionmanta vengakunay?”+ ninmi Jehová Dios.
10 “Uvas chajrankunaman wichaychis, jinaspa chinkachimuychis,
ichaqa aman llapantachu ch’usaqyachimunkichis.+
Ch’ijchimushaqkunata t’iramuychis,
chaykunaqa manan Jehová Diospachu.
11 Israelpas Judapas traicionawarqankun,
pasaqtan traicionawarqanku” nispan nin Jehová Dios.+
12 “Jehová Diosninkuta pisichaspan nishanku:
Payqa manan imatapas ruwanqachu,*+
manan ima sasachakuypas chayamuwasunchu,
manan maqanakuypas ni yarqaypas kanqachu,+ nispa.
13 Profetakunaq rimasqankuqa yanqan,
manan simiytapas jap’ikunkuchu,
paykunaqa rimasqanku jina mana valeq kachunku” ninmi Diosqa.
14 Chaymi ejercitokunata kamachiq Jehová Diosqa nin:
“Chhaynatataq kay runakuna rimashanku chayqa,
rimasqay simiqa nina jinan simiykipi kanqa,+
kay llaqtataq llant’a jina kanqa,
ninan paykunata ruphaykapunqa”,+ nispa.
15 Jehová Diosmi nin: “Israel runakuna,
juj naciontan qankuna contra karumantaraq pusamusaq,+
chay nacionqa ñaupa tiempomantañan karqan,
chay nacionqa unay tiempomantañan karqan,
chay nacionpa rimaynintaqa manan reqsinkichischu,
parlasqankutapas manan entiendenkichischu.+
16 Flecha apanankuqa t’oqorayashaq sepultura jinan,
llapallankun allin maqanakuqkuna kanku.
17 Cosechaykitapas t’antaykitapas mijupunqakun,+
churiykikunatapas ususiykikunatapas wañuchinqakun,
ovejaykikunatapas wakaykikunatapas tukunqakun,
higos sach’aykikunatapas uvas sach’aykikunatapas chinkachinqakun,
confiasqayki allin perqayoq llaqtaykikunatapas thuninqakun”, nispa.
18 Jehová Diosmi nillantaq: “Chhaynaña kaqtinpas chay p’unchaykunapiqa manan llapaykichistachu chinkachisaykichis.+ 19 ¿Imaraykun Jehová Diosninchis kaykunata ruwawanchis?, nispa niqtinkuqa, khaynatan ninki: Imaynan qankunapas saqerpariwarqankichis llaqtaykichispi waj dioskunata servinaykichispaq, chhaynatan qankunapas waj suyupi mana reqsisqaykichis runakunata servinkichis,+ nispa”.
20 Jacobpa miraynin runakunaman willamuychis,
Judá runakunaman kayta willamuychis:
21 “Yau mana yuyayniyoq mana yachayniyoq llaqta,*+ kayta uyariy:
22 ¿Manachu manchakuwankichis?
¿Manachu ñaupaypiqa khatatatanaykichis?,* ninmi Jehová Dios,
noqan aqota churarqani lamar-qochaq linderon* kananpaq,
noqan kamachirqani maykamalla chayananta,
manchakuytaña aytikachakunman chaypas manan wasapanmanchu,
phoqchiqespaña rimarinman chaypas manan lloqsinmanchu.+
23 Kay llaqtan ichaqa mana kasukuq rumi sonqo,
ñanniymanta t’aqakuspan munasqanman jina purin.+
24 Manan sonqollankupipas ninkuchu:
Diosninchis Jehová Diosta manchakusun,
tiempollanpi parata chayachimuwaqninchista manchakusun,
ñaupaq kaq parata qhepa kaq paratapas chayachimuwaqninchista manchakusun,
tiempollanpi cosecha oqarichiwaqninchista manchakusun,+ nispaqa.
25 Mana allinkunata ruwasqaykichisraykun chaykunata mana chaskinkichischu,
juchaykichis jawan allin kaqkunata mana chaskinkichischu.+
26 Millay runakunan llaqtaypi kan,
urpikunata jap’iqkuna jinan makilla qhawashanku,
wañuchinapaq trampakunatan churanku,
runakunatan chaywan jap’inku.
27 Imaynan jaulaqa urpikunawan junt’a kashan,
chhaynan wasinkupas suwakusqankuwan junt’a kashan.+
Chaywanmi qhapaqyapunku, atiyniyoqpas kapunku.
28 Wirallañan kashanku, uyankupas llusk’allañan kashan,
mana allin ruwasqankuqa mana tukukuqmi,
mana taytayoqkunatapas manan yanapankuchu,+
wajchakunapaqpas manan justiciata ruwapunkuchu,+
paykunallan allin kaytaqa munanku”, nispa.
29 “¿Manachu chaykunamanta cuentata mañanay?
¿Manachu chhayna nacionmanta vengakunay?” ninmi Jehová Dios.
30 “Suyupin sinchi admirakunapaq kaqta, millay kaqta ruwakushan:
31 Profetakunan llullakuspa profetizanku,+
sacerdotekunan munasqankuman jina jujkunata pisichanku.
Llaqtaytaq kusisqa chaywan kashan,+
¿imatan ruwankichis chaykunaq tukukuynin chayamuqtin?” ninmi Diosqa.