Jeremías
4 Jehová Diosmi nin: “Israel llaqtalláy, kutimuwaq chayqa,
noqaman kutimuwaq chayqa,
millakunapaq idoloykikunata ñaupaymanta wijch’upuwaq chayqa,
manañan chinkasqa jinañachu puriwaq.+
2 Sichus cheqaqllata, chanillanta juranki:
Wiñaypaq kausaq Jehová Diospa sutinpin jurani, nispa chayqa,
llapa nacionkunan Diosrayku bendecisqa kanqaku,
llapa nacionkunan Diosmanta kusisqa rimanqaku”,+ nispa.
3 Judá runakuna, Jerusalén runakuna, Jehová Diosmi nin:
4 Judá runakuna, Jerusalén runakuna,
Jehová Diosniykichispaq sonqoykichista ch’uyanchaychis,*+
mana chayqa phiñakuyniymi nina jinaraq raurarinqa,
manan pipas thasnuyta atinqachu,
mana allinkuna ruwasqaykichisraykun raurarinqa”,+ nispa.
5 Judá llaqtaman willamuychis, Jerusalén llaqtaman willamuychis.
Qapariychis, suyuntinpi waqrata tocaychis,+
kunkayoqta kallpawan qapariychis:
“Jamuychis, allin perqayoq llaqtakunaman ayqekusunchis.+
6 Sion ladoman k’aspita señalta jina sayachiychis,
usqhaylla pakakunata maskhaychis”, nispa.
Diosmi nin: “Wichay ladomantan ñak’ariyta apamusaq,+
wichay ladomantan ch’usaqyachiqta chayachimusaq.
7 Payqa sach’a-sach’a ukhumanta lloqsimuq león jinan rijurimun,+
nacionkunata ch’usaqyachiqmi lloqsimun.+
Maypichus kasqanmantan lloqsimun jallp’aykita mancharikunaman tukuchinanpaq,
llaqtaykikunatan ch’usaqman tukuchipunqa, rumi montonmanmi tukuchipunqa,
manan pipas chaypiqa tiyanqañachu”,+ nispa.
8 Chayrayku qhasqa p’achawan churakuychis,+
khuyayta waqaychis,* llakikuymanta qapariychis,
Jehová Diospa k’araq phiñakuyninqa manan noqanchismanta karunchakunchu.
9 Jehová Diosmi nin: “Chay p’unchaymi reypa sonqonqa chiriyapunqa,+
autoridadkunaq sonqonpas chiriyapunqan,
sacerdotekunapas mancharikunqakun,
profetakunapas musphanqakun”,+ nispa.
10 Noqataq nirqani: “Ay tukuy munayniyoq Señorníy Jehová, kay llaqtatan,+ Jerusalentan q’otupunki. Qanmi nirqanki: Thajmi kankichis,+ nispa, ñataq espadaqa kunkaykupiña kashasqa”, nispa.
11 Chay tiempopin Judá llaqtatapas Jerusalén llaqtatapas nikunqa:
“Llaqtaymanmi* q’ara orqo ch’in ladomanta sinchi ruphaq wayra chayamunqa,
chay wayraqa manan trigota wayrachinapaqchu ni ch’uyanchanapaqchu jamunqa.
12 Noqaq kamachisqaymi chay wayraqa chay ladomanta sinchi kallpawan jamunqa.
Kunanmi qankunata juchachasaykichis.
13 ¡Qhawariychis! Enemigoykichisqa yana phuyu jinaraqmi jamunqa,
carretankunapas manchachikuq wayra jinaraqmi chayamunqa,+
ankamantapas astawanraqmi caballonkunaqa phawan.+
Jerusalén runakunaqa, ¡imaraqmi noqanchismanta kanqa, ch’usaqyachisqan kashanchis!, ninqakun.
14 Jerusalén llaqta, mana allin kaqmanta sonqoykita ch’uyanchay,
salvasqa kanaykipaq sonqoykita ch’uyanchay.+
¿Jayk’aqkaman mana allin kaqkunapi yuyaykunki?
15 Dan ladomantan willakuy jamun,+
Efraín orqo-orqomantan sinchi llakikunapaq willakuy chayamun.
16 Llapa nacionkunaman chayta willaychis, Jerusalenman chayta willaychis”, nispa.
“Qhawaqkunan* karu llaqtamanta jamushanku,
maqanakuypaqmi Judapi kaq llaqtakuna contra fuerteta qaparinqaku.
17 Chajra qhawaqkuna jinan Jerusalenta jinantin ladomanta muyuykunqaku,+
contraypi sayarisqankumantan muyuykunqaku”+ ninmi Jehová Dios.
18 “Mana allinta ruwasqaykirayku, mana allinta kausasqaykiraykun ñak’arinki.+
Sinchi jatunpunin ñak’ariyniykiqa,
maytan sonqoykita k’irinqa” ninmi Diosqa.
19 ¡Ay imanaykusaqmi! ¡Imaynaraqmi kasaq!
Llakikuymi sonqoyta ñit’iykushawan,
llakikuymantan sonqoy sinchita phataqeshan,
manan ch’inlla kayta atiymanchu,
waqra tocaytan uyarini,
guerrapaq qapariytan uyarini.+
20 Llakikunapaq willakuykunallan uyarikun,
suyuntinmi thunisqa kapun,
qonqayllan karpaykunapas chinkachisqa kapun,
juj ratullapin karpa qatanaykunapas chinkachisqa kapun.+
21 ¿Jayk’aqkaman sayachisqa señal k’aspita rikusaq?
¿Jayk’aqkaman waqra tocayta uyarisaq?+
22 Diosmi nirqan: “Mana kasukuq, uma muyun llaqtayqa,+
mana yuyayniyoq, mana yachayniyoqmi wawaykunaqa,
mana allinta ruwanankupaqqa wapun* kanku,
allin kaqta ruwaytan ichaqa mana yachankuchu”, nispa.
23 Kay jallp’ata qhawariqtiymi ch’usaq mana imayoq kapushasqa,+
janaq pachata qhawariqtiymi k’anchay mana kapusqachu.+
24 Orqokunata qhawariqtiymi chhafchikushasqa,
moqokunan kuyushasqa.+
25 Qhawariqtiymi mana pipas kapusqachu,
llapanmi altonta phalaq animalkunapas ripusqa.+
26 Imaymana mijuypa wiñanan jallp’apas ch’aki pampamanmi tukupusqa,
llaqtakunapas lliumi thunisqa kapusqa,+
Jehová Diosmi chaytaqa ruwasqa,
k’araq phiñakuyninpin chaytaqa ruwasqa.
27 Jehová Diosmi nin: “Kay jallp’aqa purunyachisqan kanqa,+
ichaqa manan llapantapunichu chinkachisaq.
Noqan chayta nini, rimasqaytaqa junt’asaqpunin,
manan yuyaykusqayta cambiasaqchu nitaq pesapakusaqchu.+
29 Caballopi sillaykusqakunata uyarispan llaqtantin runakuna ayqekun,+
flechawan wach’iqkunata uyarispan ayqekun.
Runakunan sach’a-sach’a ukhukunapi pakakun,
qaqa patakunamanmi seqanku.+
Llapa llaqtakunan wijch’usqa kapun,
manañan pipas chaypiqa tiyanñachu”, nispa.
30 Thunisqañan kashanki, ¿imatan kunan ruwanki?
Ñaupaqqa k’anchaq puka p’achaykiwanmi churakuq kanki,
qori alajaykikunawanmi churakuq kanki,
yana pintanawanmi ñawiykita sumaqchaq kanki.
Ichaqa yanqapaqmi sumaqchakuq kanki,+
anchata munakuqniykikunapas cheqnikusunkikun,
kunanqa wañuchiytan munasunkiku.+
31 Nanaywan tarikuq* warmiq kunkanta jinan uyarini,
ñaupaq kaq wawanta onqokuq warmiq qaparisqanta jinan uyarini,
Sionpa ñak’ayllaña samapakusqantan uyarini,
makinkunata jaywarispan payqa+ nin: “¡Imaraqmi noqamanta!
¡Wañuchiqkunaq causanpin sinchi sayk’usqa kashani!”, nispa.