Jeremías
2 Jehová Diosmi rimapayamuwarqan, paymi niwarqan: 2 “Phaway Jerusalenman willamuy, Jehová Diosmi khaynata nin:
Allintan yuyashani sipas kashaspa munakuwasqaykitaqa,*+
yuyashanin casarakunaykipaq rimanakuspa munakuyniykita rikuchiwasqaykitaqa,+
yuyashanin ch’aki pampapi qatikuwasqaykitaqa,
yuyashanin mana tarpusqa pampapi qhepayta jamusqaykitaqa.+
3 Israelqa ch’uyan Jehová Diospaqqa karqan,+
ñaupaq oqariy cosecha jinan karqan, nispa.
Llapa paykunata oqoykuqkunan juchayoq karqanku,
ñak’ariypin tarikurqanku, ninmi Jehová Diosqa”,+ nispa.
4 Jacobpa mirayninkuna, uyariychis Jehová Diosniykichispa siminta,
Israel llaqta familiakuna, uyariychis Diosniykichista.
5 Jehová Diosmi nin:
“¿Ima mana allintan ñaupa taytaykichiskuna noqapi tarirqanku+ noqamanta karunchakunankupaq?
¿Imatan noqapi tarirqanku mana valeq idolokunata+ yupaychanankupaq?
Chaykunata yupaychaspan paykunapas mana valeqman tukupurqanku.+
6 Manan paykunaqa, ¿maytaq Jehová Diosri,
maytaq Egipto jallp’amanta orqomuwaqninchisri,+
maytaq ch’usaq pampanta, ch’inneq jallp’anta,+
t’oqo-t’oqo pampanta, ch’aki jallp’anta,+
sinchi laqhayaqninta* pusamuwaqninchis Diosri?, nillarqankupaschu.
Manan, ¿maytaq mana runaq purinanta,
mana piqpa tiyananta pusamuwaqninchis Diosri?, nillarqankupaschu.
7 Sumaq huertakunayoq jallp’amanmi apamurqaykichis,
sumaq rurukunata allin kaqkunata mijunaykichispaqmi pusamurqaykichis.+
Qankunan ichaqa jallp’ayta qhellicharqankichis,
millakunamanmi herenciayta tukuchirqankichis.+
8 Sacerdotekunapas manan, ¿maypitaq Jehová Diosri?,+ nillarqankupaschu.
Kamachikuyniykunata yachachiqkunapas manan reqsiwarqankuchu,
michiqkunapas noqa contran jatarirqanku,+
profetakunapas Baalpa* sutinpin profetizarqanku,+
mana ima ruway atiq dioskunatan qatikurqanku.
9 Chayraykun qankunataqa juchachashallasaykichis,+
wawaykichiskunaq wawankunatapas juchachasaqmi, ninmi Jehová Diosqa.
10 Kitin+ runakunaq tiyasqan lamar-qocha ladota riychis, jinaspa qhawamuychis,
Quedar+ ladoman runakunata kachaychis, allinta qhawamuchunku,
¿qankunaq ruwasqaykichista jinachu ruwashanku?
11 ¿Jayk’aqllapas juj nación cambiarqanchu diosninta juj dioswan mana valeqña kashaqtinpas?
Llaqtaymi ichaqa mana valeq kaqkunarayku noqa ancha jatun Diosta wijch’upuwan.+
12 Janaq pacha, admirasqa qhawariy,
manchakuymanta khatatatay,* ninmi Jehová Dios.
13 Llaqtaymi kay iskay mana allin ruwayta ruwan:
Kausay unu pujyunku kashaqtiymi saqerpariwanku,+
paykuna kikinkun rumi-rumipi t’oqokunata ruwakunku,
mana unuq tajyanan t’oqokunatan ruwakunku.
14 Israelqa manan kamachichu, manan kamachi jinapaschu nacerqan ¿riki?
Chhaynaqa, ¿imaraykutaq apasqari karqan, kaqninkunapas qechusqari karqan?
15 Pay contran malta leonkuna qaparin,+
manchakuytan qaparinku.
Jallp’ankuqa mancharikunamanmi tukuchisqa karqan.
Llaqtankupas kanaykusqan karqan, chaypiqa manan pipas tiyanñachu.
16 Nof* runakunapas,+ Tapanés runakunapas+ umayki patapi mijuspan umaykita p’aqlayachishanku.
17 ¿Manachu qanllataq juchayoq kanki khaynapi tarikunaykipaq?
¿Manachu Jehová Diosniykita saqerparisqaykirayku chaykuna pasashasunki?+
¿Manachu ñanninta pusaqniyki Diosta saqerparisqaykirayku chhaynapi tarikushanki?
18 Kunanri, ¿imaraykun Egipto ladoman riyta munashanki?+
¿Imanaqtinmi Sior* unuta ujayta munashanki?
¿Imaraykun Asiria ladoman riyta munashanki?+
¿Imanaqtinmi Éufrates mayu unuta ujayta munashanki?
19 ¿Manachu wananki chay mana allin ruwasqaykiwan?
Diosniyki contra juchallikusqaykimantaqa anyasqan kanayki.
¿Manachu yachanki Jehová Diosniykita saqeyqa mana allinniykipaq kasqanta?
¿Manachu reparanki Diosniykita saqespaqa ñak’ariypi tarikunaykita?+
Qanqa manan chhikallantapas manchakuwarqankichu,+ ninmi tukuy munayniyoq Señor Diosqa, ejercitokunata kamachiq Jehová Diosqa.*
Qantaq nirqanki: Manan serviykimanchu, nispa.
Jinantin alto orqokunapi, jatun raphisapa sach’a+ k’uchukunapin wijch’urayarqanki,
mana p’enqarikuspan qhelli juchata ruwarqanki.+
21 Allinnin mujumanta wiñaq uvasta jinataq plantarqaykiqá,+
ajllasqa allin puka uvas sach’ata jinataq plantarqaykiqá.
¿Imaynapitaq ñaupaypiri mana allin sach’aman, k’ita uvas sach’amanri tukupurqanki?+
22 Sodawanña lejiawanña* maqchikuwaq chaypas, juchaykiqa kaqllan kashanman,
noqapaqqa qhellillan kashanman,+ ninmi tukuy munayniyoq Señor Jehová Dios.
23 ¿Imaynan kunan niwaq: Manan qhellichakurqanichu,
manan Baal dioskunatapas yupaycharqanichu, nispa?
Yuyariy wayq’opi ruwasqaykita,
qhawariy imachus ruwasqaykita.
Usqhaylla phawaq china camello jinan kanki;
yanqapas qasi kayman jaqayman phawaykachaq malta camello jinan kanki.
24 Ch’inneqman yachasqa salqa china asno jinan kanki,
orqo asnota muskhipakuspa puriq china asno jinan kanki.
China asno asnonayachikushaqtinri, ¿pitaq jark’ayta atinman?
Orqo asnopaqpas manan sasa maskhanachu kanqa.
Asnonayachikushaqtinmi orqo asnokunaqa tarinqa.
25 Ama mana valeq kaqkunata maskhaspa chakiykita thantakuychu,
ama kunkaykita unumanta ch’akichiychu.
Qantaq ichaqa ninki: ¡Manan! ¡Manan uyariykimanchu!+
26 Imaynan suwapas jap’ichikuspa p’enqaypi qhepan,
chhaynatan Israel runakunapas p’enqaypi qheparqanku,
reyninkupas umallinkupas p’enqaypin qheparqanku,
sacerdotenkupas profetankupas p’enqaypin qheparqanku.+
27 Qankunaqa sach’atan ninkichis: Taytaymi kanki,+ nispa.
Rumitan ninkichis: Mamaymi kanki, nispa.
Noqaman kutirikamuwanaykichismantaqa qhepancharpariwankichismi.+
Ñak’ariypi tarikuspataq, ¡jamuy, salvawayku!,+ ninkichis.
28 Yau Judá,+ ¿maymi ruwakusqayki diosniykikuna?+
Salvayta atispaqa jamuchunkuyá ñak’ariymanta salvanasuykikupaq.
Diosniykikunaqa llaqtaykikuna jinan askhallaña.
29 ¿Imaraykun noqa contra sayarinkichis?
¿Imaraykun llapaykichis noqa contra jatarinkichis?,+ ninmi Jehová Diosqa.
30 Yanqapaqmi wawaykichiskunatapas wanachirqani.*+
Paykunaqa manan kasukurqankuchu.+
Espadallaykichistaqmi profetaykichiskunatapas wañuchirqan,+
phiña león jinaraqmi oqoykurqan.
31 Israel llaqta, uyariychis Diosniykichis Jehová Diospa rimasqanta:
¿Ch’usaq pampamanchu qanpaq tukupurqani?
¿Manchakunapaq tutayaq jallp’amanchu tukupurqani?
¿Imaraykun nirqankichis: Kunanqa ima munasqaykutan ruwasaqku, nispa?
¿Imaraykun nirqankichis: Manan qanmanqa jayk’aqpas kutimusaqkuñachu,+ nispa?
32 ¿Juj sipas* qonqanmanchu adornonkuna alajankuna churakuyta?
¿Novia qonqanmanchu munay qhasqo* k’uyunanwan churakuyta?
Llaqtaymi ichaqa unayña noqata qonqapuwan.+
33 Yau warmi, qhari sonqo kaspaykin kusata yachanki juj qharikunaman phawayta.
Qanllamantan yacharqanki mana allin ñankunapi puriytaqa.+
34 P’achaykipas wajchakunaq,* mana juchayoq runakunaq yawarninwanmi yawarchasqa kashan.+
Manan paykunataqa wasiykiman jaykuqta rikurqanichu,
p’achaykin ichaqa paykunaq yawarninwan yawarchasqa kashan.+
35 Mana juchayoqmi kani,
manañan Diosqa noqapaq phiñakunñachu, ninkiraqtaq.
Manan juchallikurqanichu nisqaykimantan juchachasayki.
36 ¿Imaraykun kaymanñataq jaqaymanñataq phawaykachashanki?
37 Chaymi umaykita jap’iykukuspa p’enqasqa lloqsimpunki,+
Jehová Diosqa cheqnikunmi confiasqayki suyukunataqa,
manan paykunaqa allin kanaykipaq yanapayta atisunkikumanchu”, nispa.