Amós
9 Jehová Diostan rikurqani+ altar patapi sayashaqta, paymi nimurqan: “Columnakunaq umanta takay, jinan wasiqa chhafchikunqa. Columnakunaq umanta wit’uy, noqataq llapa qhepaqkunata espadawan wañuchisaq. Manan pipas ayqenqachu, manan escapayta munaqpas escapanqachu.+
2 Sepulturapiña* pakakunqaku chaypas,
chaymantan paykunata orqomusaq;
janaq pachataña wichanqaku chaypas,
chaymantan paykunata uraykachimusaq.
3 Carmelo orqo patapiña pakakunqaku chaypas,
chaypin maskhamusaq, jinaspan chaymanta apamusaq.+
Lamar-qocha ukhupiña pakakunqaku chaypas,
mach’aqwaytan kamachisaq picamunanpaq.
4 Enemigonkuq jallp’anmanña presota apanqaku chaypas,
espadatan kamachisaq paykunata wañuchinanpaq.+
Noqaqa imaymanatan ruwasaq sufrinankupaq, manan imatapas ruwasaqchu allinninkupaqqa.+
5 Ejercitokunata kamachiq Jehová Diosmi, tukuy munayniyoq Señormi jallp’ata tupaykun,
jallp’ataq chulluripun;+ llapa chaypi tiyaqkunan waqanqaku.+
Suyuntinmi Nilo mayu jinaraq phoqchirinqa,
Egipto Nilo mayu jinaraqmi aytikunqa.+
6 Paymi janaq pachapi escaleranta ruwakun,
paymi kay pachaq altonta mast’ariqqa,
paymi lamar-qocha unuta juñuqqa,
paymi unu juñusqanta jallp’aman parachimuqqa.+
Sutinmi Jehová.+
7 Israel runakuna, ¿manachu qankunaqa noqapaq Cus runakunaq wawankuna jina kankichis?, ninmi Jehová Dios.
¿Manachu Israel runakunata Egiptomanta orqomurqani?+
¿Manachu Filistea runakunata Cretamanta orqomurqani?+ ¿Manachu Siria runakunata Quirmanta orqomurqani?+
8 Noqa tukuy munayniyoq Señor Jehová Diosqa makillan juchasapa suyuta qhawamushani,
noqan kay pachamanta chay suyuta chinkachisaq.+
Jacobpa miraynintan ichaqa mana llapantachu chinkachisaq,+ ninmi Jehová Dios.
9 Israel runakuna suysusqa kananpaqmi kamachisaq,
llapa nacionkuna+ ukhupin Israelqa suysusqa kanqa.
Imaynan suysunapi trigota suysukuqtin mana juch’uy rumillapas urmanchu,
chhayna suysusqan kanqa.
10 Llaqtaypi llapa juchallikuq runakunan espadawan wañuchisqa kanqaku,
manan ñak’ariyqa chayamunqachu, manan sufrisunchu, nispa niqkunan wañunqaku.
11 Chay p’unchaymi Davidpa+ urmasqa ch’ujllanta sayarichisaq.
Q’asankunatan allichasaq,
thunisqa perqankunatan wajmanta sayarichisaq.
Noqan wajmanta sayarichisaq, ñaupa tiempopi jinan kapunqa.+
12 Jinan llaqtayqa Edommanta puchuqkunata munaychakapunqa,+
munaychakapullanqataqmi sutiyta apaq llapa nacionkunatapas, ninmi Jehová Dios, paymi chaytaqa ruwanqa.
13 ¡Qhawariychis! Tarpuq runa cosechaq runaman aypanan p’unchaykunan chayamushanña,
uvas saruq runa muju apaqman aypanan p’unchaykunan qayllaykamushanña.+
Orqokunamantan misk’i vino sut’umunqa,+
moqo patakunamantan unu jinaraq phawamunqa,*+ ninmi Jehová Dios.
14 Israel llaqtaymanta preso apasqakunatan kutichimpusaq,+
paykunan thunisqa llaqtakunata jujmanta sayarichispa chaypi tiyanqaku.+
Uvas sach’akunatan plantanqaku, vinontataq tomanqaku,+
huertakunatan ruwanqaku, rurusqantataq mijunqaku.+
15 Jallp’ankupin paykunataqa plantasaq,
qosqay jallp’amantaqa manañan jayk’aqpas t’irasqachu kanqaku,+
Jehová Diosniykin chayta nin”, nispa.