Jeremías
11 Jehová Diosmi Jeremiasta rimapayarqan, khaynatan nirqan: 2 “¡Llaqta runakuna! ¡Kay rimanakuypa nisqanta uyariychis!
”Judá runakunaman, Jerusalenpi tiyaq runakunaman willay,* 3 Jehová Diosmi, Israelpa Diosninmi nin: Ñakasqa kachun kay rimanakuypa nisqanta mana kasukuq runaqa.+ 4 Egiptomanta ñaupa taytaykichista orqomusqay p’unchaymi kamachirqani,+ fierro unuyachina hornomanta orqomuspaymi nirqani:+ Simiyta kasukuychis, tukuy ima nisqayta ruwaychis, llaqtaymi kankichis, noqataq Diosniykichis kasaq.+ 5 Chhaynapi ñaupa taytaykichisman lechepas mielpas askha kasqan jallp’ata qonaypaq+ jurasqayta junt’anaypaq, imaynan kunan p’unchaypas kashan jinata, nispa”.
Noqataq nirqani: “Chhayna kachun* Jehová Diosníy”, nispa.
6 Jehová Diostaq niwarqan: “Tukuy kay simikunata Judá llaqtakunapi, Jerusalenpa callenkunapi willay: Kay rimanakuypa nisqanta uyarispa llapanta junt’aychis. 7 Ñaupa taytaykichiskunata Egipto jallp’amanta orqomusqay p’unchaymantapachan kunankama sapa kutilla rimapayarqaykichis: Simiyta kasukuychis,+ nispa. 8 Paykunan ichaqa mana uyarikurqankuchu ni kasukurqankupaschu, aswanpas millay sonqonkuq munasqanman jinan purirqanku.+ Kasukunankupaq rimanakusqaytaqa manan junt’ayta munarqankuchu, chaymi paykunataqa rimanakuypa nisqanman jina muchuchirqani, nispa”.
9 Jehová Diosmi niwallarqantaq: “Judá runakunan Jerusalenpi tiyaq runakunawan rimanakunku contraypi sayarinankupaq. 10 Paykunaqa ñaupa taytanku jinan mana allinkunata ruwallarqankutaq, ñaupa taytankuqa manan simiyta kasukurqankuchu.+ Paykunapas waj dioskunatan qatikurqanku servirqankupas.+ Israel suyu runakunapas Judá suyu runakunapas ñaupa taytankuwan rimanakusqaytan p’akirqanku.+ 11 Chayraykun Jehová Dios khaynata nin: Ñak’ariytan paykunaman chayachimusaq,+ manan chaymantaqa ayqekuyta atinqakuchu, yanapanaypaq rogakamuwaqtinkupas manan uyarisaqchu.+ 12 Judá runakunaqa, Jerusalenpi tiyaq runakunaqa sacrificiokunata q’osñichisqanku mana valeq dioskunamanmi yanapayta maskhaq rinqaku,+ chay dioskunan ichaqa ñak’ariyninku chayamuqtin mana paykunata salvayta atinqakuchu. 13 Yau Judá, mana valeq diosniykikunaqa llaqtaykikuna jinan askhallaña, p’enqaypi qhepachiq idolopaq ruwasqaykichis altarkunaqa, Baalman sacrificiokunata jaywanaykichispaq ruwasqaykichis altarkunapas+ Jerusalenpa callenkuna jinan askhallaña, nispa.
14 ”Qanqa* aman kay llaqtapaq mañakamuwankichu, aman rogakamuwankichu,+ aman wajakamuwankichu kay runakunaraykuqa, manan paykunataqa uyarisaqchu ñak’ariyninkupi wajakamuwaqtinkupas.
15 ¿Imatan kay munakusqay llaqtay wasiypi ruwashan?
¿Manachu yuyaykusqanman jina imaymana mana allinkunata ruwarqan?
Ñak’ariyniyki chayamuqtin, ¿sacrificiopi jaywasqayki ch’uya aycha jark’aykusunkimanchu?
¿Kusikuwaqchu chaywan?
16 Noqa Jehová Diosmi raphisapa aceituna sach’a nirqayki,
munay allin ruruyoq sach’a nirqaykin.
Rayo t’ojaywan jinaraqmi kanaykusqa karqanki,
paykunan jamuspa k’allmaykikunata p’akirqasunkiku.
17 ”Ejercitokunata kamachiq Jehová Diosmi, plantaqniyki Diosmi+ willanña tukuy mana allinkuna ruwasqaykimanta ñak’ariy chayamunasuykita, Israel runakunapas Judá runakunapas Baalman sacrificiokunata jaywaspan phiñachiwarqanku”,+ nispa.
18 Jehová Diosníy, qanmi willawarqanki yachanaypaq,
qanmi rikuchiwarqanki imatachus ruwashasqankuta.
19 Noqaqa ñak’anaman apana manso oveja jinan karqani,
manan yacharqanichu contraypi sayarishasqankuta,+ khaynatan nisqaku:
“Kay sach’ata ruruntinta chinkachisunchis,
kausaqkunaq jallp’anmanta wit’usunchis,
sutinta manaña jayk’aqpas yuyarikunanpaq”, nispa.
20 Ejercitokunata kamachiq Jehová Diosmi ichaqa chanillanta juzgan,
payqa runaq sonqontan t’aqwin, ima yuyaykusqantapas* yachanmi.+
Paykunamanta vengakusqaykita rikuchiway,
qanmanmi quejakuyniyta chayachimuyki.
21 Anatoj runakunan wañuchiyta munawanku,+ ninkutaq: “Ama Jehová Diospa sutinpi profetizaychu,+ mana chayqa wañuchisaykikun”, nispa. Chay runakuna contran Jehová Dios nin, 22 arí, ejercitokunata kamachiq Jehová Diosmi khaynata nin: “Paykunamantan cuentata mañasaq, waynakunan espadawan wañuchisqa kanqaku,+ churinkupas ususinkupas yarqaymantan wañunqaku.+ 23 Manan paykunamantaqa puchuq kanqachu, cuentata mañanay watapin Anatoj runakunamanqa+ ñak’ariyta chayachimusaq”, nispa.