Hechos
9 Sauloqa amenazashallarqanmi Señorpa discipulonkunata,+ wañuchiytataqmi munasharqanpas, chaymi uma sacerdoteman rispa 2 cartakunata mañakurqan Damasco llaqtapi kaq sinagogakunapaq, chhaynapi pipas Señorpa Ñanninpi kaqtaqa+ qharitapas warmitapas watasqata Jerusalén llaqtaman apamunanpaq.
3 Ñanta rishaspa Damasco llaqtaman qayllaykushaqtinmi qonqaylla cielomanta juj k’anchay payman k’anchaykamurqan,+ 4 jinan payqa pampaman wijch’ukurqan, jinaspa juj kunkata uyarirqan: “Saulo, Saulo, ¿imanaqtinmi qatikachashawanki?”, nispa nimuqta. 5 Chaymi payqa nirqan: “¿Pin kanki, wiraqocha?”, nispa. Jinan chay kunkaqa nimurqan: “Noqaqa Jesusmi kani,+ noqatan qatikachashawanki.+ 6 Sayariy, jinaspa llaqtaman jaykuy, chaypin nisunkiku imachus ruwanaykita”, nispa. 7 Saulowan rishaq qharikunaqa manan rimariyta atirqankuchu, ch’inllan chaypi sayasharqanku. Uyarisharqankuña rimamuq kunkata chaypas, manan pitapas rikurqankuchu.+ 8 Saulotaq pampamanta sayarirqan, ichaqa manan imatapas rikuyta atirqanchu qhawasharqanña ñawin chaypas. Chaymi makinmanta pusaspa Damasco llaqtaman aparqanku. 9 Payqa kinsa p’unchaymi mana imatapas rikuyta atirqanchu,+ manataq imatapas mijurqanchu ni ujarqanpaschu.
10 Damasco llaqtapin karqan juj iñiq, Ananías+ sutiyoq, Señormi payman rijurispa nirqan: “Ananías”, nispa. Jinan payqa “uyarishaykin Señor” nirqan. 11 Señortaq payta nirqan: “Phaway riy, Recta nisqa calleman, jinaspa Judaspa wasinpi Tarso llaqtayoq Saulo+ runata maskhamuy. Paymi Diosmanta mañakushan, 12 chaymantapas juj rijuriypin rikusunki maypichus kashasqanman jaykuqta, jinaspa ñawin qhawaripunanpaq payman makiykita churaykushaqta”,+ nispa. 13 Ananiasmi ichaqa nirqan: “Señor, askha runatan uyarini chay runamanta rimaqta, Jerusalén llaqtapi qanpi iñiqkunata imaymana mana allinkunata ruwasqanmanta. 14 Jinaspapas payqa umalli sacerdotekunaq kamachisqanmi jamushan sutiykipi iñiqkunata* llapanta presota apananpaq”,+ nispa. 15 Señortaq ichaqa payta nirqan: “Phaway rillay, chay runatan noqaqa ajllakuni+ waj nación runakunaman,+ reykunaman,+ Israel runakunamanwan noqamanta willamunanpaq. 16 Noqan payman rikuchisaq may tukuytachus sutiyrayku ñak’arinqa chayta”,+ nispa.
17 Jinan Ananiasqa rispa Sauloq alojakusqan wasiman jaykurqan, jinaspa payman makinta churaykuspa nirqan: “Wayqéy Saulo, ñanpi rijurimuqniyki Señor Jesusmi kachamushawan ñawiyki qhawaripunanpaq santo espirituwan junt’a kanaykipaqwan”,+ nispa. 18 Chayta niqtin jinan Sauloq ñawinmantaqa challwaq sarphan* jina t’akarikamurqan, jinan ñawinqa qhawaripurqan; sayarispataq bautizakapurqan, 19 jinaspa mijuspa kallpata jap’irqan.
Chaymantataq juj tiempo Damasco llaqtapi iñiqkunawan qhepakurqan,+ 20 jinaspa sinagogakunapi willarqanpacha Jesusqa Diospa Churin kasqanmanta. 21 Payta llapa uyariqkunaqa sinchi admirasqan ninakurqanku: “¿Manachu kayqa kashan Jerusalén llaqtapi Jesuspa sutinpi iñiqkunata* sinchita qatikachaq runa?+ Payqa jamurqan paykunata presota jap’ispa umalli sacerdotekunaman apananpaqmá* riki”,+ nispa. 22 Sauloqa aswan-aswan atiywanmi rimasharqan, sut’itapunin rikuchisharqan Jesusqa Cristo kasqanta,+ chhaynapin Damasco llaqtapi tiyaq judiokunata iskayachisharqan.
23 Askha p’unchaykunamantataq judiokunaqa rimanakurqanku payta wañuchinankupaq.+ 24 Saulon ichaqa yacharurqan imatachus payta ruwayta munasharqanku chayta. Paykunaqa tuta-p’unchaymi llaqta punkutapas qhawaqku Saulota wañuchinankupaq. 25 Chaymi paypa discipulonkunaqa tutallapi llaqta perqa t’oqonta canastapi uraykachirqanku.+
26 Jerusalenman chayaspan+ Sauloqa iñiqkunawan juñukuyta munarqan, paykunan ichaqa mana creerqankuchu Jesuspa discipulonman tukupusqanta, chaymi llapanku payta manchakurqanku. 27 Jinan Bernabeqa+ payta yanapaq jamuspa apostolkunaman pusarqan, jinaspa sut’ita paykunaman willarqan imaynatachus Sauloqa Señorta ñanpi rikusqa chayta,+ imaynatachus Señor payta rimapayasqa chaytawan, jinallataq Damasco llaqtapi Jesuspa sutinmanta mana manchakuspa rimasqanmantawan.+ 28 Jinan Sauloqa paykunawan qhepakurqan. Paykunawanmi Jerusalén llaqtantinpipas puriq Señorpa sutinmanta tukuy sonqowan rimaspa. 29 Griego rimaq judiokunawanpas rimaqmi, atipanakusparaqmi paykunawanqa rimaq. Paykunan ichaqa wañuchiyta munarqanku.+ 30 Chayta yachaspan iñiqkunaqa Cesarea llaqtaman pusaspa Tarso llaqtaman kacharqanku.+
31 Chay qhepatan jinantin Judeapi, Galileapi, Samariapipas+ kaq iñiqkunaqa samarirqanku* qatikachasqa kaymanta, iñiyninkupipas allin kallpachasqan kasharqanku; chaymantapas paykunaqa askhayasharqankun Jehová* Diosta manchakuspa kausasqankurayku, santo espiritunpa kallpachasqan+ kasqankurayku ima.
32 Pedroqa jinantinpin purisharqan, Lida llaqtapi+ iñiqkunamanpas jaykurqanmi. 33 Chaypin payqa tarirqan Eneas sutiyoq runata, paypa cuerponmi pusaq wataña mana kuyuripusqachu, chaymi puñunallapi kaq. 34 Jinan Pedroqa payta nirqan: “Eneas, Jesucriston qhaliyachipusunki.+ Sayarispa puñunaykita mast’ay”,+ nispa. Jinan payqa kaq ratu sayarirqan. 35 Paytaqa Lida llaqtapi llapa tiyaqkuna Sarón pampapi llapa tiyaqkuna iman rikurqanku, chaymi paykunaqa Señorpi iñipurqanku.
36 Jope llaqtapin karqan Tabita sutiyoq iñiq warmi, chay sutiqa “Dorcas”* ninmi griego rimaypiqa. Paymi imaymana allinkunata ruwaq, wajchakunatapas yanapaqmi. 37 Chay p’unchaykunapin payqa onqospa wañukapurqan. Jinan bañaruspa altos pataman aparqanku. 38 Lida llaqtaqa Jope llaqta cercallapin kasharqan, chaymi iñiqkunaqa Lida llaqtapi Pedro kashasqanta yachaspanku iskay qharikunata kacharqanku: “Ama jinachu kay, usqhaylla jamuriwayku”, nispa valekamunankupaq. 39 Jinan Pedroqa paykunawan rirqan. Chayaqtintaq altos pataman pusarqanku; chaypin llapa viudakuna waqaspa payman qayllaykurqanku, jinaspa rikuchirqanku kausashasparaq Dorcaspa ruwasqan p’achakunata p’istukunapaq mantakunatawan. 40 Jinan Pedroqa llapankuta jawaman lloqsichirqan,+ jinaspa qonqorikuspa Diosmanta mañakurqan. Chaymantataq Tabitaq ayanman kutirispa nirqan: “¡Tabita, sayariy!”, nispa. Jinan payqa ñawinta kicharirqan, Pedrota rikuruspataq jatarirqan.+ 41 Pedrotaq makinmanta aysarispa sayarichirqan, iñiqkunata viudakunatawan wajaspataq kausashaqta paykunaman rikuchirqan.+ 42 Chay pasasqantaqa Jope llaqtantinpin yacharqanku, jinan askha runakuna Señorpi iñipurqanku.+ 43 Pedroqa askha p’unchaymi Jope llaqtapi qhepakurqan qarakuna llamp’uyachiq Simonpa wasinpi.+