2 Corintios
5 Yachasqanchis jina, kay cuerpo wasinchisqa, kay karpanchisqa thunisqan kanqa,+ chaymantataq Diosmanta jamuq wasita chaskisun, chay wasiqa janaq pachapin kashan, manan runaq ruwasqanchu,+ wiñaypaqtaqmi kanqapas. 2 Kay wasipiqa lliumi khuyayta waqashanchis, janaq pachamanta kaq wasinchiswan p’achawan jina churakuytañan munashanchispas,+ 3 chhaynapi chaywan churakunanchis tiempo chayamuqtin mana q’alallachu kananchispaq. 4 Arí, kay karpapi kaqkunaqa lliumi imaymana llakikuywan khuyayta waqashanchis, manan kay aycha cuerpo wasita ch’utikuyta munaspachu, aswanpas juj kaqwan churakuyta munaspan;+ chhaynapi kay wañuq cuerponchista wiñay kausay chinkachipunanpaq.+ 5 Chaypaqqa Diosmi preparawarqanchis,+ paymi espiritunta qowarqanchis imachus chaskinanchismanta garantiata* jina.+
6 Chayraykun mana chaymanta iskayananchischu, ichaqa yachasqanchis jina, kay aycha cuerpollanchispiraq tiyashananchiskamaqa karupin Señormanta kasun.+ 7 Noqanchisqa manan imachus rikusqanchisman jinachu purinchis, aswanpas iñiyninchisman jinan, chaymi chayta yachanchis. 8 Noqanchisqa manan iskayananchischu, aswanpas maytachá munasunman kay cuerpomanta karupi kaspa Señorwan kuskaña tiyashayta.+ 9 Chayrayku, paywan kuskaña tiyaspapas paymanta karupiña tiyaspapas, kallpachakushallasun paypa allin qhawarisqan kananchispaq. 10 Llapanchismi Cristoq juzganan ñaupapi* rijurinanchis kanqa, chaypin sapanka chaskisunchis aycha cuerpopi kashaspanchis imatachus ruwarqanchis chayman jina, allinña mana allinña* ruwasqanchis karqan chaypas.+
11 Chayraykun noqaykuqa Señorta manchakuna kasqanta yachaspayku runakunata yachachimushayku creewanankupaq jina; ichaqa, Diosqa yachanmi imaynachus kasqaykuta, maytan noqaqa munayman qankunaq concienciaykichispas chay yachananta. 12 Noqaykuqa manan yapamantachu qankunaman reqsichikamushayku, aswanpas chaykunataqa nimushayku noqaykumanta qankuna alabakunaykichispaqmi. Chhaynapi ñawiq rikusqallanmanta alabakuq runakunaman kutichinaykichispaq,+ paykunaqa manan sonqopi imachus kasqanmantachu alabakunku. 13 Mana yuyaywan jinaña imatapas ruwarqayku chayqa,+ Diosraykun chaytaqa ruwarqayku; allin yuyaywanchus imatapas ruwaykuman karqan chayqa, allinmi qankunapaq kanman karqan. 14 Cristoq munakuyninmi tanqawanku chayta ruwanaykupaq. Kaytan allinta yachayku: Juj runallan wañurqan llapa runapaq,+ lliu runa wañusqa kasqanrayku. 15 Payqa lliupa allinninpaqmi wañurqan, chaymantataq kausarichisqa karqan, chhaynapi kausaqkunaqa manaña paykunaq munayninkuta ruwanankupaqchu kausanankupaq,+ aswanpas Cristollapaqña kausanankupaq.
16 Chayraykun noqaykuqa manaña pitapas ñawiykuq rikusqanman jinallachu qhawariyku,+ Cristotapas ñawiykuq rikusqanman jinallan wakinniykuqa qhawariq kayku, kunanmi ichaqa manaña chhaynatachu qhawariyku.+ 17 Chhaynaqa, pipas Cristowan jujllachasqa kashan chayqa, chay runaqa Diospa mosoq kamasqanmi;+ ñaupaq kaqkunaqa ñan tukukapunña, kunanqa mosoq kaqkunañan kapun. 18 Ichaqa tukuy imapas Diosmantan jamun, paymi noqaykuta wajawarqanku paywan allipunakapunaykupaq, chay allipunachiytaqa ruwarqan Cristowanmi,+ jinaspa allipunachiy llank’ayta qowarqanku.+ 19 Chay llank’ayqa paywan allipunakapunankupaq kay pacha runakunata Diospa wajasqanmanta willaymi,+ payqa Cristowanmi chayta ruwashan, manataqmi juchankumantapas cuentata mañashanchu.+ Chay allipunachiy willakuyta apanaykupaqmi pay kamachiwanku.+
20 Chhaynaqa, Cristoq rantinpi+ Diospa kachasqankunan* kayku,+ Diospas noqaykuwan runakunata wajashanman jina. Cristoq rantinpi churasqakuna jinan noqaykuqa runakunata valekuyku: “Dioswan allipunapuychis”, nispa. 21 Mana juchallikuqtan+ Diosqa noqanchisrayku juchayoqman tukuchirqan,* chhaynapi payrayku Diospa ñaupanpi chanin kananchispaq.+