Joel
3 “Qhawariychis, chay p’unchaykunapin chay tiempopin,
Judá runakunata Jerusalenpi tiyaq runakunatawan preso apasqa kasqankumanta kutichimpusaq,+
2 chaymantapas llapa nacionkunatan juñusaq,
jinaspan Jehosafat* wayq’oman uraykachisaq,
chaypin paykunataqa juzgasaq.+
Llaqtayta, kaqniy Israelta imachus ruwasqankumantan juzgasaq.
Paykunan llaqtayta lliu nacionkunaman ch’eqechirqanku,
jallp’aytapas rakinakapurqanku.+
3 Paykunaqa sorteaspan llaqtayta rakinakurqanku,+
qhari wawatan venderqanku ramera warmiwan puñunankurayku,
warmi wawatataq venderqanku vinota ujanankurayku.
4 Tiro llaqta, Sidón llaqta, Filistea llaqtakuna,
¿imatataq qankunari noqamanta munankichis?
¿Imamantan vengakuyta munashawankichis?
Vengakushawankichis chayqa,
usqhayllan imachus ruwasqaykichista qankunallamantaq chayachimusaykichis.+
5 Qankunaqa qolqeytan qoriytan aparqankichis,+
valorniyoq cosasniykunatan idoloykichiskunaq wasinman apaykurqankichis.
6 Judá runakunatapas Jerusalén runakunatapas Grecia runakunamanmi venderqankichis,+
jallp’ankumanta karunchanaykichispaqmi chayta ruwarqankichis.
7 Noqan ichaqa maymanchus venderqankichis chaymanta paykunata kutichimpusaq,+
jinaspa imachus ruwasqaykichisman jina qankunata ruwasaykichis.
8 Churiykichiskunata ususiykichiskunatawanmi Judá runakunaman vendepusaq,+
paykunataq karu nación Saba runakunaman vendenqaku,
noqa Jehová Diosmi chayta nini.
9 Llapa nacionkuna ukhupi willamuychis:+
¡Maqanakuypaq alistakuychis!* ¡Kallpasapa runakunata wajaychis!
¡Llapa soldadokuna jamuchunku! ¡Llapanku puririmuchunku!+
10 Yapuna* rejaykichista espadaman tukuchiychis,
ichhunaykichistataq lanzaman tukuchiychis.
Pisi kallpayoqpas, noqaqa kallpasapan kani, nichun.
11 ¡Muyuriqpi kaq nacionkuna, jamuychis,
qankunapura yanapanakuychis! ¡Llapaykichis juñukuychis!,+ nispa”.
Jehová Diosnilláy, chaymanyá kallpasapa maqanakuqniykikuna uraykuchunku.
12 Diosmi nin: “Llapa nacionkuna juñukuchunku, jinaspa Jehosafat wayq’oman jamuchunku.
Chaypin tiyaykusaq llapa muyuriqpi kaq nacionkunata juzganaypaq.+
13 Chajrata rutuychis, cosechaqa ñan poqosqaña kashan.
Uraykuychis jinaspa saruychis, uvas sarunaqa junt’an kashan.+
Uvas waqaychanakunaqa phullchishanñan,
chay nacionkunaq mana allin ruwayninkuqa nishupunin kashan.
14 Sinchi askha runakunan Juzgana wayq’opi kashanku,
chay wayq’omanmi Jehová Diospa p’unchayninqa chayamushanña.+
15 Intipas killapas tutayanqan,
ch’askakunapas arphayanqan.
16 Jehová Diosmi Sion orqomanta fuerteta qaparimunqa,
Jerusalenmantan wajakamunqa.
Cielopas kay pachapas chhafchirikunqaraqmi.
Jehová Diosmi ichaqa llaqtanpa pakakunan kanqa,+
Israel runakunaq allin perqasqa llaqtanmi kanqa.
17 Chaykunata rikuspan qankunaqa yachankichis noqa Jehová Diosniykichis kasqayta,
Sion ch’uya orqoypi tiyasqayta.+
Jerusalén llaqtaqa ch’uya llaqtan kanqa,+
manañan chaynintaqa waj llaqtayoq runakunaqa purinqakuchu.+
18 Chay p’unchayqa orqo patakunamantan misk’i vino sut’umunqa,+
moqo patakunamantan leche phawamunqa,
Judapa llapa yarqhankunatan* askhallaña unu purinqa.
Jehová Diospa wasinmantan unu pujyu t’ojamunqa,+
chay unun Acacia Sach’ayoq wayq’ota qarpanqa.
19 Egipton ichaqa purunyachisqa kapunqa,+
Edompas ch’aki pampan kapunqa,+
Judá runakunata ñak’arichisqankumantan chhaynapi tarikunqaku,+
Judapi mana juchayoqkunata wañuchisqankumantan chhayna kanqaku.+
20 Judapin ichaqa runakuna tiyashallanqa,
Jerusalenpipas wiñaypaqmi runakuna kashallanqa.+
21 Mana juchayoqta jinan paykunataqa qhawarisaq,
manaña ñaupaqpi chhaynatachu qhawarirqani chaypas.+
Jehová Diosqa Sion orqopin tiyanqa”,+ nispa.