Jeremías
7 Jehová Diosmi Jeremiasta rimapayarqan, khaynatan nirqan: 2 “Jehová Diospa wasin punkupi sayaykuspa khaynata willay: Jehová Diosman k’umuykukunaykichispaq kay punkunta jaykuq llapa Judá runakuna, Jehová Diospa siminta uyariychis. 3 Ejercitokunata kamachiq Jehová Diosmi, Israelpa Diosninmi nin: Imayna kasqaykichista, imayna kausasqaykichista allichaychis, chhaynapin kay jallp’allapi kausankichis.+ 4 Ama yanqa rimaykunapi confiaychischu, amataq niychischu: ¡Kayqa* Jehová Diosta yupaychana wasin, Jehová Diosta yupaychana wasin, Jehová Diosta yupaychana wasin!,+ nispaqa. 5 Sichus imayna kasqaykichista, imayna kausasqaykichista allichankichis; sichus runakunaq quejanakusqanta chanillanta juzgankichis;+ 6 sichus waj llaqtayoqkunata, mana taytayoqkunata, viudakunatapas mana sarunchankichischu;+ sichus kay jallp’api mana juchayoq runakunaq yawarninta mana jich’ankichischu, manataq waj dioskunatapas qankunaq mana allinnillaykichispaqtaq qatikunkichischu chayqa,+ 7 ñaupa taytaykichiskunaman wiñaypaq qosqay kay jallp’apin kausachishallasaykichis, nispa”.
8 “Qankunan ichaqa yanqa rimaykunapi confiankichis, yanqan chay rimaykunapi confiasqaykichisqa.+ 9 Suwa kashaspapas,+ runa wañuchiq kashaspapas, jujwan pantaq kashaspapas, llullakuspa jurashaspapas,+ Baalman sacrificiokunata q’osñichishaspapas,+ mana reqsisqaykichis mana valeq dioskunata yupaychashaspapas, 10 ¿jamuwankichismanraqtaqchu sutiyta apaq wasiyman? ¿Tukuy chay millay kaqkunata ruwaq kashaspapas salvasqan kasunchis, niwaqchisraqtaqchu? 11 Qankunaqa sutiyta apaq wasitan suwakunaq t’oqonman tukuchirqankichis,+ noqa kikiymi chaytaqa rikuni” ninmi Jehová Dios.
12 Diosmi nin: “Riychis Siló llaqtata,+ qallariypi maypichus sutiy kananpaq ajllakusqay cheqasta,+ jinaspa rikumuychis Israel llaqtaypa juchanrayku imatachus ruwasqayta.+ 13 Qankunan ichaqa chay mana allin kaqkunata ruwashallarqankichis, sapa kutinña rimapayashaqtiypas manan kasukuwarqankichischu,+ wajamushaqtiypas manan uyariwarqankichischu, ninmi Jehová Dios.+ 14 Imaynatachus Siló llaqtata ruwarqani, chhaynatan confiasqaykichis+ sutiyta apaq wasitapas ruwasaq,+ chhaynallatataqmi ruwasaq qankunaman, ñaupa taytaykichiskunaman qosqay cheqastapas.+ 15 Imaynan llapa wayqeykichiskunata, Efrainpa mirayninta ñaupaymanta wijch’urqani, chhaynatan qankunatapas ñaupaymanta wijch’usaykichis.+
16 ”Qanqa* aman kay llaqtapaq mañakunkichu. Aman rogakamuwankichu, aman wajakamuwankichu, aman valekamuwankichu kay runakunapaqqa,+ noqaqa manan uyarisaykichu.+ 17 ¿Manachu rikunki Judá llaqtakunapi Jerusalenpa callenkunapipas ruwasqankuta? 18 Erqekunan llant’ata pallamunku, taytakunan ninata jap’ichinku, warmikunataq jak’uta masanku Janaq Pacha Reina* nisqaman+ t’anta sacrificiota jaywanankupaq. Noqata phiñachiwanankupaqmi waj dioskunaman vino ofrendata jich’anku.+ 19 Ichaqa, ¿noqatachu mana allinta ruwashawankichis? ¿Icha qankuna kikillaykichistaqchu p’enqaypi qhepanaykichispaq chayta ruwashankichis?,+ ninmi Jehová Dios. 20 Chayraykun tukuy munayniyoq Señorniyki Jehová Dios nin: Coleraytan, k’araq phiñakuyniytan chayachimusaq kay jallp’aman,+ runakunaman uywakunaman, campopi kaq sach’akunaman, chajrakunamanpas. K’araq phiñakuyniyqa raurarinqaraqmi manataqmi imapas thasnunqachu,+ nispa.
21 ”Ejercitokunata kamachiq Jehová Diosmi, Israelpa Diosninmi nin: Phawaychis, sacrificioykichisman ruphachina ofrendaykichista yapaykamuychis, jinaspa qankuna kikillaykichistaq chay aychata mijukampuychis.+ 22 Egipto jallp’amanta ñaupa taytaykichiskunata orqomusqay p’unchaypiqa manan imatapas nirqanichu, manan imatapas kamachirqanichu ruphachina ofrendakunamantapas ni sacrificiokunamantapas.+ 23 Kaytan ichaqa kamachirqani: Simiyta kasukuychis, noqan Diosniykichis kasaq, qankunataq llaqtay kankichis.+ May ñannintachus purinaykichispaq kamachisaykichis chaynillantan purinaykichis, chhaynapin allillan kankichis,+ nispa. 24 Paykunan ichaqa mana kasukurqankuchu ni uyariqpas tukuwarqankuchu,+ aswanpas munasqallankutan ruwarqanku, k’ulluchakuspan millay sonqonkuq munasqanwan aysachikurqanku.+ Ñaupaqman rinankumantaqa qhepamanmi kutipurqanku, 25 chaytan ñaupa taytaykichiskuna Egipto jallp’amanta lloqsimusqanku p’unchaymanta kunankama ruwashankichis.+ Chayraykun qankunaman llapa kamachiy profetakunata kachamurqaykichis; sapa p’unchaymi, sapa kutinmi kachamurqaykichis.+ 26 Ichaqa manan kasukurqankichischu ni uyariwarqankichispaschu,+ k’ullumanmi tukupurqankichis. Ñaupa taytaykichiskunamantapas aswan mana allintaraqmi ruwarqankichis.
27 ”Qanmi kay rimasqayta paykunaman willanki,+ paykunan ichaqa mana uyarisunkikuchu, wajaqtiykipas manan uyarisunkikuchu. 28 Chaymi paykunata ninki: Kay nacionqa Diosnin Jehová Diospa siminta mana kasukuq nacionmi, wanachisqantapas mana chaskikuq llaqtan. Junt’aq sonqo kayqa chinkapunmi, manañan junt’aq sonqo kaymantaqa rimarillankupaschu,+ nispa.
29 ”Jatun chujchaykita rutukuspa wijch’uy, jinaspa q’ara orqo patakunapi llaki takita takiy, Jehová Diosqa manan chaskinchu kay miraytaqa, phiñachisqankuraykun wijch’upunqa. 30 Judá llaqtaqa cheqnisqay ruwaykunatan ruwarqan, millakunapaq idolonkunata churaspan sutiyta apaq wasita qhellicharqan,+ ninmi Jehová Dios. 31 Hinón* wayq’opin,+ Tofetpin yupaychana patakunata* ruwarqanku, chaypi churinkuta ususinkuta ruphachinankupaq,+ manan chaytaqa kamachirqanichu, manan yuyaykullarqanipaschu.+
32 ”Chayraykun p’unchaykuna chayamushanña, chay p’unchaykunapin manaña chay wayq’otaqa Tófet, Hinón* wayq’o ninqakuñachu, aswanpas Runa Wañuchina wayq’o ninqakun, Tofetpin wañuqkunata p’ampanqaku manaña campopas kanankama,+ ninmi Jehová Dios. 33 Kay llaqta runakunaq ayantaqa phalaq animalkuna kay jallp’api kaq animalkuna iman mijukapunqaku, manan pipas chay animalkunataqa manchachinqachu.+ 34 Judapi kaq llaqtakunamantan, Jerusalenpa callenkunamantan kusikuyta q’ochukuytapas chinkachipusaq, casarakuq qhariq kusikuyninpas casarakuq warmiq kusikuyninpas chinkapunqan.+ Kay suyuqa ch’usaqyachisqan kapunqa”,+ nispa.