Ezequiel
43 Chaymantataq payqa inti lloqsimuy lado punkuman pusawarqan.+ 2 Chaypin rikurqani Israelpa Diosninpa k’anchayninta, chayqa inti lloqsimuy ladomantan jamushasqa.+ Paypa kunkanqa askha unuyoq mayuq rimarisqan jinaraqmi rimarisqa.+ Chay k’anchayqa llapa jallp’a pachamanmi k’anchaykurqan.+ 3 Chay rikusqayqa llaqta thunisqa kananmanta willaq jamushaspa* rikusqay rijuriy jinan kasqa, Kebar mayu+ qayllapi rikusqay rijuriy jinan kasqa, chay kutin noqaqa chayta rikuspa pampamanraq kumpakurqani.
4 Chaymantataq Jehová Diospa k’anchayninqa inti lloqsimuy lado punkunta+ temploman* jaykurqan. 5 Chaypin juj espíritu* oqariwaspa ukhu kaq patioman apaykuwarqan; temploqa Jehová Diospa k’anchayninwanmi junt’a kashasqa.+ 6 Chaymantataq juj kunka templo ukhumanta rimapayamuwarqan; chay runataq ladoypi sayaykurqan.+ 7 Paymi niwarqan:*
“Runaq churin, kaypin kashan tiyanay trono,+ kaytan chaki pampay sarunqa,+ kaypin wiñaypaq tiyasaq, Israel llaqta ukhupin tiyasaq.+ Israel runakunaqa manañan sutiyta qhellichanqakuñachu,+ manañan paykunapas ni reyninkupas qhellichanqakuñachu, manañan qhelli idolonkunawanpas ni reyninkuq wañusqa cuerponwanpas qhellichanqakuñachu. 8 Punkunkutan punkuypa ladonpi churarqanku, punkupi sayaq k’aspinkutan punkuypa qayllanpi churarqanku, juj perqallan t’aqarqan paykunatawan noqatawanqa.+ Imaymana qhelli ruwasqankuwanmi paykunaqa ch’uya sutiyta qhellicharqanku, chaymi noqaqa k’araq phiñakuyniypi paykunata tukuchirqani.+ 9 Idolokuna yupaychayninkuta* noqamanta karunchachunku, reyninkuq wañusqa cuerponkutapas wijch’upuchunku. Chhaynapin noqaqa paykuna ukhupi wiñaypaq tiyasaq.+
10 ”Runaq churin, templomanta imachus rikusqaykita llapanta Israel runakunaman willay,+ chhaynapi imakunachus ruwasqankumanta p’enqasqa kanankupaq.+ Chay temploq medidankunata allinta qhawachunku. 11 Paykunachus llapa imaymana ruwasqankumanta p’enqasqa kanqaku chayqa, chay templo dibujotan qhawachinki, llapantan qhawachinki imayna t’aqasqachus kashan chayta, maynintachus jaykukun lloqsikun chaykunatapas.+ Qhawachinkin chaypaq kamachikuykunatapas leykunatapas. Paykunaq rikushasqanmi chaytaqa qelqanki, chhaynapi chay dibujota qhawanankupaq kamachikuykunatapas junt’anankupaq.+ 12 Kaymi chay templopaq kamachikuy kanqa: Templo muyuriqpi llapa orqo pataqa ch’uyay-ch’uyan kanqa.+ Chaymi templopaq kamachikuy kanqa.
13 ”Kayqa altarpa jayk’achus medisqanmi, chayqa codowan medispakaman ruwakurqan+ (sapanka codon kasqa maki ancho sayaywan yapasqa).* Pampapi tiyananqa juj codo alton kashan, juj codo sayaymi lloqsishanpas. Chay lloqsisqan pata muyuriqpin kashan wichayman ruwasqa pata kinray, chayqa juj cuarta* anchon kashan. 14 Chay pampapi tiyanan patamanta jawan patakamaqa iskay codo alton kashan, juj codo sayaytaq pata jina lloqsishan. Chay patamanta jawan patakamaqa tawa codon kashan, chaymantapas juj codo sayaymi pata jina lloqsishan. 15 Chaypa jawan patapitaq nina ruphachina altar kashan, chaypa altonqa tawa codon kashan. Altarpi nina ruphachina patamantataq tawa waqrakuna lloqsishan.+ 16 Chay altarqa cuadradon, largonpas anchonpas chunka iskayniyoq codon kashan.+ 17 Altarpa uranqa sapanka ladon chunka tawayoq codo kashan. Chay pata muyuriqpitaq juj pata wichayman ruwasqa kashan, chayqa kuskan codo anchon kashan, juj codo ancho patapitaqmi tiyashan.
”Chay altarman seqana gradaskunaqa inti lloqsimuy ladopin kashan”, nispa.
18 Chaymantan payqa niwallarqantaq: “Runaq churin, tukuy munayniyoq Señor Jehová Diosmi nin: Altarta ruwakusqan qhepamanmi kay kamachikuyman jina chay altarpi sacrificiokunata ruphachikunqa, kaypi nisqanman jinan altartapas yawarwan ch’aqchukunqa,+ nispa.
19 ”Tukuy munayniyoq Señor Jehová Diosmi nillantaq: Jucha pampachay ofrendapaqmi Sadocpa miraynin Leví sacerdotekunaman,+ noqaman qayllaykamuq runakunamanwan, wakakuna ukhumanta juj malta torota qonki.+ 20 Chay altarta juchamanta ch’uyanchanapaqmi, limpiasqa kananpaqmi chay toroq yawarninta juj chhikanta chay altarpi waqrakunaman sut’uykachinki, sut’uykachinkin altarpa uranpi tawantin esquinakunamanpas, chay pata kinraypi wichayman ruwasqa patamanpas.+ 21 Chaymantataq chay jucha pampachay ofrendapaq torotaqa templomanta jawaman apanqaku, chaytataq chaypaq t’aqasqa partepi ruphachinqaku.+ 22 Iskay kaq p’unchaytaq jucha pampachay ofrendapaq juj orqo cabrata qhalita jaywanki. Chaywanmi paykunaqa juchamanta altarta ch’uyanchanqaku, imaynan malta torowanpas ch’uyancharqanku jinata, nispa.
23 ”Altarta ch’uyanchayta tukuspan, wakakuna ukhumanta juj malta torota qhalita jaywanki, jaywallankitaqmi juj qhali orqo ovejatapas. 24 Jehová Diosmanmi chayta apamunki, chaymanmi sacerdotekunaqa kachita churanqaku,+ jinaspa Jehová Diospaq ruphachinqaku. 25 Qanchis p’unchaymi jucha pampachay ofrendapaq orqo cabrata,+ malta torota, juj orqo ovejatawan apamunki; chaykunaqa qhalikaman kanqa. 26 Qanchis p’unchaymi paykunaqa altarta ch’uyanchanqaku, chayta ch’uyanchaspataq noqapaq t’aqanqaku. 27 Qanchis p’unchay qhepamantaq pusaq kaq p’unchaymantapacha+ sacerdotekunaqa ruphachina ofrendaykichista sumaq kausay sacrificioykichista* ima chay altarpi jaywamunqaku, noqataq qankunawan kusisqa kasaq,+ ninmi tukuy munayniyoq Señor Jehová Diosqa”, nispa.