Jeremías
13 Jehová Diosmi niwarqan: “Phaway, linomanta chumpita rantikamuy, jinaspa cinturaykiman watakuy, aman unumanqa challpunkichu”, nispa. 2 Chaymi noqaqa Jehová Diospa niwasqanman jina chay chumpita rantikamuspa cinturayman watakurqani. 3 Chaymantan Jehová Diosqa niwallarqantaq: 4 “Chay cinturaykiman watakusqayki chumpita apay Éufrates mayuman, jinaspa rumi-rumi k’ajtuman pakamuy”, nispa. 5 Jinan Jehová Diospa kamachiwasqanman jina Éufrates mayu cantoman pakamurqani.
6 Askha p’unchaykuna qhepamantaq Jehová Diosqa niwarqan: “Phaway Éufrates mayupi pakamusqayki chumpita maskhamuy”, nispa. 7 Chaymi noqaqa Éufrates mayuta rirqani pakamusqay chumpita orqomunaypaq, chay chumpin ichaqa mana imapaqpas valepusqañachu.
8 Chaymantan Jehová Diosqa rimapayawallantaq, paymi niwarqan: 9 “Jehová Diosmi khaynata nin: Chhaynallatataqmi Judá aylluq jatunchakuyninta Jerusalenpa sinchi jatunchakuynintapas chinkachisaq.+ 10 Kay millay runakunaqa manan simiyta kasukuyta munankuchu,+ k’ulluchakuspan sonqonkuq munasqanman jina kausanku,+ juj dioskunatan qatikunku, k’umuykuspataq yupaychanku, chaymi kay mana valeq chumpi jina kapunqaku. 11 Imaynan chumpiqa runaq cinturanman watasqa kashan, chhaynata Israel llaqtapas Judá llaqtapas noqaman jap’ipakushawanallankutan munarqani; llaqtay kanankupaq,+ kusikunay kanankupaq, sumaq qhawarisqa kanankupaqmi ajllakurqani,+ ichaqa manan kasukuwarqankuchu,+ ninmi Jehová Dios.
12 ”Paykunamanmi willallankitaq: Jehová Diosmi, Israelpa Diosninmi nin: Llapa jatun p’uyñukunamanmi vinota junt’achikunan, nispa. Paykunataq nisunki: ¿Manachu yachaykuña llapa jatun p’uyñukunaman vinota junt’achikunanta?, nispa. 13 Qantaq ninki: Jehová Diosmi nin: Jatun p’uyñuman jinan kay suyu runakunaman vinota junt’achisaq;+ Davidpa trononpi tiyaykuq reykunatan, sacerdotekunatan, profetakunatan, Jerusalenpi tiyaq llapa runakunatan sinchitapuni machachisaq. 14 Paykunapuratan takanachisaq, taytakunatapas churikunatapas takanachisaqmi, manan paykunataqa khuyapayasaqchu, manan llakipayasaqchu nitaqmi perdonasaqpaschu; manan imapas jark’awanqachu paykunata chinkachinaypaqqa,+ ninmi Jehová Dios,+ nispa.
15 Makilla uyariychis,
Jehová Diosmi rimarin, ama jatunchakuqchu kaychis.
16 Jehová Diosniykichista jatunchaychis,
manaraq tutayayta apamushaqtin jatunchaychis,
orqokunapi tutayamuqtin manaraq misk’akushaspa jatunchaychis.
Qankunaqa k’anchaytan suyankichis,
paymi ichaqa tutayayta apamunqa,
17 Manachus uyarikuyta munankichis chayqa waqasaqmi,
jatunchakuq kasqaykichismantan pakallapi waqasaq.
Khuyaytan waqasaq, unu jinaraqmi weqeypas phawamunqa.+
Jehová Diospa ovejankunata apakapusqankumantan waqasaq.+
18 Reyta maman reinatawan niy:+ Pampapi tiyaykuychis,
munay coronaykichismi umaykichismanta urmanqa.
19 Uray lado llaqtakunaqa wisq’asqan* kashan,
manan pipas chay llaqtakuna kichaq kanchu.
Llapa Judá runakunatan presota apapunku,
llapankutapunin presota apapunku.+
20 Qhawariy wichay ladomanta jamuqkunata.+
¿Maymi chaskisqayki munay ovejakuna?+
21 ¿Imaninkin qallariymantapacha amigoykipaq qhawarisqaykikunamanta ñak’ariyniyki chayamuqtin?+
¿Manachu nanaywan jap’ichikuq onqoq warmi jinaraq tarikunki?+
22 ¿Imaraykun kaykuna pasawan?, nispapaschá sonqoykipi ninki,+
yachay, jatun juchaykiraykun faldaykiq cantonqa llik’isqa karqan,+
talonniykikunapas sinchi nanaytan aguantarqan.
23 ¿Cus runa* aychanpi colorninta cambianmanchu?
¿Leopardo* ch’eqchi kayninta cambianmanchu?+
Chhayna kaqtinqa atiwaqchischá allin kaq ruwayta,
qankunaqa mana allin kaq ruwayllatan allinta yachankichis.
24 Chayraykun ch’eqechisaykichis ch’inneq wayraq apasqan pajata jina.+
25 Chaymi qanmanqa tupasunki, chaytan qanpaq t’aqarqani.
Noqataqa qonqapuwarqankin,+ llulla yachachikuykunapin confianki,+ ninmi Jehová Dios.
26 Chaymi faldaykita uyaykikama q’allpasayki,
q’alalla kayniykin rikukunqa.+
27 Jujwan pantasqaykin rikukunqa,+
china caballo jina phawaykachaspa qhelli juchata ruwasqaykin rikukunqa.
Orqo patakunapi, campokunapi millakunapaq ruwasqaykitan rikurqani.+
¡Jerusalén llaqta, imaraqmi qanmanta kanqa!
¿Jayk’aqkaman qhellilla kanki?”,+ nispa.